1 NJOANA 4

1Eendwa, bûtigeetîgagie irundu bionthe bira birî na antû. Ambagaani bûkabigeria bûkoona kana i bia Ngai, n'ûntû iroria biingî bia ûrongo ibiumîrîte nthîgûrû. 2Ûûgû i bu tûûmba kûmenya muntû arî na Kîrundu wa Ngai. Ûra augaga Yiesû aayire arî muntû, Kîrundu ûyu n'wa Ngai. 3Îndî kîrundu kîonthe kîra kîugaga Yiesû ataaya arî muntû, kîrundu gîku gîtiumîîte kîrî Ngai. Kîumîîte kîrî mûregi Kîrîstû ûra bwiyî akaaya, na îîndî ûûgû arî gûkû nthîgûrû. 4Îndî biû, aana, bûrî ba Ngai, na ibûbacindîîte n'ûntû Ngai ûra bûrî n'we n'ûmûnene kîrî ûra arî nthîgûrû. 5Iroria bibi bia ûrongo biaragia mantû ma nthîgûrû n'ûntû i bia nthîgûrû, na i ntûma antû ba nthîgûrû babithikagîîria. 6Îndî tiû tûrî ba Ngai. Bara bamwiyî ibatûthikagîîria. Bara batamwiyî batitûthikagîîria. Ûgu i bu tûûmba kûmenya Kîrundu wa mma na kîrundu kîa ûrongo. 7Eendwa, twendanageeni n'ûntû wendo buumaga kîrî Ngai. Ûra eendanaga i mwana wa Ngai na naiyî Ngai. 8Ûra ateendanaga atiyî Ngai, n'ûntû Ngai i wendo. 9Ngai naatwoniirie wendo bwake na njîra ya gûtûma Mwana wake wa kîmoomwe nthîgûrû, kaingo twona mwoyo n'ûntû bwake. 10Na wendo bûbû bûkari ûûgû. Ti tiû tweendire Ngai, îndî i Ngai aatwendire aatûma Mwana wake atuîka kîgongwana gîa gûtûma tûrekagîrwa meeyia meetû. 11Eendwa, weegua i bu Ngai aatwendire ûgu na tiû itûbatîîrue twendanaga. 12Gûtirî muntû oona Ngai. Îndî ûkeegua tûkeendanaga twingwa, Ngai nakaraga ndeni yetû na wendo bwake ibûtûûyûraga. 13Tûmenyaga tûrî ndeni ya Ngai na Ngai arî ndeni yetû n'ûntû natwete Kîrundu wake. 14Itwoneete na itûkûûyagîîra atî Baaba naatûmire Mwana wake atuîka Mwonokia wa nthîgûrû. 15Ûra augaga Yiesû i Mwana wa Ngai, Ngai nakaraga ndeni yake na n'we nakaraga ndeni ya Ngai. 16Na tiû twingwa itûmenyeete na itwîtîgîîtie wendo bûra Ngai atwendeete na bu. Ngai i wendo. Ûra akaraga wendooni akaraga ndeni ya Ngai na Ngai nakaraga ndeni yake. 17Wendo bûûyûragua ndeni yetû kaingo tûûmba kûrûngama tûtarî na ûguaya mûthenya wa kûgiitîrwa îgamba n'ûntû ûtûûro bwetû gûkû nthîgûrû bûkari ta bwa Kîrîstû. 18Wendo bûtirî ûguaya. Wendo bwa mma ibûrûngagia ûguaya. Kwoogu muntû ûra arî na ûguaya, wendo bwake ti bwa mma n'ûntû ûguaya i bwa îkaanûkia. 19Twendeete Ngai n'ûntû n'we aatwendire mbere. 20Ûra augaga neendeete Ngai na athûîre eetîgîri bara bangî n'ûrongo aaragia, n'ûntû atiûmba kwenda Ngai ûra atoona, îndî amena mwîtîgîri ûra oonaga. 21Yathana rîra Kîrîstû atwete i rîrî--ûra eendeete Ngai nwa mwanka eende mwîtîgîri ûra ûngî.

will be added

X\