1 TIMOTHEO 1

1I niû Paûrû ngûkwandîkîra. Ntuîkithîîtue mûtûmwa wa Kîrîstû Yiesû i Ngai Mwonokia wetû na Yiesû Kîrîstû, wîrîgîîro bwetû. 2Ndîkwandîkîra woû Timotheo mwana wakwa wengwa ndeni ya wîtîgio. Ngai Baaba na Kîrîstû Yiesû Mwathani wetû barookwaa ûtugi, kîao na ûkiri. 3Karakara Ebeeso wata bûra ndakûûrîîtie rîra ndathiîte bwa Macendonia, kaingo wîraga antû bamwe gûku bara bakûrutana antû mantû ma ûrongo batige. 4Bakaanie ûbeere barekane na ngono inu barî na cio, na nciarwa cia ba kîûyûûyû itarî ara ithirîrîte n'ûntû mantû ta mamu mareetaga mbaara. Matiteethagia wîtîgio bwa muntû kîrî Ngai bûkûra. 5Gîtûmi kîa watho bûbû, i kaingo wîgua kûrî na wendo bûra buumaga kîrî nkoro întheru, mathûgaania magûkwonia ûtirûthîîte mabîtia, na wîtîgio bûra bûrî bwa mma. 6Antû bamwe ibaangaratanîîte bauma mantûûni mamu, baathingata njîra îra îtarî oogo ya mma ya kwaragia rwaria rwa waa. 7Barîenda gwîtuîkithia aarimû ba watho bwa Ngai, îndî wana mîgambo îra bakwaria baticiûkîrîtwe n'yo kana mantû mara bakwarîîria baûmîîrîîtie. 8Itwiyî watho i gîntû kîega bunka muntû akîbutûmagîra na njîra îra yagîrîte. 9Watho bûtirî oogo n'ûntû bwa antû bara beega. Bûrî oogo n'ûntû bwa bara babuunaga, na ndemi. Na kaîrî bûrî oogo n'ûntû bwa bara batakuthûkaga Ngai na barî na meeyia, bara batarî batheru, bara bacambagia mantû ma Ngai, bara baûragaga beethe kana bagina, na bara bonthe baûragaga bara bangî. 10Na kaîrî watho bûrî oogo n'ûntû bwa amaramari, antû arûme bara beendaga kûmaama na antû arûme bara bangî ta bo, antû bara baringaga biacaara ya kûgwata bara bangî bakabeendia barî nkombo, arongo na bara baunaga wîrane, kana bara barûthaga ûntû bûkûregana na ûrutani bwa mma. 11Ûrutani bwa mma bwonekanaga nthetooni îmbega ya Ngai ûra akaathagwa. I ntheto îrî mwago, îra ndeetîgiirue n'yo mmîtûmîîria. 12Ingûcookeria Mwathani wetû Kîrîstû Yiesû nkaatho ûra ampete inya ya kûruta ngûgî yakwa. Ndîmûcookeria nkaatho n'ûntû bwa gûmpa ngûgî îra oonire ndî mwîtîgua kûruta na antaara mmûtûmîkîra. 13Wana kinya ûkeegua mbereeni ndarî muntû wa kûmûcambagia, kûnyamaaragia athingati baake na mûbitina mûno, Ngai nambîgiirue kîao n'ûntû kagiita gaku ntaiyî ûmma na ntaarî na wîtîgio. 14I rîo Mwathani wetû aambonoreerie ûtugi bwake bwingî mûno ampa wîtîgio na wendo bûra bwonekanaga ndeni ya Kîrîstû Yiesû. 15Kiugo gîkî i gîa gwîtîgîka na ikîagîîre gwîtîgîrwa kûrû atî, Yiesû Kîrîstû aayire gûkû nthîgûrû kwonokia eeyia. Niû ndî mwîyia ûra mûnene mûno nkûrûki ya bonthe. 16Îndî Ngai nambîgiirue kîao kaingo Kîrîstû Yiesû oonania naani kûûmîîria gwake kûra gûtarî mûthia, îrî ta ngerekano nyumaani kîrî bara bangî bonthe, bara bakîmwîtîgia akabaa mwoyo wa tene na tene. 17We ûra aathanaga, atûûraga tene na tene, ûra atakuyaga kana oonwa na meetho, we ûra arî Ngai wenka akî, aroeyagwa gîtîîyo na ûkumio tene na tene! Aameni. 18Mwana wakwa Timotheo, ndîkûnenkera watho bûbû kûringana na bûra mîgambo ya ûroria yaroriirue îgûrû rîaku. Tûmîra mîgambo înu, îtuîke n'yo into biaku bia ndûa ya Mwathani, 19ûrikîîtie wîtîgio bwaku na wîgue ûrî na mathûgaania magûkwonia ûtirûthîîte mabîtia. Antû bamwe bathûûkagia wîtîgio bwao n'ûntû bwa kûrega gûtindanîra na mathûgaania ma kûûria kana weegua mantû mara barûthaga i maagîrîte kana matiagîrîte. 20Ngerekano ya antû ta babu n'Umenayas na Aregisanda. Îndî na bo imbanenkanîrîte kîrî Saitaani kaingo bathooma bamenya batiga gûcambagia Ngai.

will be added

X\