1 ATHESARONIKE 2

1Aruayia na aarayia, biû bwingwa ibwiyî ndiûnga yetû kwenu îtaarî ya ûtheri. 2Ibwiyî bûra twanyamaarîîte bûgana na bûra twarumangîîrwe taûni ya Piripi, mbere ya tûkinya kwenu. Îndî Ngai naatûûmîîrie twaûmba kûbûtûmîîria ntheto yake îmbega amwe na kwîgua antû baingî ibaatûkararagia. 3Kwoogu tûtitûmagîîria ûrongo, kana tûrî na mworooto ûmûthûûku, kana tûkîenda kwenania. 4Ngai atwete ntheto îmbega tûmîtûmîîria n'ûntû nooneete tûrî eetîgua. Na tûtûmagîîria tûrî na mworooto wa gûkenia Ngai ûra atûgeragia akîenda kwona bûra nkoro cietû ikari, îndî t'antû. 5Gûtirî rîo twageria kûbûnaanûkîra. Na wana biû ibwiyî ûgu. Na gûtirî rîo twabweneeria tûkîenda bûtwaa mbia cienu, Ngai i mûkûûyî. 6Na tika twendaga biû kana antû bangî batûkumia. 7Tûrî atûmwa ba Kîrîstû, itwarî na watho bwa kûbwîra bûtûteethie. Îndî tûtaarûtha ûgu. Twabûmenyagîîra ta mwekûrû bûra amenyagîîra twana twake tûra tûniini. 8N'ûntû itwabwendeete mûno, i kîo n'ûntû twaranagîria naabi mantû ma ntheto îmbega ya Ngai tûkeneete. Na nkûrûki ya ûgu, tweeruta twingwa kûbûtûmîkîra. 9Aruayia na aarayia, ibûkûririkana rîra twarî kwenu bûra twarutaga ngûgî na inya îgana. Twarutaga ngûgî mûthenya na ûtugû kaingo tûtatuîka mûrigo kîrî biû tûkîbûtûmîîria ntheto îmbega ya Ngai. 10Biû bwingwa n'akûûyî na Ngai i mûkûûyî twarî baatheru, baagîru, na tûtaarî na mantû naabi, eetîgîri. 11Na kaîrî ibwiyî twakari ta îthe wa twana na twana twake kîrî wakîra ûmwe wacienu. 12Twabwîkagîra wîru na tûkabûûmîîria tûkabwîra bwîgue bûrî ba mîkarîre ya gûtîîya Ngai ûra abwîtîîte ûneneeni bwake, ta ku mwagooni wake. 13Na kûrî na gîtûmi kîngî kîra gîtûmaga tûcookeria Ngai nkaatho. Bûkwîgua twabûtûmîîria kiugo kîa Ngai bûtaakîthûkia kiumanîîtie na muntû. Bwakîthûkiirie kîrî kiugo kîa Ngai, na wabu i gîake. Kiugo gîkî igîtûmaga bûrûtha mantû meega bara bwîtîgîîtie. 14Aruayia na aarayia, mantû mara maatuîkîkire kîrî biû nwa mo maatuîkîkire kîrî makanica ma Ngai ma Njundea marî ndeni ya Kîrîstû Yiesû. Mathîîna mara bwonire kuumania na antû beenu bongwa nwa ta mo boonire kuumania na Ayaundi. 15Ayaundi baûragire Mwathani Yiesû, iroria, na batwîngatia. Batikenagia Ngai na bakararagia muntû wonthe. 16Bacûûgagia gûtûrigîîria tûtigaatûmîîrie bara batarî Ayaundi baaya kwonoka. Rîra barûthaga ûgu ka boongagîîra meeyia maao. Îndî na rîo mûthiani mûthûûro wa Ngai nûbakinyîîrîîte. 17Aruayia na aarayia, nyuma ya tûgûtigithanua kwa îgiita rîîkai (îndî tûtaatigana gîînkoro), itweendaga mûno kûbûriûngîra. Na itwacûûgagia na inya mûno kwona kana gûkîûmbîka tûkaaya. 18Itweendaga mûno kûûya. Niû Paûrû ningwa indacûûgagia mûno îgiita na îgiita, i Saitaani aatûrigagîîria. 19Ibûtûmaga twîgua tûrî na wîrîgîîro na gîkeno. Na n'ûntû bwenu tûgaakena tûrî mbere ya Mwathani wetû Yiesû Kîrîstû rîra agaacooka. Gûtirî bangî, nwa biû. 20I mma i biû bûgaatûma twîgua tûkeneete mûno.

will be added

X\