2 ATHESARONIKE 1

1I tiû Paûrû, Sairas na Timotheo tûkûbwandîkîra, biû antû ba kanica ya Thesaronike. Bûrî ndeni ya Ngai Baaba wetû na ndeni ya Mwathani Yiesû Kîrîstû. 2Ngai Baaba wetû, na Mwathani, Yiesû Kîrîstû baroobwaa ûtugi na ûkiri. 3Rîonthe itûbatîîrue tûcookagîria Ngai nkaatho n'ûntû bwenu, biû aruayia na aarayia. Na ûgu i bu kwagîrîte n'ûntû bwa bûra wîtîgio bwenu bûthiîte bûkîongeerekaga, na n'ûntû bwa bûra wendo bwa wakîra ûmwe wacienu kîrî muntû ûra ûngî bwongeerekeete. 4Gîku i kîo gîtûmaga twîra makanica mara mangî ma Ngai bûra bûrî beega. Tûbeeraga bûra bûthiîte na mbere na kûûmîîria mathîîna mara bûrî na mo, na bûra bûthiîte na mbere kwîgua bûrî na wîtîgio kûnyamaaruani kûra kunthe bûnyamaaragua. 5Ûgu ikwonania Ngai agiitaga magamba bûra kwagîrîte. Na kwoogu arîbûtuîkithia antû baagîru baagîrîte kûthûngîra ûneneeni bwake bûra bûtûmaga bûnyamaarua. 6Ngai agaakaanûkia bara babûnyamaaragia. Na ûgu i bu oonaga baagîrîtwe barûthwa. 7Biû bûkûnyamaarua, Ngai agîtûnogokia akabûnogokia na biû, rîra Mwathani Yiesû akaaya kuuma îgûrû arî na araîka baake barî inya. 8Akaaya na mwanki ûgîakanaga wa gûkaanûkia bara bataiyî Ngai na bara bateetîgagîra ntheto îmbega ya Mwathani wetû Yiesû. 9Na îkaanûkia rîra akaabaa ûkeegua rîrî kûbeenyangia kûrû, abaathûre baume ara Mwathani arî, ara inya yake îra îrî mwago îrî. 10Mantû mamu magaakarîka rîra Mwathani akaaya gûkaathwa mwago wake n'antû baake bara bamwitîgîîtie bamûkumue. Bûkeegua bûrî bamwe ba antû baake ntugû înu n'ûntû ibweetîgiirie ûkûûyî bwetû. 11Na gîku i kîo gîtûmaga tûbûrombera rîonthe. Tûûragia Ngai atûme bwîgue bûrî ba mûkarîre ûkûgwatanîra na mwîto ûra aabwîtire. Na kwa inya yake atûme bûrûtha ûntû bwega bunthe bûra bûbangîîte kûrûtha na bûra bunthe wîtîgio bwenu bûgaatûma bûrûtha. 12Gûkari ûgu, bûgaakumia riîtwa rîa Mwathani wetû Yiesû na akabûkumia kûringana na ûtugi bwa Ngai wetû na Mwathani Yiesû Kîrîstû.

will be added

X\