1 AKORINTHO 11

1Thingatagaani ngerekano yakwa ta bûra naani nthingataga ngerekano ya Kîrîstû. 2Inkwîgua nkeneete mûno i biû n'ûntû bwa kûndirikanaga mantûûni monthe, na n'ûntû bwa kûthingata ûrutani bûra ndabûrutanire. 3Ndeenda bûmenya kîongo kîa muntû wonthe i Kîrîstû, na kîongo kîa mûka i muntû mûrûme. Kîongo gîa Kîrîstû i Ngai. 4Muntû mûrûme ûra arombaga kana aroragia akunîkîrîte kîongo gîake, atiîgagua agîtîîya mûnene wake. 5Na mûka ûra arombaga kana aroragia atakunîkîrîte kîongo gîake, atiîgagua agîtîîya mûnene wake. Mûka ta ûyu i bûmwe na ûra agiitaga ntundu ciake ikanyiia. 6Weegua mûka atiikunîkagîra kîongo gîake abatîîrue agiitaga ntundu ikanyiia. Îndî na bu n'ûntû bûrî nthoni mûka kûnyiia ntundu kana gûcienja kûrû. Mûka abatîîrue akunîkagîra kîongo gîake. 7Îndî muntû mûrûme atibatîîrue akunîkagîra kîongo gîake, n'ûntû we i mûbuanaano na mwago wa Ngai, akari ûgu. Mûka i mwago wa muntû mûrûme. 8Muntû mûrûme ataûmbwa kuuma kîrî mûka. I mûka aûmbirwe kuuma kîrî muntû mûrûme. 9Muntû mûrûme ataûmbwa n'ûntû bwa mûka. I mûka aûmbirwe n'ûntû bwa muntû mûrûme. 10Kwoogu mûka nabatîîrue akunîkagîra kîongo gîake n'ûntû bwa araîka, kwonanagia arî wathooni bwa mûrûme wake. 11Îndî amwe na ûgu, mûka arî gîtûmi kîrî muntû mûrûme. Na muntû mûrûme arî gîtûmi kîrî mûka kûringana na mûbango wa Mwathani. 12I mma n'ûntû mûka aûmbirwe kuuma kîrî muntû mûrûme na muntû mûrûme n'we aciaragwa i mûka. Îndî Ngai we n'we aabaûmbire bonthe. 13Wana biû bwingwa tathûgaaniani bwone kana mûka nabatîîrue aromba Ngai atakunîkîrîte kîongo gîake. 14Wîthîre ibwonanagia n'ûntû bûrî nthoni muntû mûrûme kwîgua arî na ntundu indaaya. 15Îndî mûka arî na ntundu indaaya i mwago wake n'ûntû eetwe cio imûkunîkagîra. 16Weegua kûrî we akwenda gûkararia abatîîrue amenya tûtirî mûtugo ûngî, na wana makanica ma Ngai kinya mo matirî mûtugo ûngî. 17Bûra nthiîte kûbwîra îîndî bûtigûnkenia na bu n'ûntû rîra bûrîîkanaga amwe, ûthûûku i bu bûrûthaga kwa wingî nkûrûki ya wega. 18Bwa mbere, ndîîgua rîra bûrîîkanîîte kanicaani bûtîigagua bûkîgwatanîra. Na ingwîtîgia mantû mamwe ma mara mbîgagua i ma mma. 19Kwîgua bûgîkararanagia i kwega n'ûntû gûkoonania i barîkû barî ûmmaani. 20Rîra bûrîîkanaga amwe, bûtirîîkanaga n'ûntû bwa kûrîa kîatho kîa Mwathani. 21Gîtûmi gîa kuuga ûgu, i kwîgua rîra bûrîyaga kîatho kîa Mwathani, woora muntû arîyaga atagûtindanîra na gweteera bara bangî mwanka bamwe beenu bakaaga, îîndî îra bamwe beenu wana gûtogoona batogoonire! 22Twabûrîe na bûkanyua mîciî yenu? Gûku ti kwagîra kanica ya Ngai gîtûmi na gwîkîra nthoni bara batarî na biakûrîa? Kwoogu n'ata bûkwenda mbwîra? Mbwîre inkeneete? Arî! Ntibwîra ûgu n'ûntû bwa kûrûtha ûntû ta bûbu. 23Ûrutani bûra ndabûrutanire i bu niû ndeerwe i Mwathani. Atî ûtugû bûra Mwathani Yiesû aakunyanîîrwe, aathûkiirie mûgaate, 24na akûthiria gûcookeria Ngai nkaatho n'ûntû bwa uu, aung'enyûrania auga, "Thûkiani bûrîe, ûyû i mwîrî wakwa ûra ûnenkanîrîtwe n'ûntû bwenu. Rûthagaani ûûgû n'ûntû bwa kûndirikanaga." 25Bakûrîîkia kûrîa, Yiesû aathûkia gîkombe na kîo auga, "Gîkombe gîkî kîa ndibei i kîrîîkanîro kîîyerû kîra gîgaakûûyagîîrwa i nthakame yakwa îra îgeetûûrwa. Rîra bûkaamînyunyaga mînyunyageeni n'ûntû bwa kûndirikanaga." 26Rîonthe rîra bûkaarîyaga mûgaate ûyû na bûkanyua ndibei kuuma gîkombeeni gîkî wîgagua bûkîonania gîkuû kîa Mwathani mwanka rîra agaacooka kaîrî. 27Kwoogu ûra arîyaga mûgaate kana akanyua ndibei na njîra îtaagîrîte yumîîte gîkombeeni kîa Mwathani, muntû ûyu neegagua akîîyîria mwîrî na nthakame ya Mwathani. 28Woora muntû abatîîrue eecûnkûûna bwega mbere ya arîa mûgaate kana anyua ndibei ya gîkombe kîa Mwathani. 29Ûra arîyaga mûgaate kana akanyua ndibei na njîra îtaagîrîte, neereetagîra îgamba wengwa n'ûntû atiîgagua akîona mwîrî wa Mwathani ûrî gîtûmi. 30Gîku i kîo n'ûntû baingî beenu bûrî bionje kana bûrî baayie na i kîo gîtûmîîte bamwe beenu bakua. 31Îndî tûgeecûnkûûnaga bwega Ngai atitûgambithia. 32Rîra Mwathani atweyaga îkaanûkia, ka wîgagua akîenda tûrûthaga bûra kwagîrîte kaingo tûtagiitîrwa îgamba bûûthûûku antû ba nthîgûrû bakîgiitîrwa. 33Kwoogu, aruayia na aarayia, etanagîîraani bûkarîyanîria amwe rîra bûrîîkeene kûrîa kîatho kîa Mwathani. 34Ûra arî na yûûra mûno abatîîrue arîyaga gwake kaingo rîra bwarîîkana bûteereeteera îgamba rîa Ngai bwingwa. Nkabwîra bûra bûkaarûtha mantû mara mangî rîra nkaaya.

will be added

X\