2 AKORINTHO 10

1Inkwenda mûno bûnthikîîria, ndî ningwa, Paûrû, nkîaria na ûbooreru ta bwa Kîrîstû na kîao ta gîake. Antû bamwe baugaga ntiaragia mbûmîîrîîtie rîra twonanîîte, mbaragia mbûmîîrîîtie twatigana. 2Bwenda kwa wendi bwenu rîra nkaaya bûtikaarekeeni mbaria ta bûra mbiyî nkaarîria bara bathûgaanagia tûkari ta antû ba nthîgûrû îno. 3N'ûmma tûtûîre nthîgûrû, îndî tûtirûaga ndûa îmwe na bara barî ba nthîgûrû. 4Tûrûaga na into mwanya na bira nthîgûrû îtûmagîra kûrûa na bio. Into bira tûtûmagîra birî inya ya Ngai na nwa tûbitûmire kwomborania gûntû kunthe kûra mûnthû eebithaga. 5Twînyangagia na bio nkarari cia ûrongo, tûkomborania kîrîgîîria kîonthe kîra eekumia beekagîra antû kaingo baregana na ûmenyo bwa Ngai, na tûkagwata mathûgaania monthe tûgatûma maathîkîra Kîrîstû. 6Tûrîenda bwathîka kûrû. Itwîthuuranîrîte gûkaanûkia bonthe bara batagîtiga kûrega kwathîka. 7Biû bûraithaga bûra gîntû gîkari ome yonka. Ûkaaya kwîgua kûrî we eebîtîgîîtie n'wa Kîrîstû, namenye wana tiû tûrî ba Kîrîstû wata we. 8Mbaragia nkeneete mûno i watho bûra Mwathani atwete, ta bu watho bwa kûbûkûria na ti bwa kûbwînyangia. Kwoogu ntikwîgua rîrî îgi kuuga ûgu. 9Ntikwenda bwona taka nkwenda kûbûguayia na baarûa ciakwa. 10Bamwe baugaga, "Baarûa cia Paûrû irî ûrito na irî gîtûmi ikîthoomeka, îndî rîra tûrî n'we arî we gûtirî bu ootaga, na rwaria rwake rûtirî gîtûmi!" 11Bara baugaga ûgu babatîîrue bamenya mara twandîkaga baarûani cietû rîra tûtarî akubî matirî mûkûûrani na mara tûkaarûtha rîra ûkeegua tûrî amwe naabi. 12Wana kûroota tûtiroota twîganaanîîtie na bara beebonaga barî gîtûmi mûno. Beebîkîîrîîte kîthimi kîao bongwa gîa kwîthimaga na kîo na beeganaanagia na bara bangî baciao, kwonania bûra waa bwao bûgana. 13Îndî tiû tûtiîkumia na ûntû tûtarûthîîte. Tûgeekumîria akî ngûgî îra Ngai atwete tûruta, îra tûtambîîtie yabûkinyîîra. 14Tûtigwîkumia bûra tûtabatîîrue twîkumia bûgana, îndî i bu wîgua tûkîrûtha ûkaaya kwîgua tûtaaya n'ûntû i tiû twabûreeteere ntheto îmbega ya Kîrîstû. 15Kwoogu tika tûgwîkumia na ngûgî ya antû bangî, i ngûgî yetû tûgwîkumîria. Itûkwîrîgîîra wabûra bûkaathi na mbere gûkûra wîtîgioni, ngûgî îra tûkaaruta kwenu îkaathi na mbere kûreeta maumithio. 16Rîru i rîo tûgaatûmîîria ntheto îmbega nthîgûrû ira ingî irî mbere yenu naagu. Na ûtiîgua tûgîîkumia na ngûgî îrutîîtwe n'antû bangî gûntû kûngî. 17Îndî wata bûra Maandîko Maatheru maugîîte, "Ûra eekumagia neekumie na ûntû bûra Mwathani arûthîîte." 18Ûra eebonaga arî mwega arî wengwa t'we eetîgagîîrua. Ûra Mwathani arî we oonaga arî mwega n'we eetîgagîîrua.

will be added

X\