1 TIMOTHEO 3

1Kiugo gîkî i gîa gwîtîgîka atî, muntû ûra eendaga gûtuîka mûtongoria wa kanica, i ngûgî îmbega mûno eegagua akîenda. 2Mûtongoria wa kanica nwa mwanka eegue arî muntû arî riîtwa rîega kîrî antû. Na nwa mwanka eegue arî na mûka ûmwe weegua agûreene, na arî muntû wa gwîkaanagia wengwa kûrûthaga mantû mataagîrîte. Nwa mwanka eegue arî muntû arî na ûtombo bûûkûrû, muntû atarî mantû. Nwa mwanka eegue arî muntû wa nkoro ya kûgwataga antû ûgeni na arî muntû aûmba kûrutana. 3Atikeegue arî muntû wa ntogoona, kana arî muntû aûmba kûringana. Neegue arî muntû ûmûbooreru na wa ûkiri. Atikeegue arî muntû wa kwenda ûtonga. 4Nwa mwanka eegue arî muntû akûûmba kûmenyeera mûciî wake bwega, na akûûmba kûrutana aana baake bagatuîka aana aathîki, bagakaraga na nthoni imbega. 5Muntû akaremwa gûtongoreeria mûciî wake bwega rî, nwa kanica ya Ngai aûmba gûtongoreeria bwega? 6Muntû atuîkîîte mwîtîgîri warîru atigaatuîkithue mûtongoria wa kanica, n'ûntû aûmba kûgîa wîkumia bûkamûûyûra, Nkoma îgatûma agiitîrwa îgamba bûûthûûku. 7Mûtongoria wa kanica nwa mwanka eegue arî muntû atîîyîîtwe i bara batarî eetîgîri, kaingo batamûcambia aaya kûgwa mûtegooni wa Nkoma. 8Ateetheeria ba atongoria ba kanica wana bo babatîîrue beegua barî antû bathûgaanagia bwega na batakari ta njoka ya mîromo îîrî. Batikeegue barî anyui ncoobi înyingî kana beerirîîria ûtonga. 9Nwa mwanka beegue barî antû barûmîîrîîte wîtîgio bûra twagwûrîîrwe, batakwîgambithia na nkoro. 10Îndî mbere nwa mwanka bagerue. Boonekana barî antû beega, rîru nwa barute ngûgî ya ateetheeria. 11Aka ba ateetheeria ba atongoria ba kanica, wana bo nwa mwanka beegue barî antû bathûgaanagia bwega. Nwa mwanka beegue batatuuyanagîîra. Na nwa mwanka beegue barî eekûrû baûmba gwîkaania kûrûtha mantû mataagîrîte. Na nwa mwanka beegue barî eetîgua mantûûni monthe. 12Mûteetheeria wa mûtongoria wa kanica nwa mwanka eegue arî wa mûka ûmwe weegua agûreene. Na nwa mwanka eegue akîûmbaga gûtongoreeria aana baake bwega, amwe na mûciî wake unthe. 13Ateetheeria bara barutaga ngûgî yao bwega ibeeceragîria riîtwa rîega na bakagîa ûûmîîria bûûnene wîtîgioni bwao ndeni ya Kîrîstû Yiesû. 14Ndîkwandîkîra baarûa îno ndî na wîrîgîîro bwa kûûya gûkwona nyuma ya kagiita gatarî karaaya mûno kuuma îîndî. 15Îndî weegua ntiiya rua bûra nkûthûgaania, baarûa îno n'ya gûkûmenyithia bûra tûbatîîrue tûkaraga tûkari tûrî antû ba kanica ya Ngai ûra arî mwoyo, n'ûntû kanica n'yo îtûmaga ûmma bwa Ngai bûrika. 16Na gûtarî kîûria, kîriga kîra tûgwûrîrîtwe gûkonia kîîngai i gîa kûrigaria. "Oonekanire arî na mwîrî ta wa muntû na Kîrundu Ûmûtheru oonania mara aaragia na mara aarûthaga maarî ma mma. Araîka ibaamwonaga. Na athingati baake baatûmîîria mantû maake kîrî antû ba mîgongo yonthe na eetîgua n'antû ba nthîgûrû yonthe. Aathûkua, eetithua îgûrû mwagooni."

will be added

X\