1 TIMOTHEO 4

1Kîrundu Ûmûtheru nagweteete bwega auga atî, ntugû cia mûthia antû bamwe bakaaragaragia wîtîgio baathîkîre irundu bia wenania na bathingate moorutani ma irundu biithûûku. 2Moorutani ta mamu maumanagia na eebwithia bara bo ngûgî yao îrî ya kwenania akî batakwîgua nkoro ciao îkîbagambithia nwa aniini. 3Antû ta babu beeraga antû batikaagûrane kana barîa irio bia mîthemba mîna. Îndî i Ngai aûmbire irio bionthe kaingo birîyagwa. Na kwoogu tiû bara tûrî eetîgîri na twiyî ûmma, tûbatîîrue tûbirîyaga tûrombeete îromba rîa gûcookia nkaatho. 4Gîntû kîonthe kîra Ngai aûmbîîte i kîega. Na gûtirî kîo kîagîrîte kûregwa gîkîîragwa ti kîega. Gîntû kîonthe kîbatîîrue kîthûkua na nkaatho 5n'ûntû kiugo kîa Ngai na îromba i bio bitûmaga gîntû gîku gîtuîka kîîtheru. 6Ûkaaya kwîgua ûgaatua kûririkanagia eetîgîri bara bangî mantû mamu watuîka mûruti ngûgî ûmwega wa Kîrîstû Yiesû, na weekûria nkûrûki gîînkoro mîgambooni înu ya wîtîgio na ya ûrutani bwa mma bûra ûthingatîîte. 7Îndî regana na ngono ira itarî cia kîîngai, kana cia ûrongo. Îthi na mbere kwîrutana gûtûûraga mûtûûrîre wa kîîngai. 8Kûrûthithia mwîrî mîceetho n'ûntû bûrî gîtûmi kîna. Îndî kûmenyeeria kûrûthaga mantû mara Ngai eendaga marûthwa i ku kûrî gîtûmi nkûrûki, n'ûntû i ku kûrî baita ûtûûrooni bûbû tûrî na bu îîndî gûkû nthîgûrû, na ûtûûrooni bûra bûkaaya nyuma ya twakua. 9Kiugo gîkî i gîa gwîtîgîka na ikîagîîrwe gwîtîgîrwa kûrû 10atî, twînogagia na kûruta ngûgî na inya n'ûntû bwa wîrîgîîro bûra tûrî na bu kîrî Ngai ûra atûîre mwoyo, ûra arî Mwonokia wa antû bonthe. Na oonokagia bara bamwîtîgagia. 11Beere nwa mwanka barûthe mantû mamu na bamarutane mo. 12Ûtikaareke muntû akûbûthia n'ûntû bwa wîthî bwaku. Îndî tuîka ngerekano îmbega kîrî bara bangî beetîgîîtie Ngai, boone kuumania na rwaria rwaku rûra waaragia, mûkarîre waku, wendo, wîtîgio na ûtheru bwaku bwa nkoro. 13Înenkanîre kûthooma Maandîko Maatheru kîrî antû, ûkîbatûmagîîria na ûkîbarutanaga mwanka rîra nkaaya. 14Ûtikaareke kîewa gîaku gîa Kîrundu Ûmûtheru kîûrîra nthî, kîra wetwe kûringana na mîgambo ya ûroria bûra bwaroriirue rîra waigîîrwe njara i kîama gîa akûrû. 15Ingia mantû mamu na înenkanîre kîrî mo, kaingo antû bara bangî bonthe bakoona nûgûkûra ndeni ya wîtîgio. 16Îmenyagîîre mûno na îthûgaanagîria mûno mantû mara ûrutanaga. Karaga ûkîathîkagîra mantû mamu, n'ûntû wamaathîkîra i rîo ûkaûmba kûmenyeera wonokio bwaku amwe na bwa antû bara bagaakûthikagîîria.

will be added

X\