1 ATHESARONIKE 4

1Îîndî, aruayia na aarayia, itûkûbûûria tûkîbûkinyagîîria kwa riîtwa rîa Mwathani Yiesû, ta bûra twabûrutanire, îthiini na mbere gûtûûra mûtûûrîre ûra ûkenagia Ngai. Tûûragaani ûgu rîonthe. 2Ibwiyî maathana mara twabûrutanire tûrî na watho bwa Mwathani wetû Yiesû. 3Ngai eendaga bûkaraga bûrî baatheru na bûtakûruta ngûgî cia ûmaramari. 4Woora ûmwe wacienu nabatîîrue eemenyeera atikaathwe i mwîrî wake. Bûbatîîrue bûkaraga bûrî baatheru na bûgîtîîyanaga. 5Bûtikeende kwathagwa i wîrirîîria bwa mwîrî ta bara bataiyî Ngai. 6Bûtikaabîtîrie bara bangî ûntûûni bûbû. Wata bûra twabûkaaniirie twabwîra, Ngai agaakaanûkia bara bonthe barûthaga meeyia ta mamu. 7Ngai atwîtîîte tûtûûraga tûrî baatheru, ti tûtûûraga tûkîrûthaga meeyia. 8Kwoogu ûra aregaga kûrûtha ûgu twîrîîtwe t'antû aregaga kwathîkîra, i Ngai ûra atweyaga Kîrundu wake Ûmûtheru aregaga kwathîkîra. 9Gûtirî na gîtûmi gîetû kûbwandîkîra tûbwîra bwendage eetîgîri bara bangî, n'ûntû biû bwingwa ibûrutanîîtwe i Ngai kwendanaga. 10I mma ibwendeete eetîgîri bonthe bara barî Macendonia. Îndî amwe na ûgu, aruayia na aarayia, ga tûbûkinyîîrie tûbwîre bûbeende nkûrûki. 11Cûûgiani bûra kûûmbîka bûtûûranagie na ûkiri. Woora muntû narute ngûgî yake, acûe biake ta bûra twabwîrire. 12Bûkarûtha ûgu bara bateetîgîîtie bakabûtîîya na bûtiîgwatia kwewa gîntû i muntû. 13Aruayia na aarayia, ndeenda bûmenya bûra gûkari kîrî eetîgîri bara bakuîte, kaingo bûteegua bûrî na kîeba ta antû batarî na wîrîgîîro. 14Twîtîgîîtie Yiesû naakuire na aariûka. Na n'ûntû naariûkire, itwîtîgîîtie kaîrî atî, rîra agaacooka Ngai akaariûkia eetîgîri bara bakuû, baayanie n'we. 15Mantû mama tûkûbwîra maumîîte kîrî Mwathani. Bara ûkeegua tûrî mwoyo rîra Mwathani agaacooka tika tûkaamûthagaana mbere ya bara bakuû. 16Rîra Mwathani akaaya kuuma îgûrû gûkeeguîka kayû ga kûruta watho, kayû ka mûraîka ûra mûnene, na ga karumbeeta ka Ngai. Na ûntû bwa mbere, i bara baakuire beetîgîîtie Kîrîstû bakaariûka. 17Baariûka, bara ûkeegua tûrî mwoyo tûthûkanîrue amwe na bo twirwe matuuni kaingo tûthi kûthagaana Mwathani maanganyoni. Na kuuma agu tûgaatûûranagia na Mwathani rîonthe. 18Îkanagîraani wîru na mîgambo înu.

will be added

X\