1 PETÛRÛ 2

1Kwoogu bûtigaacooke kûrombeeria bara bangî mantû maathûûku kana bwenania. Rûthagaani mantû bûtakwîbuithia. Bûtigaatuîke antû ba rûriitho kana bwaria mantû maathûûku îgûrû rîa antû bara bangî. 2Kwendekanaga kaana kaniini gakundua îria kaingo gakûra. Naabi kaingo bûkûra [bwonokua], bûbatîîrue bwendaga gûkundua îria rîîtheru, ta rîo kiugo kîa Ngai. 3I mma ibûcamîîte bweegua bûra Mwathani arî kîao kîgana! 4Ncûûni kîrî Yiesû Kîrîstû. We n'iiga rîrî mwoyo rîra rîaregirwe n'antû bakîonaga rîtarî na gîtûmi. Îndî Ngai aarîtaarire rîrî rîa gîtûmi kîînene mûno. 5Wana biû bûrî maiga marî mwoyo. Ngai arîbûtûmîra gwaka nyomba întheru ya gîîkîrundu. Gûku nyomba înu i ku bûkaamûgongagîra na i ku bûkaamûrutagîra ngûgî bûrî athînjîri baake baatheru. Bûkaamûrutagîra igongwana bia gîîkîrundu gûkûrûkîîra kîrî Yiesû Kîrîstû akabiîtîgîîria. 6Kwandîkîîtwe Maandîkooni Maatheru, "Ga nkûbwîra, nkaiga iiga rîa koona Kîrîmaani gîa Cayûni. Na iiga rîru i rîo rîthuurîîtwe i Ngai. Rîrî gîtûmi kîînene mûno. Ûra akaarîîtîgia rîtimwîkîrithia nthoni." 7Biû bara bwîtîgîîtie iiga rîrî, ta rîo Kîrîstû, ibwiyî rîrî gîtûmi kîînene mûno. Bara bataathîkaga ibamenye atî, "Iiga rîra rîaregirwe n'aaki, îîndî i rîo rîtuîkîîte rîa koona." 8Kaîrî kwandîkîîtwe Maandîkooni Maatheru, "Antû baingî bagaatiira iiga rîru bataratare bagwe." Antû batarataraga n'ûntû bwa kûrega kwathîkîra kiugo kîa Ngai. Na ûgu i bu Ngai aababangîîre. 9Îndî biû bûrî bara Ngai athuurîîte. Bûrî athînjîri ba mûciî wa ûnene wa Ngai. Bûrî antû baatheru bara Ngai atuîkithîîtie antû baake ba mwanya. Ngai aabûthuurire bwîra antû bûra wega bwake bûgana. N'we aabwîtire bwauma mwinduuni bwaya werûûni bwake bwa kûrigaria. 10Kûrî rîo bûtaarî antû ba Ngai, îndî îîndî bûrî antû baake. Na kûrî rîo bûtaakinyagîrwa i kîao kîa Ngai, îndî îîndî ikîbûkinyîîrîîte. 11Eendwa, nthîgûrû îno bûkari ta ageni. Kwoogu ka mbûkaanieni. Bûtikaarûthe mantû maathûûku mara mîîrî yenu yendaga kûrûtha, mara marûaga na bûra mîoyo yenu yendaga. 12Menyagîîraani mûkarîre wenu kîrî bara bateetîgîîtie Ngai. Baûmba kûbûtuîrîîra bakauga ibûrûthîîte mantû maathûûku. Îndî bakaaya kwona bûrûthaga mantû meega bagaakumia Ngai ntugû îra antû bonthe bakaagiitîrwa îgamba. 13N'ûntû bwa Mwathani, înyithagieni kîrî bonthe bara barî na watho bwa kwathana. Înyithagieni kîrî Mûnene wa bonthe 14na kîrî aniini baake. Aniini ba mûnene i Mûnene abathuuraga. Kwoogu barî na watho bwake bwa gûkumia bara aathîki na gûkaanûkia bara baunaga watho. 15Ngai eendaga bûrûtha mantû meega kaingo bûtûma bara baaragia waa batiga kwaria mantû maataku îgûrû rîenu. 16Bûtigaakare ta nkombo cia wîyia. Îndî amwe na kwîgua bûtirî nkombo, menyaani bûbu bûtûma bûrûtha ûthûûku. Tûûragaani bûrî nkombo cia Ngai. 17Tîîyagaani antû bonthe, na mûno mûno, mûnene. Endagaani eetîgîri bara bangî na kuthûkagaani Ngai. 18Biû bara bûrî nkombo înyithagieni kîrî anene beenu bara bûrutagîra ngûgî. Tîîya mûnene waku mûno, nwîgue n'ûmwega na arî kîao kana n'ûmûthûûku. 19Nwa ûthîînue mana gûtarî bu ûrûthîîte. Îndî ûkaûmîîria n'ûntû bwa gûkîra Ngai, Ngai agaakena i woû. 20Gûtirî gîtûmi gîa gûkumia kûûmîîria kwa muntû ûkaaya kwîgua arîûmîîria îkaanûkia akaanûkîîtue n'ûntû bwa kûrûtha mabîtia. Îndî ûkaaya kwîgua muntû arîûmîîria îkaanûkia eetwe rîo gûtarî mabîtia arûthîîte, bûbu n'ûntû bwa gûkaathîrwa i Ngai. 21Ngai abwîtîîte bûûmagîîria mathîîna n'ûntû Kîrîstû nanyamaariirue n'ûntû bwenu arî ngerekano yenu ya kûthingata kaingo bûrûtha bûra aarûthire. 22Ateeyia kana aaria ûrongo. 23Aarumwa ataarumaga bara baamûrumaga. Na aanyamaarua ataugaga akoonia ûntû babu baamûnyamaaragia. Eenenkanagîra kîrî Ngai ûra agiitaga îgamba na njîra ya mma. 24Kîrîstû naathûkiirie meeyia meetû na mwîrî wake arî we rîra aakuire mûtharabaani kaingo tûkua kîrî meeyia, tûtûûra tûkîrûthaga mantû mara maagîrîte. Bworeetue kuumania na gûtonyangwa kûra Kîrîstû aatonyangirwe. 25Kûrî rîo bwakari ta ng'ondu ciûrîîte. Îndî îîndî ibûcookeete kîrî Mûrîîthi wenu, ta we Mûmenyeeri wa mîoyo yenu.

will be added

X\