1 TIMOTHEO 5

1Ûtigaacenge mûkûrû. Aria n'we ta muntû akwaria na îthe. Aana anyi ba antû arûme bathûkagie ta aruanyûkwe 2na eekûrû baakûrû ta banyûkwe. Na aana ba aarî bathûkagie ta aaranyûkwe ûtakwîrirîîria bo nwa aniini. 3Kanica nîbatîîrue îteethia eekûrû ntigwa, bara batarî na wa kûbateethia. 4Îndî eekûrû ntigwa bara barî na aana baao, kana aana ba aana baao, aana babu mbere i baambe beerutane boonanie ûngai bwao na njîra ya gûteethia antû ba mîciî yao bongwa, kaingo barîa aciari baao na booyûe, n'ûntû ûgu i bu bûkenagia Ngai. 5Ntigwa yongwa, i mwekûrû ûra atûûraga wenka, ûra wîrîgîîro bwake bunthe bwîgagua bûrî kîrî Ngai, ûra akaraga rîonthe akîrombaga ûtugû na mûthenya. 6Îndî mwekûrû ntigwa ûra eethûngagîria mantûûni maingî, ûyu i ta ûmûkuû. 7Bamenyithie mantû mama kaingo beegue barî antû barî na riîtwa rîega. 8Îndî muntû ûra atagîteethia antû baao, na mûno mûno, antû ba mûciî wao ungwa, ûyu we i taka areganîîte na wîtîgio bwetû kîrî Kîrîstû. Na kwoogu i mûthûûkia nkûrûki ya kinya ûra atarî mwîtîgîri. 9Ntigwa îtarî na ûkûrû bwa mîanka mîrongo îthanthatû, gwîtia, înu ûtikaamîîkîre îthaabuuni rîa bara tûûmba kuuga ibakwenda ûteethio. Ûra tûûmba kuuga wabu nakwenda ûteethio nwa mwanka eegue aratûûraga arî mûka wa mûrûme ûmwe, 10na akîgwetanagîrua na mantû meega. Nwa mwanka eegue arereete aana baake bonthe bwega, na antû bonthe baaya mûciî wake akabagwataga ûgeni bwega bûra kwagîrîte. Nwa mwanka eegue atûûraga ateethagia bara barî na thîîna, na eerutîîte kûrûthaga mantû meega ma mîthemba yonthe. 11Na bara batuîkaga ntigwa barî eekûrû beethî, kinya bo ûtikaabeekîre îthaabuuni rîa ntigwa. N'ûntû rîra mîîrî yao îkeerirîîria kûgûrwa, ibakeenda kûgûrwa bantû a beepeeyana kîrî Kîrîstû, 12na ibakaagambithua n'ûntû bwa kûrega kwingia wîrane. 13Batarî baagûre bacookaga bakagîa ûthao bagatua kûriûngaga na mîciî. Batuîkaga aguutani na antû ba kwîthûngagîria mantûûni ma antû bangî bakîaragia mantû mara batabatîîrue beegua bakîaragia. 14Kwoogu ndeenda eekûrû bara barî ntigwa barî beethî bagûragwe, bagîyage na twana, na bamenyagîîre mîciî yao, kaingo anthû beetû batoona kaanya ga gûtûgweta na njîra înthûûku. 15Ndîgweta ûgu n'ûntû eekûrû ntigwa bamwe ibagarûkîîte baatua kûthingata Saitaani. 16Îndî mwekûrû mwîtîgîri ûra arî na eekûrû ntigwa mûciî wake, n'we abatîîrue abamenyeera na tikûrekeria kanica mûrigo ûyu unthe, kaingo kanica n'yo îmenyeera ntigwa ciongwa, bara batarî na muntû wa kûbateethia. 17Akûrû ba kanica bara batongoragia antû bwega ibabatîîrue bamenyagîîrwa bwega. Na mûno mûno, bara barutaga ngûgî na inya ya gûtûmîîria na kûrutana. 18Gîtûmi i kwîgua watho buugîîte ûûgû, "Ûtikaathaîke ng'ombe kanyua rîra ûkûmîtûmîra kûbûûra ngano." Na kaîrî bwauga, "Mûruti ngûgî nabatîîrue arîagwa ngûgî yake." 19Ûtikeende kûthikîîria mathitango îgûrû rîa mûkûrû, nwanga kûrî na akûûyî baîrî kana nkûrûki. 20Kaanagia bara barûthaga meeyia antû bakîîgagua kaingo babu bangî bakuthûka. 21Ngai akîîgagua amwe na Yiesû Kîrîstû na araîka bara batheru, ndîkwîra atî, ûtikaarege kûrûtha mantû mamu monthe ndakwîra ûrûthe na ûtigaatûmîre kîmenyano. Rîonthe thûkagia antû bûmwe kîrî mantû monthe mara ûkaarûthaga. 22Ûtikaugîrie rwîro kwaigîîra muntû njara ûkîmwambîîria kîrî ngûgî ya Ngai. Ûtikaagwatanîre na muntû meeyiani. Îmenyeera wagîru bwaku bwa nkoro. 23Tiga kûnyunyaga rûûyî rûûtheri runka. Înyunyaga kandibei kaniini n'ûntû bwa thîîna îra ûrû n'yo ya nda na n'ûntû bwa mbayua ira ingî ûgûkara ûkîayangagua. 24Meeyia ma antû bamwe matirî witho. I bûûrîîni marî na antû ibamoonaga. Îndî meeyia ma antû bangî mationekaga mwanka rîra makaumbûka nyumaani. 25Mantû meega i ta bu makari ûgu. Moonekaga matarî na witho. Na mara matoonekaga i makaumbûka.

will be added

X\