2 TIMOTHEO 3

1Karaga wiyî atî ntugû ciakinya cia mûthiro wa nthîgûrû gûkeegua kûrî na mathîîna maingî mûno. 2Antû bagaatuîka eebendi, eendi mbia, eekumia, batue kwîbûkagîîria na batuîke arumani. Aana barege kwathîkîra aciari baao, antû baage nkuma, batuîke bara batarî batheru nkorooni, 3bathire kîao, batige kûrekanagîra, batue gûtuuyanagîîra ûrongo, baremwe i gwîkaanagia kûrûthaga mantû mara mataagîrîte, bathûûke batuîke abitina, beende ûthûûku akî, 4batuîke akunyanîri, barûthage mantû batakûmaka bûra gûgaakara, batue kwîthûkagia barî antû ba gîtûmi, beende mîago ya nthîgûrû bantû a Ngai. 5Bakoonekaga taka barî antû ba Ngai, îndî baregane na inya ya Ngai. Ûtikeende kûgwetanirua na antû ta babu. 6Bamwe ba antû ta babu i bo bathiyaga kinya mîciî ya antû bagakîria inya eekûrû bara batarî inya kweneerua, bara barî na mîrigo ya meeyia maingî mûno na baathagwa i wîrirîîria bwa mîthemba yonthe. 7Eekûrû ta babu beegagua bakîgeria kûmenya, îndî bataûmbe kûmenya ûmma bungwa. 8Ta bûra Njanes na Njamberes baakararagia Musa, antû baba na bo i ta bu bakararagia na bakaregana na ûmma n'ûntû bwa bûra meeciiria maao maathûûkire na wîtîgio bwao ti bwa mma. 9Antû ta baba batikarangaga antû batiracooka kwona bûra bariitîîte bûgana ta bûra baacookire kwona Njanes na Njamberes bakari. 10Îndî woû, Timotheo, nwiyî bwega mûno mantû mara monthe ndutanîîte na nwoneete mûkarîre wakwa, mworooto wakwa ûtûûrooni, wîtîgio bûra ndî na bu, kwinyîkîria, kwendanaga, kûûmîîria 11kûnyamaarua na kûthîînua. Nwiyî bwega mûno kûnyamaarua kûra ndanyamaarîîtue Antiokia, Ikoniamu, na Rîstira, îndî ndaûmîîria. I Mwathani aambonokagia gûntû gûku kunthe. 12Muntû wonthe ûra eendaga gûtûûrîra Ngai arî ndeni ya Kîrîstû Yiesû akanyamaarua. 13Antû baathûûku na bara beetuîkithagia kîra batarî ibagaatororeria, bathi na mbere bakîenagîîria antû na bakîîbenagîîria barî bo bongwa. 14Îndî woû karaga ûrikîîtie ûmma bûra warutanirwe na wabuîtîgia na inya. Nwiyî aarimû baaku baarî ba ûû. 15Kuuma wana bwaku nûtûîre wiyî Maandîko Maatheru, mara maûmbaga gûkwatha ûkoona wonokio na njîra ya gwîtîgia Kîrîstû Yiesû. 16Maandîko Maatheru monthe maumanîîtie na Ngai matûmagîrwa kûrutana antû ûmma, gûkaania muntû, kûruta muntû mabîtia na gûtongoreeria antû batûûra barî baagîru, 17kaingo muntû ûra arutagîra Ngai ngûgî aûmba kwîgua arî ûmûganu na akîûmbaga kûrutîra Ngai ngûgî yonthe îmbega.

will be added

X\