2 AKORINTHO 2

1Kwoogu i ntûma nteendaga gûcookeera naagu mbûya gûtûma bûgwatwa i kîeba. 2Ngatûma bûgwatwa i kîeba i ba ûû bangî batûma nkena? Gûtirî ûngî nwa muntû woora nkîgwatithia kîeba aûmba gûnkenia. 3Gîku i kîo gîatûmire mbwandîkîra baarûa îra. Nteendaga kûûya ngwatithua kîeba i bara babatîîrue baankenia. Ndî na mma rîra nkenaga wana biû bwinthe ibûkenaga. 4Rîra ndabwandîkîîre, indanyamaaraga mûno nkorooni ntaakeneete. Ndaandîkire ngîtûûraga meethori maingî mûno. Ntaabwandîkagîra bûngwatithia kîeba. Ndabwandîkagîra mbûmenyithia bûra mbwendeete bûgana. 5Ûra areeteete kîeba, ti ninka agwatithîîtie. I bwinthe agwatithîîtie na njîra nna (ntikwenda kûthûûkia mantû nkûrûki ya bûra makari). 6Îndî n'we muntû ûyu îkaanûkia rîra baingî beenu bûmwete i rîkûgana. 7I kaaba îîndî bûkamûrekera na bûkamwîkîra wîru i kaingo n'we atagwatwa i kîeba athira wîrîgîîro. 8Kwoogu inkûbûûria bûmwonie wendo bwenu kîrî we i bwa mma. 9Ndabwandîkîîre baarûa îra îngî nkîbûgeria mbona kana bûrî aathîki mantûûni monthe. 10Warekera muntû, wana niû nkamûrekera. Na ûkaaya kwîgua kûrî we wabu mbatîîrue nderekera, nkûmûrekera n'ûntû bwenu, Kîrîstû arî mûkûûyî wakwa. 11Ndamûrekera kaingo Saitaani atoona kaanya n'ûntû itwiyî mîbango yake bûra îkari. 12Nkûûya Tiroas gûtûmîîria ntheto îmbega ya Kîrîstû, Mwathani nampeere kaanya keega ga gûtûmîîria. 13Îndî ntaarî na ûkiri n'ûntû ntoona mûruayia, Tito. I ntûma ndeerire antû ba Tiroas i bwega, ndathi bwa Macendonia. 14Amwe na kwîgua ûgu i bu kwarî, nkaatho i kîrî Ngai ûra atûûmbithagia gûcinda rîonthe tûrî ndeni ya Kîrîstû na agatûtûmîra gûtambia ûmenyo bwake gûntû kunthe bûkari ta mîtaa. 15Tiû tûkari ta mîtaa îkûrutîrwa Ngai i Kîrîstû îgîtambaga kîrî bara boonokeetue na bara baûrîîte. 16Kîrî antû bamwe i kîrumba gîa gîkuû. Îndî kîrî bangî i mûnunko ûrî mûreo ûra weyanaga mwoyo. N'ûû arî mûganu wa kûruta ngûgî îno ya ûtûmîîria? 17Tiû tûtikari ta antû baingî bara bacûaga kwona mbia na gûtûmîîria kiugo kîa Ngai. Tûtûmagîîria ntûmwa îra Kîrîstû atwete tûrî aruti ngûgî ba Ngai tûtarî na mantû mangî. Na wana Ngai naiyî ûgu.

will be added

X\