1 Îîndî na rîo, aruayia na aarayia, ndîenda kûbûririkania mantû ma ntheto îmbega îra ndabûtûmîîrie bweetîgia, ntheto îra bûrikîîtie wîtîgio kîrî yo. 2 Na ntheto îno îmbega îgaatûma bwonokua weegua bûkaathi na mbere na kûthingata ûrutani bûra ndabûrutanire. Îndî ûkeegua bûtibûthingataga, wîtîgio bwenu i bwa ûtheri. 3 Ndabwîrire mantû mara ndeerirwe. Na bûra bûrî gîtûmi kîra kînene kîrî mara ndabwîrire, n'atî Kîrîstû aakuire n'ûntû bwa meeyia meetû, wata bûra kwandîkîîtwe Maandîkooni Maatheru. 4 Aathikirwe îndî aariûka ntugû ya ithatû wata bûra kwandîkîîtwe Maandîkooni Maatheru. 5 Na akûriûka muntû wa mbere kûmwona aarî Kebas, rîru atûmwa bara bangî îkûmi na baîrî. 6 Nyumaani kaîrî oonwa n'athingati baake nkûrûki ya magana mataano. Baîngî ba athingati babu wana îîndî barî mwoyo, îndî bamwe batirî mwoyo. 7 Îgiitaani rîngî kaîrî oonwa i Njakubu na nyumaani oonwa n'atûmwa bara bangî bonthe. 8 Mûthiani buru eebonaniirie kîrî niû, taka niû ndaciarirwe kagiita kara gataagîrîte. 9 I niû mûniini kîrî atûmwa bara bangî. Ntiagîrîtwe wa gwîtwa mûtûmwa n'ûntû indanyamaaragia antû ba kanica ya Ngai. 10 Îndî n'ûntû bwa bûra ûtugi bwa Ngai bûgana, îîndî i niû ûyû. Kwoogu ûtugi bûra aamboniirie bûtaarî bwa ûtheri. Ndarutire ngûgî na inya mûno nkûrûki ya atûmwa bara bangî bonthe ndabacinda. Îndî ingî ti niû na bwakwa, n'ûtugi bwa Ngai bwarutaga ngûgî naani. 11 Kwoogu nwîgue i niû ndabûtûmîîrie kana n'atûmwa bara bangî, twinthe tûtûmagîîria ntûmwa weeno îmwe, ntûmwa îra bwîtîgîîtie. 12 N'ûntû tûtûmagîîria atî Kîrîstû naariûkire auma kîrî bara bakuû, i kî n'ûntû bamwe beenu baugaga antû bara bakuû batiiriûkua? 13 Weegua bara bakuû batiiriûkua, wana Kîrîstû ataariûka ni. 14 Na weegua Kîrîstû ataariûka, ntûmîîri yetû n'ya ûtheri, na wana wîtîgio bwenu i bwa ûtheri. 15 Na kaîrî ka wîgua tiû, tûrî atûmwa, tûkîrongoera Ngai n'ûntû tuugaga i Ngai aariûkiirie Kîrîstû na ataamûriûkia, yîî ingî weegua wabu bara bakuû batiiriûkua. 16 Ûkaaya kwîgua bara bakuû batiriûkua, wana Kîrîstû ataariûkua ni. 17 Na ûkaaya kwîgua Kîrîstû ataariûkua, wîtîgio bwenu i bwa ûtheri na bûtaarekerwa meeyia meenu. 18 Na kaîrî ûgu i ta kwonania eetîgîri bara baakuire beetîgîîtie Kîrîstû, ûyu n'uu mûthia wao. 19 Ûkaaya kwîgua wîrîgîîro bûra tûrî na bu na Kîrîstû i bwa ûtûûro bûbû akî, tûbatîîrue antû batwîgua kîao mûno nkûrûki ya antû bara bangî bonthe. 20 Îndî ûmma n'atî, Kîrîstû nariûkiirue auma kîrî bara bakuû. N'we wa mbere arî ta ûmwe wa maketha maingî ma bara bakaariûkua. 21 Wata bûra gîkuû kîayire n'ûntû bwa bûra muntû ûmwe aarûthire, nwa ta bu kûriûkua kwîgagua kûrî oogo n'ûntû bwa muntû ûmwe. 22 Na wata bûra antû bonthe bakuyaga n'ûntû bwa kwîgua barî ndeni ya Andamu, nwa ta bu antû bonthe bakaariûkua bara bakuyaga barî ndeni ya Kîrîstû. 23 Îndî mûbango n'atî Kîrîstû ariûkue mbere. Na rîra agaacooka kaîrî rîru bara barî baake na bo bariûkue. 24 Rîra gûgaakarîka ûgu, ûyu n'uu ûgaatuîka mûthia. I rîo Kîrîstû agaatigithia aathani bonthe wathani bwao, athirie wathani bunthe, na inya ya wathani bunthe, anenkere Îthe Ngai ûnene, 25 n'ûntû nwa mwanka aathane mwanka acinde inya ya anthû baake. 26 Mûnthû wa mûthia gûcindwa akeegua arî gîkuû. 27 Maandîkooni Maatheru kwandîkîîtwe, "Ngai naamwere watho bwa kwathaga bionthe." Rîra Maandîko Maatheru maugaga "bionthe" birî wathaniini bwa Kîrîstû, gûtirî na nkanja kuuga ûgu ti kwonania na Ngai mwene neebîkîrîte rungu rwa Kîrîstû. Ngai n'we aatûmire bionthe biathagwa i Kîrîstû. 28 Rîra bionthe ûkeegua birî wathaniini bwake, Mwana akeendama rungu acooke wathaniini bwa Îthe ûra aamwere bionthe abiathaga. Na rîru Ngai i rîo akeegua arî bionthe kîrî bionthe. 29 Ûkaaya kwîgua bara bakuû batiiriûkua rî, i kî n'ûntû antû babaatithagua n'ûntû bwa bara bakuû? Ûkaaya kwîgua wabu bara bakuû batiiriûkua wana gûkari ata rî, i mbi îtûmaga antû babaatithua n'ûntû bwa baakuû? 30 Na i kî naati n'ûntû twîbîkagîra ûgwatiini thaa cionthe? 31 Mbîgagua ndî ûgwatiini bwa kûûragwa ntugû cionthe. Na ûgu i bu kûrî. Nwa ta ûmma bwa gûkena kûra bûnkenagia ndeni ya Mwathani wetû Yiesû Kîrîstû. 32 Rîra ndarûaga na nyamû ira cia kîthaka cia Ebeeso rî, ûkeegua nwa ûtûûro bûbû bwa kîînthîgûrû ndîgwetie, i baita mbi ndoonaga weegua bara bakuû batiiriûkua? Ûkeegua gûtirî kûriûkua, ga tûrîeni ni na kûnyua tûnyue twîkenie n'ûntû tika tûgaatûûra oogo. 33 Muntû atikaabwenie, muntû arî mûkarîre ûmwega agatua gûkaranagia na muntû atarî mûkarîre ûmwega, akûthûûka. 34 Îciûkîrwaani bûtige kwîyia. Bamwe beenu na Ngai batiiyî. Ndiuga ûgu kûbwîkîrithia nthoni. 35 Waûmba kwîgua muntû akîûria, "N'ata muntû ûmûkuû aûmba kûriûkangua? Arîo rî, aariûkua akeegua arî wa mwîrî ûkari ata?" 36 Ûrî ûmûtaku! Ka ûtaiyî ûkaanda mpîndî nwa mwanka îkue yandwa mûthetuuni mbere yuma, 37 na kîra kîandagwa i mpîndî ti kîmera kîra îkauma. I gapîndî tu kandagwa, kwa ngerekano ta ka ngano kana ga gîntû kîngî. 38 Ngai n'we aûmbagîra mpîndî mwîrî wa kîmera kîra amîbangîrîte. N'we eeyaga wakîra mûthemba wa mpîndî mwîrî wa kîmera kîa yo kîra îkauma. 39 Na wana kinya nyamû cionthe itirî mûthemba ûmwe wa nyama. Antû barî mûthemba mûna wa nyama, nyamû na cio irî wa cio, nyoni irî wa cio, na makûyû na mo marî wa mo. 40 Kaîrî kûrî na mîîrî ya biûmbe bia îgûrû na ya biûmbe bia nthîgûrû. Îndî ûthongi bwa mîîrî ya biûmbe bia îgûrû bûrî mûkûûrani na ûthongi bwa mîîrî ya biûmbe bia nthîgûrû. 41 Riûa rîrî ûthongi bwa rîo, mweri ûrî ûthongi bwa uu, na nthata irî ûthongi bwa cio. Na wakîra nthata îtibuanene na nthata îra îîngî. 42 Kûriûkua kwa bara bakuû i kwa njîra ta înu. Mwîrî ûra ûthikagwa mûthetuuni nworaga. Îndî mwîrî ûra ûkaariûkua ûgaatûûra tene na tene. 43 Mwîrî ûkithikwa ûthikagwa ûtarî na mwago na ûtari na inya. Îndî rîra ûkaariûkua ûkeegua ûrî na mwago na inya. 44 Mwîrî ûra ûthikagwa i mwîrî ûyû wa kûûmbwa na tîîri. Îndî mwîrî ûra ûkaariûkua, i mwîrî wa gîîkîrundu. Na wata bûra kûrî na mwîrî wa kûûmbwa na tîîri, i ta bu kûrî na mwîrî wa gîîkîrundu. 45 Maandîkooni Maatheru kwandîkîîtwe, muntû wa mbere ta we Andamu "aarî kîûmbe kîrî mwoyo." Îndî Andamu wa mûthia ta we Kîrîstû i Kîrundu na neeyanaga mwoyo. 46 Mwîrî wa gîîkîrundu t'uu wayire mbere. Mwîrî wa kûûmbwa na tîîri n'uu wayire mbere, rîru wa gîîkîrundu waya nyumaani. 47 Muntû wa mbere, ta we Andamu, aûmbirwe na mûthetu wa nthîgûrû. Îndî muntû wa baîrî, ta we Kîrîstû, nwa kuuma îgûrû. 48 Antû ba nthîgûrû barî mwîrî ûkari ta wa muntû ûra aûmbirwe na mûthetu wa nthîgûrû. Bara barî ba îgûrû barî mwîrî ûkari ta wa muntû ûra aumire îgûrû. 49 Na wata bûra tûbuanene na Andamu ûra aûmbirwe kuuma kîrî mûthetu, i ta bu tûkaabuanaana na Kîrîstû ûra aumire îgûrû. 50 Ga nkûbwîra, aruayia na aarayia, mîîrî îno ya nyama na nthakame îtithi ûneneeni bwa Ngai. Na gîntû kîoraga gîtigîa mwoyo ûra ûtathiraga. 51 Ka mbwîreeni kîriga kîra kîrî oogo. Tûtiikua twinthe, i tûkaagarûrwa twinthe. 52 Na gûgaakarîka ûgu nthûti îmwe ta gwincia na kûrancûkia. Karumbeeta gakaaringwa bara bakuû bariûke batakîora kaîrî na twinthe tûgarûrwe. 53 Kîra kîoraga nwa mwanka kîgarûrwe gîtuîke kîra gîtakîora. Na kîra gîkuyaga nwa mwanka kîgarûrwe gîtuîke kîra gîtakuyaga. 54 Rîra kîra kîoraga gîkaagarûrwa gîtuîke kîra gîtooraga, na rîra kîra gîkuyaga gîkaagarûrwa gîtuîke kîra gîtakuyaga, bûra kwandîkîîtwe Maandîkooni Maatheru ibûkaûyûra. Atî, "Gîkuû gîkûthirua, gîgûcindwa kûrû. 55 Rûgakaî rwa îrûma rîra ûrî îîndî rûrî kû? Yaûkû nthiko, inya yaku îîndî îrî kû?" 56 Wîyia i bu îrûma rîra rîreetaga gîkuû. Na watho i bu bweyaga wîyia inya îra bûrî. 57 Îndî nkaatho i kîrî Ngai ûra atwotithagia gûcinda kwa inya ya Mwathani wetû Yiesû Kîrîstû! 58 Kwoogu, aruayia na aarayia, karagaani bwîrikîîtie na bûtikaareke kwîgua kûrî na ûntû bwenyenyia wîtîgio bwenu. Rîonthe rutagîraani Ngai ngûgî, n'ûntû ibwiyî ngûgî îra bûrutagîra Mwathani t'ya ûtheri.
