1 AKORINTHO 16

1Îîndî ka ngwete mantû ma kweyaga antû ba Ngai mwothi. Bûbatîîrue bûrûthaga ta bûra ndeerire makanica ma Garatia marûthage. 2Wakîra ntugû ya mbere ya kwanjîîria kiumia, wakîra ûmwe wacienu nabatîîrue aiga mbia igana ûna bantû kûringana na bûra athaarimîîtwe bûgana. Ciaigeeni irî cia mwothi ûyu ndabûgwetera kaingo rîra nkaaya ciîgua i rîo na tene. 3Ndaaya ngaatûma bara bûkoona baagîrîte baire mwothi wenu Njerusaremu. Nkabaandîkîra baarûa cia kûbamenyithania kîrî bo. 4Na twona bûrî bwega na niû nthi, nwa tûthiyanie na bo. 5Mbangîîte mbûyîîre Macendonia. Kwoogu nkaaya kwenu mbumîîte noogo. 6Kwaûmbîka ngaakarakaranga kwenu wana kinya kagiita ga mpîo konthe. Na rîra ngaakara kûthi wanaara ûkeegua nthiîte, nwa bûmbumagarie. 7Ntikwenda mbûya kûbwona nkûrûkanîîtie. Ndîenda nkara kwenu kagiita kaaganu, weegua Mwathani ageetîgîîria. 8Îndî ngaakara naaga Ebeeso mwanka kagiita ga kîatho gîa ntugû ya Pentekosti gîkinye. 9Inkwona mwanya wa kûruta ngûgî inyingî naaga, wana kinya ûkeegua i baingî bakûrûa naani. 10Timotheo akaaya kûûya naagu bwone bûkûmûgwata ûgeni bwega aaganîrwa kwîgua arî amwe naabi, n'ûntû i Mwathani akûrutîra ngûgî ta bûra na niû nkûmûrutîra. 11Bûtikaareke muntû amûmeneeria. Aakara gûcooka bûmuumagarieni na ûkiri acooke kaîrî kîrî niû. Ndîîrîgîîra aayania na aruayia babu barî naagu. 12Îgûrû rîa mûruayia Apooras, ndamûkinyîîrie ndamwîra aayanie na aruayia bara baayîîte, îndî atireenda kûûya îîndî. Akaaya rîra akeegua arî na kaanya. 13Îkaragaani bwîmenyeereete. Karagaani bwîrikîîtie wîtîgioni bwenu, bûrî na kûûmîîria na bûrî na inya. 14Bunthe bûra bûkaarûthaga, bûbatîîrue bûburûthaga bûrî na wendo. 15Ibwiyî Stebanas na antû ba mûciî wake i bo antû ba mbere nthîgûrû ya Ngiriki gûtuîka eetîgîri, na ibeerutîîte kûrutîra antû ba Ngai ngûgî. Ndîenda kûbwîra, aruayia na aarayia, 16bwîtîgagîîrie bûgaatongoragîîrua n'antû ta baba na muntû wonthe ûra arutanagîria na bo ngûgî îno îrî inya ûûgû. 17Inkeneete mûno n'ûntû Stebanas, Botunatas, na Akaikas ibarakinyire. I bo baingîîte kaanya keenu. 18Ibaambîkîrîte wîru bûûnene mûno ta bûra na biû baabwîkîîre. Bathûkagieni barî antû ba gîtûmi. 19Bûgûkeethua i makanica ma gîteere gîa Îcia. Akuira barî na Pirisiira, na eetîgîri bara barîîkanaga kwao bakûbûkeethia mûno riîtwaani rîa Mwathani. 20Aruayia na aarayia bara barî naaga bonthe wana bo bakûbûkeethia. Keethanagiani na wendo bwa eetîgîri. 21I niû Paûrû ndî ningwa mbwandîkîrîte nkeethi ino na njara ciakwa ningwa. 22Ûkaaya kwîgua kûrî na muntû ateendeete Mwathani, ûyu n'ûmûrume i Ngai. Mwathani arooya na mpwî. 23Ûtugi bwa Mwathani Yiesû Kîrîstû bûrookaraga naabi. 24Wendo bwakwa bûrookaraga naabi bwinthe ndeni ya Kîrîstû Yiesû.

will be added

X\