1 PETÛRÛ 1

1I niû Petûrû, mûtûmwa wa Yiesû Kîrîstû nkûbwandîkîra. Ndîbwandîkîra biû bûtûûraga ûgeniini bûnyageere gûntû mwanya mwanya--Pontas, Garatia, Kapandokia, Îcia na Bithunia. 2Bwathuurirwe i Ngai Baaba wetû wo tene kûringana na yerekeeria rîake, bwathûrua i Kîrundu wake kaingo bwathîkîra Yiesû Kîrîstû na bûtherua i nthakame yake. Ngai aroobwongeera ûtugi na ûkiri. 3Ga tûkumie Ngai Îthe wa Mwathani wetû Yiesû Kîrîstû. N'ûntû bwa bûra arî kîao mûno naatûmire tûciarwa îciarwa rîa maîrî kaingo atwa wîrîgîîro bwa mma bwa mwoyo wa tene na tene na njîra ya kûriûkia Yiesû Kîrîstû. 4Na wîrîgîîro bwetû i rûgai rûra rûtaûmba kwînyangîka, kûthûûka, kana kûthira. Na rûgai rûru bwaigîrîtwe ru îgûrû. 5Bûmenyagîîrwa n'inya ya Ngai gûkûrûkîîra kîrî wîtîgio bwenu mwanka rîra bûkeewa wonokio bûra akûbûthuuranîra akaabwonia bu îgiita rîa mûthia. 6Kwoogu keneeraani ûgu wana weegua îîndî nwa mwanka kwa îgiita rîîkai bûnyamaarue i magerio ma mîthemba mwanya mwanya. 7Gîtûmi kîa magerio mamu i kûthima wîtîgio bwenu kaingo bûmenyeka kana i wîtîgio bwa mma. Wîtîgio bwenu bûgeragua ta thaabu bûra îkembûragwa na mwanki. Îndî wîtîgio bwenu i bu bûrî gîtûmi mûno nkûrûki ya thaabu. Wîtîgio bwenu bwooneka i bwa mma ûkeegua kûrî na ûkumio, mwago, na gîtîîyo rîra Yiesû Kîrîstû akoonanua. 8Ibwendeete Yiesû Kîrîstû wana kinya ûkeegua bûtaamwona. Na wana ûkeegua bûtimwonaga ibûmwîtîgîîtie na ibûkenaga gîkeno kîrî mwago. Gûtirî mîgambo ya kûganîîra yoneka ya kuuga bûra gîkeno kîenu gîkari. 9Na mûthiani maumithio mara bûkoona n'ûntû bwa gwîtîgia Yiesû Kîrîstû i wonokio bwa mîoyo yenu. 10Tene iroria ibiaroriirie mantû ma wonokio bûra Ngai akaabwaa na ûtugi bûra akaabwonia, mantû birî bio biacûaga kûmenya na njîra cionthe. 11Biendaga kûmenya bûra wonokio bûkaayanga na rîra gûkeegua kûrî. Kîrundu wa Kîrîstû ûra aarî kîrî bio n'we aaragia mantû mamu, aaroria mantû ma kûnyamaarua gwa Kîrîstû na mwago ûra akeegua arî na uu nyuma ya kûnyamaarua. 12Iroria biagwûrîîrwe bionua ngûgî îra biarutaga yarî ya kûbûguna, îtaarî ya kûbiguna birî bio. Na îgiitaani rîrî tûrî ibwîrîîtwe mantû mama i bara baabûtûmîîrie ntheto îmbega kwa inya ya Kîrundu Ûmûtheru ûra aatûmirwe kuuma îgûrû. Mantû mama i ma kûrigaria mûno. Wana araîka ba Ngai ibeendaga kûmamenya. 13Kwoogu îthuuranîreeni mathûgaaniani meenu. Îmenyagîîreeni na gûtarî ûntû bûngî bwîgwetie îrîgagîîraani kwewa kîewa gîa ûtugi rîra Yiesû Kîrîstû akoonanua. 14Karagaani ta aana aathîki ba Ngai. Bûtigaacookere mîkarîre îra bwarî n'yo mbereeni rîra bwathingataga mawîrirîîria meenu maathûûku rîra bûtaiyî Ngai. 15Îîndî îgaguani bûrî baatheru mantûûni monthe mara bûkaarûthaga, ta bûra Ngai ûra aabwîtire arî ûmûtheru. 16Kwandîkîîtwe Maandîkooni Maatheru, "Îguani bûrî baatheru n'ûntû ndî ûmûtheru." 17Ûkoona bûrombaga Ngai bûkamwîta Baaba, Ngai ûra agiitagîra muntû wonthe îgamba kûringana na bûra arûthîîte gûtarî we akwendeera, karagaani bûkîmûkuthûkaga gûkû ûgeniini. 18Bûmenye Ngai aabûgûrire abûkûûra bwauma mûtûûrîreeni ûtarî ara warî, ûra bwerutanîîte kuumania na biûyûûyû bienu. Na ataabûgûra na gîntû gîtaûmba gûtûûra tene na tene ta fetha kana thaabu. 19Aabûkûûrire na nthakame ya goro ya Kîrîstû. Kîrîstû aarî ta kagondu gatarî ûthûûku. 20N'we Ngai aathuurire mbere ya nthîgûrû yûmbwa. Na îgiitaani rîrî tûrî tûgwûrîrîtwe we n'ûntû bwenu kaingo abwonokia. 21Bwîtîgîîtie Ngai gûkûrûkîîra kîrî Kîrîstû. Ngai aamûriûkiirie amwaa mwago. Kwoogu wîtîgio bwenu na wîrîgîîro bwenu bûrî kîrî Ngai. 22Na n'ûntû îîndî ibwîthereetie na njîra ya kwathîkîra ûmma, nwa bwende eetîgîri bara bangî na wendo bwa mma. Kwoogu endanagaani mûno na nkoro yonthe, 23n'ûntû ibûciarîîtwe îciarwa rîa maîrî. Na mwoyo ûra bûrî na uu îîndî ûtiumanîîtie na gîntû kîûmba gûkua. Uumîîte kîrî gîntû gîtakua. Na kîo i kiugo kîa Ngai kîra gîtûûraga na gîtathira rî kana rî. 24Na wata bûra kwandîkîîtwe Maandîkooni Maatheru, "Mwîrî wa muntû ûkari ta nyaki. Mwago unthe muntû arî ûkari ta wa maûa. Nyaki yaûma maûa imaûrûrûkaga. 25Îndî kiugo kîa Mwathani kîo gîgaatûûra tene na tene." Na kiugo gîku i ntheto îmbega îra bwatûmîîrue.

will be added

X\