2 ATHESARONIKE 3

1Na tûkîthiria, aruayia na aarayia, ga tûbûûrie bûtûrombagîre. Rombaani ntheto ya Mwathani îtambe na mpwî na îthûkue na gîtîîyo ta bûra bwamîthûkiirie. 2Na tûrombagîreeni tûkûûragwe kuuma kîrî bara batarî baagîru na baathûûku, n'ûntû t'antû bonthe beetîgîîtie. 3Îndî Mwathani i mwîtîgua. Kwoogu akabwaa inya na akabûrigîîria kîrî ûra mûthûûku. 4Mwathani natûmaga twîtîgia atî, na mma ibûrûthaga mantû mara twabwîrire bûrûthage, na atî bûkaathi na mbere kûmarûtha. 5Mwathani arootongagîîria nkoro cienu bûkamenya nkûrûki bûra Ngai abwendeete bûgana. Na Mwathani arootûma bûkaraga bûûmîîrîîtie kûûmîîriani kûra Kîrîstû eeyanaga. 6Îîndî, aruayia na aarayia, riîtwaani rîa Mwathani wetû Yiesû Kîrîstû tûrîbwîra atî, nwa mwanka bwathûkane na eetîgîri bara baregaga kûruta ngûgî, bara baregaga kûthingata mantû mara twabûrutanire. 7Biû ibwiyî atî, nwa mwanka bûthingate ngerekano yetû. Tûtaarî ithao rîra twarî kwenu. 8Tûtigîîtîgîra kûrîa irio bia muntû tûtakîmûrîa bio. Mûthenya na ûtugû, twarutaga ngûgî na inya mûno kaingo tûtatuîka mûrigo kîrî biû. 9Itwarî na watho bwa kûbwîra bûtweyage ûteethio, îndî tûtaarûtha ûgu. Twarutaga ngûgî tûkeemenyeera twingwa kaingo twîgua tûrî ngerekano îra bûkaathingataga. 10Rîra twarî kwenu, itwabwere watho bûkuuga, "Ûra akaarega kûruta ngûgî atikaarûmue irio." 11Tûrîbwîra ûgu n'ûntû tûrîîgua bamwe beenu ibakûrega kûruta ngûgî. Atî bo gûtirî bu barûthaga, nwa kûriûnga bariûngaga bakîîthûngagîîria mantûûni ma itha. 12Riîtwaani rîa Mwathani wetû Yiesû Kîrîstû, tûrîbeera nwa mwanka barutage ngûgî ciao bakirîîrîîtie, bacûe mbia beegûrîre irio. 13Îndî biû, aruayia na aarayia, ndîbwîra bûtikaanoge i kûrûtha mantû meega. 14Ûkaaya kwîgua kûrî we akaarega kwathîkîra bûra tûbwîrîîte baarûani îno, bûmenye n'ûû. Bûtikaagwatanîre n'we kaingo eegua nthoni. 15Bûtikaamûthûkieni arî mûnthû, îndî mûkaanagieni arî ta mûruanyûkwe kana mwaranyûkwe ndeni ya Kîrîstû. 16Mwathani ûra eeyanaga ûkiri aroobweyaga ûkiri rîonthe na njîra cionthe na arookaraga naabi bwinthe. 17Îîndî i niû Paûrû nkwandîka ndî niû ningwa nkeethi ciakwa. Na rûrû i ru rwano rûra ntûmagîra, kwonania i niû mwandîki wa baarûa ciakwa cionthe. Ûûgû i bu mbandîkaga. 18Ûtugi bwa Mwathani wetû Yiesû Kîrîstû bûrookaraga naabi bwinthe.

will be added

X\