1 AKORINTHO 14

1Cûani kwîgua bûrî na wendo. Na ibwagîrîtwe kinya wîgua bûkîendaga bwîgua bûrî na biewa bia gîîkîrundu, mûno mûno ta kîewa kîa ûroria. 2Muntû ûra aaragia na ndwaria ingeni atiîgagua akîaria na antû, eegagua akîaria na Ngai. Gûtirî we eegagua bûra akuuga n'ûntû eegagua akîaria iriga kwa inya ya Kîrundu. 3Îndî ûra aroragia aaragia na antû akabeera mantû ma kûbeekîra wîru, akabaûmîîria, na agatûma beegua barî na wîtîgio bûûriku. 4Ûra aaragia ndwaria ingeni n'we wenka ateethekaga. Îndî ûra aroragia ateethagia kanica yonthe. 5Ndeenda bwinthe bwaragia ndwaria ingeni. Îndî mbenda mûno bûroragia. Muntû ûra aroragia arî gîtûmi nkûrûki ya ûra aaragia ndwaria ingeni, n'ûntû ûra aaragia ndwaria ingeni agîteethia kanica nwanga kûrî na muntû aûmba gûtaûra bûra akuuga. 6Aruayia na aarayia, nkaaya kîrî biû nkabwarîria na ndwaria ingeni bûbu bûbûguna na mbi? Îndî nkaaya nkabwîra ûntû bûna bûra Ngai angwûrîrîte, ûmenyo, ûroria bûna, kana nkabûrutana ûntû bûna, rîru ndeegua nkîbûguna. 7Nwa ngerekanie bûra nkuuga na into bia wini ta mûtûûrirû kana wandîndî. Ûkeegua mûkûûraani wa tûyû ûtakwîguîka rîra mûtûûrirû waugua, kana wandîndî yaringwa rî, n'ûû amenya i rwîmbo rûbi rûkwinwa? 8Î kana rûgoci rûkîregire kûruta kayû kara kaamenyithagia antû kûrî na ndûa rî, kûrî we akîthi kûrûa? 9Kwaria na rwaria rûûgeni i ta ûgu îîndî n'ûntû gûtirî we akaamenya bûra ûkuuga. Nwa ta muntû akwaria na maiga! 10I mma kûrî ndwaria mîthemba îmingî gûkû nthîgûrû îno, na gûtirî rwaria nwa rûmwe gûtarî bûra ruugaga. 11Na ûkaaya kwîgua ntaiyî kwaria rwaria rûna, muntû akaambarîria ru atuîka mûgeni kîrî niû, na naani ngatuîka mûgeni kîrî we. 12N'ûntû naabi ibwendaga biewa bia gîîkîrundu mûno, nkûrûki endagaani kwîgua bûrî na biewa bira bigaateethia kanica îkûre. 13Kwoogu muntû ûra aûmba kwaria na rwaria rûûgeni nabatîîrue aromba eewa kîewa gîa kûûmba gûtaûra bûra akuuga. 14Nkaromba na rwaria rûûgeni, wîgua nkîromba gîîkîrundu, mathûgaanio maakwa matimenya bûra nkuuga. 15Kwoogu n'ata mbatîîrue ndûtha? Mbatîîrue ndaromba gîîkîrundu, ndombe kinya na mathûgaanio maakwa. Ndaina gîîkîrundu, mbine kinya na mathûgaanio maakwa. 16Waromba Ngai na gîîkîrundu wenka rî, n'ata muntû ûra atakîmenya bûra ûkuuga akauga "Aameni" rîra ûgûcookeria Ngai nkaatho? Atiimenya bûra ûkuuga. 17Nwa wîgue mantû mara ûkuuga marombaani maaku marî mantû meega mûno, îndî ûkeegua gûtirî bu ûgûteethia na bu muntû ûra ûngî. 18Ingûcookeria Ngai wakwa nkaatho n'ûntû imbaragia ndwaria inyingî mwanya mwanya, nkûrûki yenu bwinthe. 19Îndî rîra tûrî kanicaani i kaaba nkaaria mîgambo îtaano îra antû bakaamenya kaingo mbarutana, bantû a mbaria mîgambo ngiri na rwaria rûûgeni kîrî bo. 20Aruayia na aarayia, bûtigaakare ta twana mathûgaaniani meenu. Karagaani ta twana kîrî mantû maathûûku, îndî mathûgaaniani meenu bûbatîîrue bwîgua bûkari ta antû agima. 21Maandîkooni Maatheru kwandîkîîtwe, "Nkaaria na antû baakwa na ndwaria ingeni na nthiomi cia ageni, îndî amwe na ûgu batiîgua bûra nkuuga." Ûgu i bu Mwathani akuuga. 22Na kwoogu bara beeyagwa kîewa gîa kwaragia ndwaria ingeni beeyagwa kîo kîrî ûkûûyî kîrî bara bateetîgîîtie, ti kîrî bara beetîgîîtie. Îndî ûroria bu, i bwa kîrî bara beetîgîîtie, ti bwa kîrî bara bateetîgîîtie. 23Ûkeegua antû ba kanica rîra bûrî amwe bwinthe i ndwaria ingeni bûkwaria, antû batarî eetîgîri kana batakûmenya bûra gûgûkarîka bakaaya kanicaani înu batiuga i bûrî bathûûku biongo? 24Îndî gûgatuîka antû bonthe barîaria ûroria, muntû atarî mwîtîgîri kana atakûmenya bûra gûgûkarîka akaaya kanicaani înu wîyia bwake ibûkeebuumîria, eegiitîre îgamba kuumania na bûra bunthe akeegua. 25Mantû maake ma witho ma nkoro imakaamenyekana, na maamenyekana aturie maru arombe Ngai auge, "I mma Ngai arî amwe naabi!" 26Kwoogu, aruayia na aarayia, n'ata bûbatîîrue bûrûtha? Rîra bwîthîranaga amwe kanicaani, muntû ûmwe aûmba kwîgua arî na rwîmbo akwenda kwina, ûngî arî na ûntû bwa kûrutana, ûngî arî na ûntû agwûrîrîtwe i Ngai akwenda kwîra kanica, ûngî arî na ntûmwa akwenda kuuga na rwaria rûûgeni, na ûngî n'we arî na ûtaûri bwa ntûmwa înu. Gîtûmi gîa kwîgua mantû mamu monthe marî oogo, i kaingo matûma kanica îkûra. 27Bara bakaaria ndwaria ingeni, ibaarie antû ta baîrî ûgu kana bathatû, îndî ti nkûrûki ya agu. Baakara kwaria, ibaarie woomwe kwa ûmwe. Na nwa mwanka wîgue kûrî na muntû wa gûtaûra bûra bakuuga. 28Weegua gûtirî muntû wa gûtaûra, babatîîrue bakira. Ibeebîîre barî bo bongwa na nkoro ciao bakîîra Ngai. 29Bara bakaaria ûroria, ibaarie antû ta baîrî ûgu kana bathatû. Bara bangî bûrî ba kanica naabi bûbatîîrue bûbathikîîria bwega bwîgua bûra bakuuga n'ûmma kana t'ûmma. 30Na bûrî kanicaani woogû ûmwe weenu akaaya kûgwûrîrwa ûntû i Ngai, ûkaaya kwîgua kûrî muntû akwaragia ûroria abatîîrue akira anenkere kaanya ûyu aagwûrîrwa ûntû i Ngai aarie. 31Nwa bwetanîîre bûkeeyana ûroria bwenu bwinthe. Na gûkari ûgu, antû bonthe ba kanica baathooma ûntû kuumania naabi na bwabeekîra wîru. 32Ririkanagaani muntû ûra eetwe kîewa kîa ûroria we nwa eeteere akaaria rîra kaanya gakooneka. 33Ngai ti Ngai wa kîrigicano, i Ngai wa ûkiri. 34Wata bûra gûkari makanicaani monthe ma antû ba Ngai, aka batibatîîrue baaria kanicaani. Ti bwega baarîîtie kanicaani. Nwa mwanka beenyiyie, wata bûra watho kinya bu buugîîte. 35Beenda kûmenya ûntû ibaûragie arûme baao baacookaga mîciî. N'îgi mûka aarîîtie kanicaani. 36Ka bûkûthûgaania kiugo kîa Ngai kîanjîîrîîtie naabi? Kana ka bûkwona taka bûrî biû bwinka gîkinyîîrîîte? 37Ûra akwîthûkia taka arî kîroria, kana akwona taka arî na kîewa kîna gîa gîîkîrundu nabatîîrue amenya mantû mama mbwandîkîrîte i yathana rîa Ngai. 38Ûra atakîmathûkia marî ma gîtûmi wana we atiithûkua arî wa gîtûmi. 39Kwoogu îîndî, aruayia na aarayia, bûbatîîrue bwendaga mûno kwewa kîewa kîa ûroria. Îndî îngî amwe na ûgu, bûtikaarigagîîrieni bara beetwe kîewa gîa kwaragia ndwaria ingeni baaria. 40Rûthagaani mantû monthe na njîra îra yagîrîte na bûrî na mûbango.

will be added

X\