1 PETÛRÛ 4

1Kîrîstû naanyamaariirue rîra aarî na mwîrî ta ûyû wetû. Kwoogu îbûûmagîîrieni na mathûgaanio ta mara aarî na mo. Bûra muntû oonaga kuumania na kûnyamaarua arî na mwîrî ûyû ibûtûmaga eebathûrana na meeyia. 2I kîo n'ûntû bûtabatîîrue bwathîkîra mawîrirîîria maathûûku. Ntugû cienu cionthe ira itigeere cia gûtûûra gûkû nthîgûrû bûbatîîrue bûrûtha bûra Ngai eendaga kûrûthwa. 3Ibwarî na kagiita kaaganu ga kûrûtha mara bara batarî ba Ngai beendeete kûrûtha. Ibwarûthaga mantû mataagîrîte, ibwathîkagîra mawîrirîîria maathûûku, ibwatogoonaga, ibwathiyaga biathooni bitaagîrîte na ibwagongaga mîbuanaano kînyume na watho bwa Ngai. 4Bara batarî ba Ngai boonaga bûrî ûntû bwa kûrigaria rîra bûregaga kûrûtha mantû maathûûku mara barûthaga. Na gîku i kîo n'ûntû babûrumangaga. 5Bakaagambithua i Ngai îgûrû rîa mantû mara ûkeegua barûthîîte. Ngai neebanganîîtie kûgiitîra îgamba bara barî mwoyo na bara bakuû. 6Na gîku i kîo n'ûntû ntheto îmbega yatûmîîrue kinya kîrî antû bara baakuire. Baatûmîîrue kaingo baakua kîîmwîrî ta bûra bûrî wîthîre bwa antû gûkua, batûûrania gîîkîrundu amwe na Ngai. 7Mûthia wa mantû monthe ûkûthengeera. Kwoogu menyagîîraani meeciiria meenu. Karagaani bûkîthûgaanagia bwega kaingo bûûmba kûromba Ngai. 8Na nkûrûki ya mantû monthe îthiini na mbere kwendana mûno n'ûntû wendo ibûkunîkagîra meeyia maingî. 9Gwatanagaani ûgeni bûtakûnung'una. 10Woora ûmwe wacienu eetwe kîewa mwanya na ûra ûngî agîtûmîra gûteethia bara bangî. Tûmîkagîraani bara bangî bûrî aruti ngûgî eetîgua ba biewa bira Ngai atwete kuumania na ûtugi bwake. 11Weegua muntû eetwe kîewa gîa kwaria, neerage antû biugo bia kîîngai. Na weegua muntû eetwe kîewa gîa gûteethia bara bangî, nateethanie na inya îra Ngai amwete. Mantû monthe mabatîîrue marûthwa na njîra îra îgaatûma Ngai akumua gûkûrûkîîra kîrî Yiesû Kîrîstû. Mwago na inya ya Ngai biroonekaga tene na tene. Aameni. 12Eendwa, bûtikaarigarueni i kûnyamaarua gûku kûnene ûgu gûkûgeria wîtîgio bwenu. Bûtikoone ta ûntû bûûgeni bûgûkarîka kîrî biû. 13Kenagaani bwona ûgu, n'ûntû ûgu i ta kwonania bûrî kîmwe na Kîrîstû kûnyamaaruani gwake kaingo bûkena mûno rîra akaaya yîya rîa maîrî arî na mwago wake. 14Muntû agakûruma n'ûntû bwa bûra ûrî Mûkîrîstû, thûkagiani gîku kîrî kîthaarimo n'ûntû i ta kwonania Kîrundu ûra arî mwago, Kîrundu wa Ngai, arî naabi. 15Gûtikeegue kûrî na wacienu akaanyamaarua n'ûntû bwa kwîgua i mûûragani kana i mwamba. Kana anyamaarua n'ûntû bwa kwîgua i muuni watho, kana n'ûntû bwa kwîthûngîîria mantûûni ma antû. 16Îndî t'îgi muntû kûnyamaarua n'ûntû bwa kwîgua i mûthingati wa Kîrîstû. Kumia Ngai n'ûntû bwa kûgwetanîrua na riîtwa rîru. 17Kagiita i gaakinyu ga kûgiitîrwa îgamba. Na bara barî ba Ngai i bo bakaanjîîria. Na waya kwîgua tiû eetîgîri i tiû tûkaanjîîria kûgiitîrwa îgamba rî, î bara bataathîkagîra ntheto îmbega ya Ngai bûrîthûgaania rîao rîkaagiitwa ata? 18Kwandîkîîtwe Maandîko Maatheru, "Ûkaaya kwîgua bûrî inya muntû ûmwagîru kwonokua rî, î bara batarî ba Ngai na eeyia tuuge ata bwao?" 19Kwoogu bara banyamaaragua kuumania na kwenda kwa Ngai babatîîrue banenkanîra mîoyo yao kîrî Mûûmbi mwîtîgua na bathi na mbere kûrûtha mantû meega.

will be added

X\