2 AKORINTHO 3

1Ka îîndî tûkwanjîîria kuuga kaîrî bûra tûrî beega? Kûrî antû boonaga kûrî na gîtûmi kwandîkîrwa baarûa cia kuuga bûra barî antû beega. Îndî kîrî tiû baarûa ta inu itirî gîtûmi. Gûtirî gîtûmi tiû kwandîkîrwa baarûa ta inu tûbûreetera kana tûbûûria biû bûtwandîkîra cio. 2Biû bwingwa i biû baarûa mantûûni meetû. Bwandîkîîtwe nkorooni cietû bûmenyeka i muntû wonthe na bûthoomwa. 3Ibwonanagia bûrî baarûa îra Kîrîstû atûmîîte kuuma naati. Baarûa îno îtiandîkîîtwe na rangi. Yandîkîîtwe na Kîrundu wa Ngai ûra atûûraga mwoyo. Yo îtiandîkîîtwe maigaani ma rûbaariû, yandîkîîtwe nkorooni cia antû. 4Tûriuga ûgu n'ûntû bwa bûra Kîrîstû atûmîîte twîgua tûrî na mma îgana na Ngai. 5Îndî tika tûkuuga nwa tûrute ngûgî îno twingwa. I Ngai atûûmbithagia kûrûtha mara monthe tûrûthaga. 6N'we aatûûmbithiirie kwîgua tûrî aruti ngûgî tûrutana kîrîîkanîro kîîyerû. Na kîo kîrîîkanîro gîkî kîîyerû ti watho bwandîkîîtwe, kîo i gîa Kîrundu. Watho bûra bwandîkîîtwe ibûûragaga, îndî Kîrundu we neeyanaga mwoyo. 7Watho bûra bwareetire gîkuû bwandîkîîtwe maigaani ma rûbaariû. Na mwago wa Ngai nwonekanire rîra bwanenkanagîrwa, watûma ûthiû bwa Musa bûtharara mûno mwanka Aisiraeri baaremwa kûthi na mbere kûbucûûba. Îndî mpoora mpoora ibwacookire ta wîthîre. 8Ûkaaya kwîgua watho ibwarî na mwago ûgana ûgu rî, n'ata gûtûmîka gûkû gwa gîîkîrundu kûrî mwago nkûrûki? 9Ûkaaya kwîgua kîrîîkanîro kîra gîatuuyagîra antû ibeeyîîtie i kîarî na mwago, n'ata kîrîîkanîro kîra gîtuîkithagia antû baagîru kîrî mwago mûno nkûrûki? 10Nwa tuuge kîra kîarî na mwago, îîndî gîtirî na uu kîganaanîîtue na mwago ûmûnene mûno nkûrûki ûra kîrîîkanîro kîîyerû kîrî. 11Ûkaaya kwîgua kîrîîkanîro kîra gîkûrû, kîra gîtaakarakaranga ikîarî na mwago, n'ata kîrîîkanîro kîîyerû, kîra gîgaatûûra tene na tene ûkeegua kîrî na mwago ûgana? 12Kwoogu, n'ûntû tûrî na wîrîgîîro bûbu, tûrî na ûcamba bûûnene mûno. 13Tiû tûtikari ta Musa ûra aakunîkîîre ûthiû bwake kaingo Aisiraeri batoona mwago ûkîthira. 14Mathûgaania ma Aisiraeri imaatigire kûruta ngûgî. Wana îmunthî gûkunîkwa wagûku ikûbaithaga batikaamenye ûmma bungwa baathooma mabuku ma kîrîîkanîro gîîkûrû. Gûkunîkwa gûku kûthiraga rîra muntû eetîgia Kîrîstû. 15Wana îmunthî warîonthe Ayaundi baathooma watho bwa Musa, ibakunîkagîrwa mathûgaania maao. 16Îndî muntû aagarûka kîrî Mwathani, gûkunîkwa gûku ikûthiraga. 17Mwathani i Kîrundu, na ara Kîrundu wa Mwathani eegagua arî, i kwîgagua kûrî na kûthaûrwa. 18Twinthe itwonaga mwago wa Mwathani. Gûtirî gîtûmi gîetû gûkunîkîra moothiû. Na wabûra Mwathani, ûra arî Kîrundu, athiyaga na mbere kûruta ngûgî arî ndeni yetû i tûgarûkaga tûkabuanaana n'we na tûkoonania mwago wake mûno nkûrûki.

will be added

X\