1 AKORINTHO 12

1Îîndî, aruayia na aarayia, ndîenda bûmenya mantû ma biewa bira Kîrundu Ûmûtheru eeyanaga. 2Ibwiyî bûra bwakari mbere ya bûtuîka eetîgîri. Bwabîtithîîtue njîra bwatua kûrombaga ngai cia ûrongo, gîntû gîtaûmba kwaria. 3Kwoogu ndîenda bûmenya atî, gûtirî muntû akwaria arî na Kîrundu wa Ngai aûmba kuuga, "Araûra Yiesû," na gûtirî we aûmba kuuga, "Yiesû i Mwathani," tatiga arî na Kîrundu Ûmûtheru. 4Kûrî mîthemba mwanya mwanya ya biewa bia gîîkîrundu. Îndî bionthe biumîîte kîrî Kîrundu ûmwe. 5Kûrî njîra mwanya mwanya cia kûrutîra Mwathani ngûgî. Îndî i Mwathani ûmwe wîgagua akîrutîrwa ngûgî. 6Na kûrî njîra mwanya mwanya ira Ngai arutaga ngûgî na cio gûkûrûkîîra kîrî antû. Îndî i Ngai ûmwe arutaga ngûgî naati na njîra cionthe. 7Muntû eeyagwa kîewa gîa gîîkîrundu gîteethia kanica yonthe. 8Ûmwe aûmba kwewa kîewa gîa kwaragia na ûûme i Kîrundu, ûngî n'we akeewa kîewa gîa kwaragia na ûmenyo i Kîrundu wooyu. 9Muntû ûngî aûmba kwewa kîewa kîa wîtîgio bûûnene, ûngî n'we akeewa kîewa gîa kworania i Kîrundu wooyu. 10Muntû ûngî aûmba kwewa kîewa kîa inya ya kûringa biama, na ûngî n'we akeewa kîewa kîa ûroria. Na muntû ûngî aûmba kwewa kîewa gîa kûmenya irundu bia mma na irundu bia ûrongo, na ûngî n'we akeewa kîewa gîa kwaria na ndwaria ingeni. Na muntû ûngî n'we aûmba kwewa kîewa gîa gûtaûra ndwaria inu. 11I Kîrundu wooyu ûmwe arutaga ngûgî înu yonthe, na n'we abangaga i kîewa kîbi akaa woora muntû. 12Mwîrî i gîntû kîmwe îndî ûrî tûcuncî twingî. Wana kinya ûkeegua mwîrî ûrî tûcuncî twingî, tûcuncî tûtu tunthe tûrûthîîte mwîrî ûmwe. Kîrîstû i ta bu akari ûgu. 13Bamwe beetû n'Ayaundi, bamwe t'Ayaundi, bamwe i nkombo cia bara bangî, na bara bangî ti nkombo. Îndî amwe na ûgu, twinthe tûbaatithîîtue mwîrîîni ûmwe i Kîrundu ûmwe, na twewa Kîrundu ûyu ûmwe tûnyunyaga. 14Mwîrî ûrî tûcuncî twingî, ti kamwe gonka. 15Rwayo rûkauga, "Niû ntirî gîcuncî kîa mwîrî n'ûntû ti niû njara," gûtiûmbîka wîgua ru ti gîcuncî kîa mwîrî. 16Kana gûtû gûkauga, "Niû ntirî gîcuncî kîa mwîrî n'ûntû ti niû riitho," gûtiûmbîka wîgua ku ti gîcuncî kîa mwîrî. 17Ûkeegua mwîrî unthe i riitho akî rî, waûmba kwîgua? Kana ûkeegua mwîrî unthe i gûtû akî rî, waûmba kûgwata mûruke mûna? 18Ngai eekîrîte wakîra gîcuncî kîna mwîrîîni, kûringana na ara eendire wakîra gîcuncî wîgua kîrî. 19Wakîra gîcuncî gîkeenda gûtuîka gîcuncî kîna kîa mwîrî, ûtiîtwa mwîrî kaîrî. 20Kwoogu kûrî icuncî biingî, îndî mwîrî n'ûmwe. 21Riitho rîtiûmba kwîra njara, "Niû ntirî bata naawe." Na kîongo na kîo gîtiûmba kwîra rwayo, "Niû ntirî bata naawe." 22Arî! Icuncî bira bionekanaga taka bitarî gîtûmi twabiganaania na bira bingî, birî gîtûmi mûno. 23Icuncî bira bikari taka bitarî gîtîîyo i bio tûtîîyaga nkûrûki. Icuncî bira bitarî bia nthoni nwa bikare bitarî biithe, îndî icuncî bia nthoni nwa mwanka tûbiithe. Kwoogu i Ngai aagwatithaniirie mwîrî amwe, aatuîkithia wakîra gîcuncî kîa ûmenyeeri bûna. 25N'ûntû bwa ûgu, gûtibatîîrue kwîgua kûrî na kwathûkana mwîrîîni. Wakîra gîcuncî kîbatîîrue gîkamata thîîna cia gîcuncî kîra kîngî. 26Gîcuncî kîmwe gîkaaya kûgîa thîîna, icuncî bira bingî wana na bio ibigwatwa i thîîna. Na gîcuncî kîmwe gîgakumua, icuncî bira bingî wana na bio ibikeneera. 27Bwinthe bûrî mwîrî wa Kîrîstû. Woora ûmwe i gîcuncî kîa uu. 28Kanicaani, ta yo mwîrî wa Kîrîstû, Ngai eeyanîîte icuncî bibi: mbere atûmwa, rîru iroria, aarimû, bara baringaga biama, bara beetwe kîewa gîa kworanagia, bara bateethagia bara bangî, bara baûmbaga gûtongoreeria bara bangî na bara baûmba kwaria na ndwaria ingeni. 29Ka antû bonthe barî atûmwa? Kana ka bonthe barî iroria? Ka bonthe barî aarimû? Kana ka bonthe baûmba kûringa biama? 30Ka antû bonthe beetwe kîewa gîa kworania? Ka bonthe baûmba kwaria ndwaria ingeni? Kana ka bonthe baûmba gûtaûra ndwaria inu? 31Bûbatîîrue bûrîmia kwewa biewa bira birî bia gîtûmi mûno. Ka mbwîreeni îîndî gîntû kîngî gîkûrûkîîte bira bingî bionthe.

will be added

X\