2 AKORINTHO 11

1Inkwîrîgîîra bûkainyîkagîria rîra nkwîguîka nkîaria ta kîaa, îndî ingî wabu i bu bûkûrûtha. 2Inkûbwîgua rûriitho, îndî i rûriitho rwa kîîngai. Bûrî ta mwarî ataamaama na muntû mûrûme buru, mwarîîrîîtie agûrwa i muntû ûmwe, ta we Kîrîstû. 3Îndî kîmako gîakwa n'atî meeciiria meenu maûmba kûbîtithua njîra bûgatiga kwathîkîra Kîrîstû ta bûra bûmwathîkagîra bûrî baatheru na bwîrutîîte. Bûkarûtha ûgu bûkara ta Awa ûra eeneerue na ûûme i njoka. 4Bûtionaga îrî thîîna gûtûmîîrua i muntû woora araaya mantû ma Yiesû ûngî atarî ûra twabûtûmîîrie. Na ti thîîna kwenu gwîtîgîîria Kîrundu ûngî atarî ûra bwamenyire kuumania naati. Na ti thîîna kîrî biû gwîtîgîîria ntheto îngî îtarî îra mbega bwamenyire kuumania naati. 5Ntikwona taka kûrî kîo bancindîîte na kîo babu beethûkagia barî 'atûmwa barî îgweta mûno.' 6Nwa wîgue ntikûûmba gûtarîîria mîgambo bwega, îndî ûmenyo ndî na bu. Na biû ibwoneete ûgu bwega na njîra cionthe. 7Kamaarî mabîtia kûbûtûmîîria ntheto îmbega ntakûrîwa? Kana kamaarî mabîtia nkwînyithia kaingo bûkumua? 8Rîra ndarutaga ngûgî kwenu, indeetîgagîîria nkeewa mbia i makanica mara mangî. Nwa mbuge i taka ndabaiyaga kaingo mbota kûbûtûmîkîra. 9Nkîendire gîntû rîra ndarî kwenu gûtirî we wacienu ndathîînagia. Aruayia bara baayire kuuma Macendonia ibaandeeteere bionthe bira ndarî bata na bio. Nteenda kûbwaa mûrigo na gûtirî rîo nkaabwaa uu. 10N'ûntû bwa mma ya Kîrîstû îra îrî ndeni yakwa, ga nkûbwîra, gûtirî kîo gîkaathiria gîkeno gîakwa nthîgûrû ya Akaaya yonthe. 11I kî? Ka ntabwendeete kana? Ngai naiyî imbwendeete. 12Nwa nkaathi na mbere kûrûtha ûûgû nkûrûtha îîndî n'ûntû ntikwenda kwaa 'atûmwa' babu bangî kaanya ga gwîkumia na ga kuugaga atî ngûgî yao n'îmwe na yetû. 13Baba n'atûmwa ba ûrongo na eenania beerûthîîte ta atûmwa bongwa ba Kîrîstû. 14Îndî tûtikwona bûbu ta ûntû. Wana Saitaani nwa eerûthe agakara ta mûraika wa werû. 15Kwoogu t'ûnene kwona aruti ngûgî baake beetuîkithîîtie aruti ngûgî ba wagîru. Îndî ingî mûthiani bo nwa bakeewa îkaanûkia kûringana na mantû mara ûkeegua barûthîîte. 16Ka mbwîreeni kaîrî. Gûtikaagîte muntû aanthûkia ta kîaa. Îndî wana weegua bûrîmbona ta kîo, nthikîîriani tu wata bûra bûûmba kûthikîîria kîaa gîkîaria wana niû ndîîkumie bûûkai. 17Mîgambo îra nkwaria ngîîkumia ti ya kuuma kîrî Mwathani. Rwaria rwakwa i ta rwa kîaa kîongwa. 18N'ûntû antû baingî beekumagia na mantû ma kîînthîgûrû, wana niû ka ndîîkumie. 19Na n'ûntû biû naabi bûrî baûme mûno, bûtiona ûrî mûrigo kwinyîkîria biaa! 20Bwîtîgagîîria bûgatuîkithua nkombo, kana bûgatûmîrwa, kana bûkeeneerua i woora araaya bûtakwonwa ta ûntû, kana bûkaringangwa makoobi ma ûthiû i bara babûringangaga. 21Îgi rîra nkwîgua i rîa kuuga tiû tûtikîûmba kûbûrûthîra mantû ta mamu! Îndî amwe na ûgu, muntû akagerekeeria gwîkumîria ûntû, wana niû ndeekumia. Ndîaria ta kîaa kaîrî. 22Bo n'Ayaundi? Wana niû ndî Mûyaundi. Bo n'Aiciraeri? Wana niû ndî Mwisiraeri. Bo i ba rûrîîyo rwa Îburaîmu? Wana niû ndî wa rûrîîyo rwa Îburaîmu. 23Bo n'aruti ngûgî ya Kîrîstû? Wana niû ndî mûruti ngûgî ya Kîrîstû. (Ndîaria ta muntû ûmûthûûku kîongo.) I niû ndutîîte ngûgî na inya nkûrûki yao na ndarathaîkwa nceera maita maingî nkûrûki. Ndaraturwa maita maingî nkûrûki yao, akubî nkua maita maingî. 24Maita mataano ndararingwa ibooko bira Ayaundi baringanaga mîrongo îthatû na kenda. 25Maita mathatû ndaraturwa n'Arooma na mûng'aara. Îgiita rîmwe ndararingangwa na maiga ntuîrîîtwe kûûragwa. Maita mathatû meeri îroombokana ndî ku. Na ndararaara ûtugû na mûthenya naagu îriani. 26Inthiîte ngendo inyingî ira mboneete ndî ûgwatiini bwa miuro, aamba, antû beetû bongwa ba Ayaundi, na antû batarî Ayaundi. Ndaragîa ûgwatiini kinya bwa kwîgua ndî mataûni maanene, rwanda, îriani, na ndaragîa ûgwatiini bwa aruayia batarî ba mma. 27Ndutîîte ngûgî îrî na inya na îrî mînoga. Maita maingî ntaamaamaga. Ndareegua yûûra na ndareegua bûûta. Ndarakara ntakûrîa. Ndareegua mpîo na ndaraaga nguo. 28Na kaîrî kîrî mamu monthe, ntugû cionthe ntiîgagua ndî ûmûganîre nkorooni yakwa îgûrû rîa ûmenyeeri bûra mbatîîrue kwaa makanica monthe. 29Nkoona muntû atakwîbûmba ûntûûni bûna mbîgagua taka ntakwîbûmba na niû. Muntû akeeyithua mbîgagua ûrûrû mûno nkorooni. 30Nkeegua nwa ndîîkumiirie, ngeekumia na mantû mara ntarî inya ya kûmarûtha. 31Ngai Îthe wa Mwathani Yiesû Kîrîstû, ûra riîtwa rîake rîbatîîrue rîkumagua tene na tene naiyî ntikûrongoa. 32Rîra ndarî Ndamasiki, ngabana ûra aathanaga arî rungu rwa mûnene Areta aarutire watho acikaarî baakaria mîîrîga ya taûni baangwata. 33Îndî ndeekîîrwe gîkaabûûni ndatûrithîîrua ndiricaani ya rûthingo rûra rwathiûrûkîrîte taûni ndamûtoorooka.

will be added

X\