NGÛGÎ 10

1Ikwarî na muntû eetagwa Koronerias taûni ya Kaisaria. Aarî mûrûngamîîri wa mbûûtû ya ndûa yeetagwa Mbûûtû ya Itaaria. 2Aarî muntû aatîîyîte Ngai na aamûkuthûkaga amwe na antû ba mûciî wake bonthe. Naateethagia nkîa mûno na aarombaga Ngai rîonthe. 3Mûthenya ûmwe ta thaa kenda oona kîoneki. Mûraîka wa Ngai aathûngîra amwîta, "Koronerias!" 4Koronerias akwona mûraîka aamaka. Amûûria, "N'ata, Mwathani?" Mûraîka ûyu amwîra, "Ngai atiriganîrîtue i maromba maaku na ûteethio bûra ûteetheetie na bu nkîa. 5Tûma antû Njopa bageete muntû eetagwa Simioni, kaîrî Petûrû. 6Arîkara kwa muntû atagutaga njûo eetagwa Simioni, atûîre akubî na îria." 7Mûraîka akûthi, Koronerias eeta aruti ngûgî baake ba mûciî baîrî na mûcikaarî ûmwe. Mûcikaarî ûyu aarî ûmwe wa bara baamûkaragia na naarombaga Ngai. 8Abeera bunthe bûra gwakarîkîîte. Rîru abatûma Njopa. 9Rûûni antû babu wabarî njîraani barî akubî gûkinya Njopa, ta thaa thiita Petûrû i rîo aarî agwîtia rûûgûrû rwa nyomba kûromba. 10Neegagua yûûra. Kwoogu neendaga kûrîa irio. Irio bikîrugagwa, oonua kîoneki. 11Oona îgûrû rîrugûkîîte na gîntû gîakari ta cuka înene îîndamîîrîîtue agu kwarî na mwanya îrî ngwate koona cionthe irî inya. 12Yarî na nyamû cia mîthemba yonthe. Nyamû cia magûrû mana, cia gwîkururia na nyoni. 13Petûrû eegua kayû kamwîra, "Petûrû, thînja nyamû ino wîgaagûre!" 14Petûrû auga, "Arî buru, Mwathani, n'ûntû gûtirî rîo ndaarîa gîntû gîtaagîrîte kana gîtarî kîtheru." 15Kayû gaku kaîrî kamwîra, "Ûtigeete into Ngai atheretie bitaagîrîte!" 16Gwakarîkire ûgu maita mathatû. Na warîru cuka înu yacookua îgûrû. 17Petûrû akîthûgaanagîria gîtûmi gîa kîoneki gîku, antû bara baatûmîîtwe i Koronerias ibaarî bakwathîîrwa baakinya mwîrîgaani wa nyomba ya Simioni îra Petûrû aakaraga. 18Beetana baûrithîria kana ikwarî na mûgeni aakaraga gûku eetagwa Simioni Petûrû. 19Petûrû waagîcûûgagia kûmenya gîtûmi gîa kîoneki gîku, Kîrundu amwîra, "Kûrî antû bathatû bagûgûcûa. 20Îndama na ûtikeegue ûrî na nkanja ûrega kûthi na bo, n'ûntû i niû mbatûmîîte kîrî woû." 21Petûrû eendama ngorobaani eera antû babu, "I niû ûra bûgûcûa. N'ata kûrî?" 22Antû babu bamwîra, "Tûtûmîîtwe kîrî woû i Koronerias, mûtongoria wa mbûûtû ya ndûa. I muntû ûmwagîru akuthûkaga Ngai na atîîyîtwe n'Ayaundi bonthe. I mûraîka aramwîrire wîtwe ûthi gwake kaingo ûmwîra ntûmwa îra ûrî n'yo." 23Petûrû eera antû babu bakûrûke nyomba baraare. Rûûni rûkîîrî Petûrû aathi na antû babu na bamwe ba eetîgîri ba kuuma naagu Njopa. 24Rûûni baakinya Kaisaria. Beethîra Koronerias abeeteereete barî na antû ba mûciî wao na acoore baake bara eetîîte. 25Petûrû agûkinya ûgu, Koronerias amûthagaana amûturîria maru, amwîndamîîra akîmûgonga. 26Îndî Petûrû amûûkîîria amwîra, "Rûngama. Niû ndî muntû ta woû tu." 27Baakûrûka nyomba bakîaragia. Petûrû eethîra antû baingî beethîreene gûku. 28Petûrû auga, "Biû bwingwa ibwiyî atî, Mûyaundi atiîtîgîîrîîtue i watho bwa ndini yake eengîrana kana ariûngîra muntû atarî Mûyaundi. Îndî Ngai narîîkîîtie kûmbonia ntigeete muntû ataagîrîte kana atarî mûtheru. 29Kwoogu gîku i kîo kîratûmire ûkûûmbîta mbîtîgîîria kûûya ntakûûria kîûria. Tambîîra gîtûmi gîa gûntûmana." 30Koronerias amwîra, "Ta îîndî tûrî, thaa kenda cia mûthenya, mbere ya îco, indarombaga ndî nyomba. Nthûti îmwe, ndoona muntû eekîrîte nguo ciayicaga aaya aarûngama mbere yakwa. 31Aambîta, 'Koronerias!' Aambîîra, 'Ngai neegîîtue maromba maaku na atiriganîrîtue n'ûteethio bûra ûteetheetie na bu nkîa. 32Kwoogu tûmana Njopa wîtîrwe muntû eetagwa Simioni, kaîrî Petûrû. Arîkara kwa muntû atagutaga njûo eetagwa Simioni, atûîre akubî na îria.' 33Kwoogu i rîo ndatûmanire wîtwa nthûti weenu na ûkûrûtha bwega waya. Îîndî tûrî aaga twinthe meethooni ma Ngai twîgua bûra bunthe Mwathani akwîrîîte ûtwîra." 34Petûrû aanjîîria kûbaarîria. Abeera, "Îîndî nkûmenya i mma gûtirî antû Ngai eendeete nkûrûki ya bara bangî. 35Kîrî wakîra mûgongo, ûra akuthûkaga Ngai na arûthaga bûra kwagîrîte, Ngai namwîtîgagîra. 36Ndî na mma bûreegua ntûmwa îra Ngai aatûmanire kîrî antû ba Isiraeri na bûra aatûmîîrie ntheto îmbega îra îreetaga ûkiri gûkûrûkîîra kîrî Yiesû Kîrîstû, Mwathani wa bonthe. 37Na ibwîgîîtue mantû mara maatuîkîkire Njundea, mara maanjîîrie na Gariiri nyuma ya Njoana agûtûmîîria mantû ma ûbaatithio. 38Ibwiyî bûra Ngai eetûûrîrie Yiesû wa Nasareethi maguta na njîra ya Kîrundu Ûmûtheru na amûûyûria inya. Na n'ûntû Ngai naarî amwe n'we, Yiesû aathi gûntû na gûntû akîrûthaga mantû meega na akîoragia bara baathîînagua i Nkoma. 39"Tiû, atûmwa, tûrî akûûyî ba mantû monthe mara Yiesû aarûthire nthîgûrû ya Ayaundi na Njerusaremu. Aûragirwe na njîra ya kwambwa mûtharabaani, 40îndî Ngai amûriûkia ntugû ya ithatû, aatûma ooneka arî mwoyo. 41Îndî ti bonthe baamwonire. Akûûyî bara Ngai aathuurîîte i bo baamwonire bonka. Na akûûyî babu i tiû, atûmwa. Na kûrîa tûrarîyanîra amwe n'we na twanyunyanîra amwe n'we nyuma ya akûriûka. 42Aatwîrire tûtûmîîrie antû na tûkûûyîîre atî, we n'we Ngai athuurîîte akaagiitîra îgamba bara barî mwoyo na bara bakuû. 43Iroria bionthe n'akûûyî. Biaugire ûra wonthe amwîtîgagîra akaarekerwa meeyia maake gûkûrûkîîra kîrî riîtwa rîake." 44Petûrû athiîte na mbere kwaria, Kîrundu Ûmûtheru eendamîîra bara bonthe beegiirue ntûmwa yake. 45Eetîgîri ba Ayaundi bara baayanîîtie na Petûrû kuuma Njopa baarigara mûno Kîrundu Ûmûtheru akwîndamîîra kinya antû batarî Ayaundi, 46n'ûntû baaragia na nthiomi ingeni na ibaakumagia Ngai. Petûrû auga, 47"Wata bûra tiû tweerwe Kîrundu Ûmûtheru, nwa ta bu kinya antû baba beewa. Kwoogu ka kûrî we abarigîîria batikaabaatithue?" 48Petûrû auga babaatithue kwa riîtwa rîa Yiesû Kîrîstû. Antû babu beera Petûrû akarakarange kwao ntugû igana ûna.

will be added

X\