2 AKORINTHO 8

1Aruayia na aarayia, tûrîenda bûmenya bûra Ngai atugîîte makanica ma Macendonia. 2Baageriirue na mathîîna maingî mûno na nwa bu baarî na ûkîa bûgana. Îndî amwe na ûgu, gûkena kûra baakeneete kwarî kûnene mûno. Beeyanire na gûkûrûkîîria baakûrûkîîria kaingo bateethia nkîa batagûtara. 3Ga nkûbwîra, beeyanire bûra bakîûmba na gûkûrûkîîria baakûrûkîîria bûra baûmbaga. Beeyanire bakîendaga. 4Igûtwereka baatwerekire twîtîgîra biewa biao, wana bo baathûngîra mûtariini wa ngûgî îno ya gûteethia antû ba Ngai. 5Baarûthire ûntû tûteerîgîîrîîte. Mbere baambire beenenkanîra kîrî Mwathani na kîrî tiû, wata bûra Ngai eendeete barûtha. 6Tito n'we aambanîîrie naabi ngûgî ya kwîthîrania mbia. Kwoogu i ntûma twamwîrire abûteetheerie bûthirîkîrie ngûgî îno ya kwîganua kîao. 7Bûtongeete na bionthe--wîtîgio, rwaria, ûmenyo, kwenda gûteethia na nkoro yonthe, na wendo bûra bûtwendeete na bu. Kwoogu i tûkwîrîgîîra bwîgua bûkari ûgu kinya mantûûni ma kweyana bûtagûtara. 8Îndî tika nkûbwîra nwa mwanka bûrûthe ûgu ndauga. Ga nkwenda kwona bûra wendo bwenu bûrî bwa mma rîra nkûbûganaania na antû bangî bara bakwenda gûteethania. 9Ibwiyî ûtugi bwa Mwathani wetû Yiesû Kîrîstû. Amwe na kwîgua aarî ûmûtongu eetuîkithiirie nkîa n'ûntû bwenu kaingo abûtongia na ûkîa bwake. 10Ndîona i kaaba îîndî bûkathirîkîria kîra bwanjîîrie mwanka mûthiru. I biû ba mbere kweyana. Na ti na kweyana gunka, i kinya na kwîgua bûrî na wendi bwa kweyana. 11Kwoogu îîndî thirîkîriani ngûgî înu. Onaniani wendi bwenu bwa kûmîthirîkîria i bûûnene ta bûra bwarî na bu rîra bwamîanjagîîria. 12Ûkeeyana ûrî na wendi, Ngai ageetîgîra kûringana na bira ûrî na bio, ti bira ûtarî na bio. 13Tûtikwenda bûûmîrwa i mantû bûgîcûa kûthirîria bara bangî thîîna ciao. Tûrîenda kwîgua kûrî na nganaano. 14Kagiitaani gaka n'ûntû bûrî na bio nwa bûteethie bara batarî na gîntû. Kagiita kangî rîra ûkeegua na bo barî na bio biingî, nwa babûteethie rîra bûtakîîgua bûrî na gîntû na rîru i rîo ûkeegua bûrî nganaano. 15Wata bûra kwandîkîîtwe Maandîkooni Maatheru, "Ûra ooyaniirie mûno tika eegua arî na nkûrûki. Na ûra ooyaniirie bûûkai tika aaga." 16Ingûcookeria Ngai nkaatho n'ûntû bwa kwaa Tito nkoro ta îra ndî ya kwenda kûbûteethia. 17Tûkûûria Tito kana eetîgîra tûkamûtûma kîrî biû ataarega. Kwaria mma, we wengwa neendaga mûno mûno kûûya. 18Tûrîmûtûma barî na mûruayia ûngî akumagua mûno i makanica n'ûntû bwa ngûgî ya ntheto îmbega îra arutaga. 19Na nkûrûki ya ûgu, mûruayia ûyû naathuurirwe i makanica athiyanagia naati ngendooni cietû twirîîte ûteethio bwetû. Itûtûmaga Mwathani akumua na bu na ibwonanagia wendi bwetû bwa gûteethia. 20Tûtikwenda kwîgua kûrî na ûntû bwa kûnung'unîra îgûrû rîa ûteethio bûbû bwa mbia inyingî bûra tûgûtûmîra antû ba Ngai ba Njundea. 21Itûgûcûûgia mûno bûra kûûmbîka tûrûthe bûra kwagîrîte kîrî Mwathani na kîrî antû. 22I ntûma tûgûtûma mûruayia ûngî wetû kaîrî baayania na Tito. Itûmûgereetie mantûûni maingî twona arî na wîru mûno bwa kwenda gûteethia. Îîndî nakwenda kinya nkûrûki n'ûntû nakûbwîtîgia mûno. 23Tûrutaga na Tito ngûgî îmwe ya kûbûteethia. Aruayia baba na bo baayanîîtie n'we i batûmîîtwe i makanica, na i bakwonania mwago wa Kîrîstû. 24Kwoogu boonieni wendo bwenu i bwa mma na oniani makanica tûtikenaga i biû mana.

will be added

X\