1 ATHESARONIKE 5

1Aruayia na aarayia, gûtirî na gîtûmi gîetû kûbwandîkîra tarîki kana îgiita rîra mantû mamu magaatuîkîka. 2Biû bwingwa ibwiyî atî Mwathani akaaya ta bûra mwamba aayaga ûtugû. 3Rîra antû bakuuga, "Kûrî na ûkiri gûtirî na ûgwati," rîru i rîo bakeethîîrua bathirue! Gûgaakarîka ûgu nthûti îmwe ta bûra rûgakaî rwa kûgîa na mwana rûgwataga mwekûrû ateerîgîîrîîte. Bationoka. 4Îndî biû, aruayia na aarayia, tika bûkeethîîrua bûteerîgîîrîîte ta bûra mwamba aayaga ûtugû, n'ûntû biû bûtitûûraga mwinduuni. 5Biû bwinthe bûrî aana ba werû, aana ba mûthenya. Tûtirî ba ûtugû kana ba mwindu. 6Kwoogu tûtiagîrîtwe tûmaama toro ta bara bamaami. Tûbatîîrue tûkaraga twîthuuranîrîte na twîmenyeereete. 7Bara bamaamaga, bamaamaga ûtugû. Na bara batogoonaga, batogoonaga ûtugû. 8Îndî tiû tûrî ba mûthenya. Kwoogu tûkarageeni twîthuuranîrîte, twîrigîîrie na wîtîgio na wendo ta bûra mûcikaarî eekagîra îthaga rîa kwîrigîîria atigaatonywe kîbara. Na twîrigîîrie na wîrîgîîro bwa wonokio bûrî ta nkoobia îra îîkagîrwa kîongo kûrigîîria gîtigaatonywe. 9Na ririkanaani Ngai ataatûthuura atwonia mûthûûro wake. Aatûthuurire atwonokia gûkûrûkîîra kîrî Mwathani wetû Yiesû Kîrîstû. 10Kîrîstû aakuire n'ûntû bwetû kaingo tûtûûrania n'we, nwîgue tûrî mwoyo kana tûrî baakuû rîra agaacooka. 11Kwoogu wata ûgu bûkûrûtha, îkanagîraani wîru na teethanagiani. 12Aruayia na aarayia, itûkûbûûria bweyage gîtîîyo bara babûtûmîkagîra barî atongoria beenu ndeni ya Mwathani, bara babûrutanaga njîra ya gûkara bwega. 13Ibûbatîîrue bûbatîîya na bûbeenda mûno n'ûntû bwa ngûgî îra babûrutagîra. Tûûranagiani na ûkiri. 14Na kaîrî, aruayia na aarayia, tûrîbwîra tûkîbûkinyagîîria atî, bûkaanagie bara barî athao. Îkagîraani wîru bara barî na ûguaya na teethagiani bara bakûremeerwa. Bûtikaathûûrangage n'antû na mpwî. 15Îmenyeereeni bûtikaarîithie ûthûûku na ûthûûku. Rîonthe cûûgagiani kûrûthîra bara barî bacienu na bara batarî bacienu mantû meega. 16Kenagaani magiita monthe. 17Bûtigaatige kûromba. 18Cookagîriani Ngai nkaatho mantûûni monthe, n'ûntû ûgu i bu eendaga bara barî ba Kîrîstû Yiesû barûtha. 19Bûtikoorie mwanki wa Kîrundu. 20Bûtikaathûkie ûroria ta ûntû woogu. 21Îndî thimagaani mantû mara bûkeegagua, bwîtîgîre bûra bûkeegua bûrî bwega. 22Îbathûraneeni na ûthûûku bwa mîthemba yonthe. 23Itûkûromba Ngai ûra atweyaga ûkiri abûtuîkithie baatheru na njîra cionthe. Itûkûromba atûme nkoro cienu na mîîrî yenu îkarage îtarî na mabîtia, mwanka rîra Mwathani wetû Yiesû Kîrîstû agaacooka. 24Ngai ûra abwîtîîte i mwîtîgua. Na kwoogu akaarûtha ûgu. 25Aruayia na aarayia, tûrombagîreeni. 26Keethanagiani na wendo bwa eetîgîri. 27Nwa mwanka bûthoomere eetîgîri bonthe baarûa îno. Na ndauga bûrûthe ûgu kwa riîtwa rîa Mwathani. 28Ûtugi bwa Mwathani wetû Kîrîstû Yiesû bûrookaraga naabi.

will be added

X\