1 TIMOTHEO 6

1Bara barî nkombo babatîîrue boonaga anene baao baagîrîtwe beeyagwa gîtîîyo kîînene, kaingo gûtagîta we aaria ûntû bûûthûûku îgûrû rîa riîtwa rîa Ngai, kana athûûkia ûrutani bwetû. 2Nkombo ira anene ba cio barî eetîgîri itibatîîrue ibacambia n'ûntû n'eetîgîri ta bo. Bo babatîîrue kinya babatûmîkagîra bwega nkûrûki n'ûntû antû bara bateethekaga kuumania na ngûgî ciao ira babarutagîra i bara bo bongwa babeendeete n'ûntû n'eetîgîri wa ta bo. Ndîenda ûrutana na ûtûmîîria antû mantû mama. 3Ûra arutanaga kînyume kîa mantû mama, ûra atagwatanagîra na mîgambo ya mma îra Mwathani wetû Yiesû Kîrîstû augire, kana ûrutani bwa ndini yetû, 4ûyu i mwîkumia na gûtirî bu aiyî. Muntû ta ûyu arî mûtugo ûtarî mwega wa kwendaga warîonthe gûkaraga agîturanagia mbaara na kûthetanagia na antû îgûrû rîa mîgambo. Na kwoogu akareeteera antû rûriitho, matheta, irumi, kûthûgaanagîria muntû ûra ûngî neeyîîtie na ateeyîîtie, 5na matheta matarî mûthia barî na bara biongo biao biangaratanire baatigana na ûmma. Bo bathûgaanagia kwîgua muntû arî na ûngai i njîra ya gûcûa mbia, muntû atonga. 6Ûngai bûrî baita mûno muntû akîganagîrwa n'into bira arî na bio. 7Gûtirî kîo twaya na kîo nthîgûrû na gûtirî kîo tûûmba kuuma na kîo gûkû. 8Kwoogu ûkaaya kwîgua itûkwona irio bia kûrîa na tûgeekîra nguo, n'ûgu. Bibu ibibatîîrue bitûgana. 9Îndî antû bara beendaga gûtonga bagwîyaga magerioni bakagwatwa i mûtego wa wîrirîîria bwingî mûno bwa waa na bwa wînyangia bûra bûbakuuyagia mwanka mûthiani bakathirua kûrû. 10Kwenda mbia mûno i ku kuumaga mantû maathûûku monthe. Antû bamwe bagîcûa mbia ibaumîîte wîtîgioni, beenogia nkoro na kîeba kiingî mûno. 11Îndî woû, muntû wa Ngai, îbûmbe gataaria na mantû ta mamu. Ûmia wone ûrî na wagîru bwa nkoro, ûngai, wîtîgio, wendo, kûûmîîria na kwînyithia. 12Rûa ndûa îmbega ya wîtîgio bûra inya yaku yonthe îgana kaingo wîcindîra kîewa kîa mwoyo wa tene na tene ûra Ngai aagwîtîîre rîra waumbûrire wîtîgio bwaku bwega mbere ya akûûyî baingî. 13Ngai ûra eeyaga into bionthe mwoyo na Kîrîstû Yiesû ûra eeyanire ûkûûyî bwake bwega mbere ya Pontio Piraatû, ndîkwîra bakîîgagua, 14gwata ûrikie mantû mama na maathîkîre wîgue ûrî na riîtwa rîega mwanka ntugû îra Mwathani wetû Yiesû Kîrîstû agaacooka. 15Mwathani wetû agaacooka kagiita kara kaagîrîte, wata bûra kûbangîîtwe i Ngai ûra mûthaarime, ûra wenka arî inya, Mûnene wa anene, na Mwathani wa aathani. 16Ngai nwa we wenka atakuyaga. Werûûni bûra we atûûraga gûtirî muntû abuthengeera. Gûtirî muntû aamwona na gûtirî we aûmba kûmwona. Neewe gîtîîyo, arî inya îtathira tene na tene! Aameni. 17Îkaania itonga bia into bia nthîgûrû îno ûbiîre bitigeekumie. Biîre bitikaige wîrîgîîro ûtongaani, n'ûntû tûtiîgwatia ûtonga. Wîrîgîîro bwa bio ibwîgue bûrî kîrî Ngai n'ûntû n'we atweyaga into bionthe na nkoro îmbega, kaingo tûbitûmîra bitûkenia. 18Îra itonga birûthage mantû meega, bituîke itonga bia mantû meega. Bitigakûûne na ibiîgue birî na wîru bwa kwenda gûtûmagîra na antû bara bangî into bira birî na bio. 19Bikarûtha ûgu i rîo biûmba kwîbaigîra kîgîîna kîîganu kîa mûcingi ûmûriku wa ûtûûro bûra bûkaaya. Na i rîo biûmba gwîcindîra ûtûûro bûra bûrî bwa mma. 20Timotheo, menyeera bwega kîra wetwe ûkîmenyeera. Ûtigatindanîre na rwaria rwa ûtheri rûtarî rwa kîîngai, kana îtheto rîra antû bamwe baugaga n'ûmenyo na t'ûmenyo. 21Antû bamwe baugaga barî na ûmenyo bûbu, îndî i njîra ya wîtîgio babîtîîtie. Ngai arookaraga naabi.

will be added

X\