3 NJOANA 1

1I niû Mûkûrû ngûkwandîkîra mwendwa Gayas, ûra mbendeete na wendo bwa mma. 2Îromba rîakwa, mwendwa, n'atî mantû maaku monthe i meega na ûrî na ûgima bwa mwîrî, ta bûra nkoro yaku îkari. 3Indakenire mûno rîra aruayia bamwe baayire bambîîra bûra ûrî mwîtîgua mantûûni ma ûmma na bûra ûtûûraga ûmmaani. 4Ntiona gîkeno kîngî gîkûrûkîîte bûra nkwîgua aana baakwa batûûraga ûmmaani. 5Mwendwa, n'ûntû bwega ûrûthaga rîra ûteethagia eetîgîri bara bangî, bara wiyî na bara ûtaiyî. 6Ibakûûyîîrîîte naaga kîrî kanica mantû ma wendo bwaku. N'ûntû bwega ûrûthaga rîra ûbateethagia na njîra îkenagia Ngai bakathi na mbere na rûgendo. 7Barîthi bakîrutaga ngûgî n'ûntû bwa Kîrîstû na batigwîtîgîîria ûteethio bwa bara batarî eetîgîri. 8Kwoogu tiû nwa mwanka tûteetheerie antû baba kaingo tûtaranîrua na bo ngûgîîni yao n'ûntû bwa ûmma. 9Indarandîkîîre kanica baarûa îndî inkûmenya Ndioterebes, ûra eendaga rîonthe kwîgua arî mbere, atirî bata naati. 10Rîra nkaaya nkaumbûra mantû monthe mara arûthaga na nguutû ira aaragia îgûrû rîetû. Na t'ûgu bunka, atiendaga kûgwata aruayia ûgeni, kana areka bara bangî babagwata, nabeengatagia bakauma kanicaani. 11Mwendwa, ûtikaathingate mantû mara mathûûku îndî thingata mantû mara meega. Muntû ûra arûthaga mantû meega, ûyu n'wa Ngai. Îndî ûra arûthaga mantû maathûûku atiyî Ngai. 12Antû bonthe baugaga Ndemeterias i mwega mûno na kinya ûmma bûra arûthaga ibûmûkûûyagîîra. Tiû itûgwatanagîra na bu na ibwiyî tûrîaria ûmma. 13Ndî na maingî mûno ma kûbwîra îndî ntikwenda kûbwîra monthe na baarûa. 14Ndî na wîrîgîîro bwa kûbwona nyuma ya îgiita rîtarî rîraaya. Rîra tûkoonana i rîo tûkaaranîria. 15Ûkiri bûrookaraga naawe. Acoore baaku bagûgûkeethia. Naawe tûkeetherie wakîra ûmwe wa acoore beetû.

will be added

X\