Romanos 9

1Tja töno beno Cristo tjok. E kjîshko ga tja tjšê beke. Sbö Sëya om go ši tjšê bor kong bor pjšúshko ga tja shäng jyõrkë ðëme še. 2Tja woydë ara bor pjšúshko îyado, bor pjeyoga judíoga ši kjîshko. Epga mär ber šöng Cristo go wšo ga woyde ga tja ie Sbörë ber Cristo tjok ame, tja ie ber shdungko wšeni ga bor kong ga pjšúe. 4Epga Israel tjëyoga. Epga kjrara Sbörë beno ba wapga. Ba dbo kãšã pina ba kong, tjšõkwo twara ba kong, beno îyado wšo, kjok ðgwekkšo ši twara ba kong, pina ba poshrëk ba ushko, ðëbo šara ba kong jšõkoyo ara bakoe. 5Ba tjšapgaga tek dënashko so tjwšõ ara anmoyõ. Cristo tjšapgaga tek dënashko so ši epga. Cristo, e Sbö. Uunkong pjšuyo, poshrëkko îyado ši e. Ber eni. 6Gueniyo ðëye šara Sbörë Israel tjëyoga kong jšõkoyo ši shärye eni ðëme šotë ðëme. Sbö kong ga Israel tjëyoga uunkong, e ba nopga dö ðëme. 7Abraham tjëyoga uunkong beno ba tjëyo jšõkoyo dö ðëm bakoe. Sbö tjšêno ba kong ga “Isaac tjëyo tek ber bop irgo ši ber bop tjëyo jšõkoyo eröe” šara eni. 8E kjîshko ga Abraham tjëyoga uunkong beno Sbö wapga dö ðëm, ba wapga weno tjšõkwo šara Sbörë jšõkoyo ši kjîshko eröe. 9Sbö tjšõkwo šono Abraham kong jšõkoyoshko ga tjšê ba kong ga “Dbar ðono šoror ši go ga pja în tjwe obi. Eshko ga bop boy Sara wšoshko wa tjeng kjšara domer tjän” še. 10Ba wa šara ši, e bi tjšapga Isaac. Šu to jek ara ga orkwosmono Rebeca tjok, ga wapga do pjök, kjšö. 11Weno bäm go ši Esaú, irgo Jacob. Gueniyo wentë šok ðëm obishko ga Jacob kjrara Sbörë, ðëbo shärye ba tjok wšo. Kjrara eni, ðëbo pjšú shäryara kjîshko ðëme. Eshko ga ðëbo pjšú, ðëbo owa, e shäryayde šok ðëm obi. Gueniyo Sbö tjšê Rebeca kong ga “Bäm îyo ši ichaga ber ba šëngdë” še. Ðëbo šara Sbörë obi ši tak pjang ba tjšõkwo go eni: “Jacob woydoror ara. Gueniyo Esaúra îywor shjiktëng.” 14¿Eni ga ðë šoydë? ¿Sbö, e ðëbo shäryë bek ðëme šoydëre? Eni ðëme. 15Tjšêno Moisés kong ga “Ëye songe šër woydë ga e songe šotë eröe. Ëye kjimtër woydë ga e kjimtotë eröe.” 16Eni ga shji kjimte Sbörë, shji songe še woydë kjîshko, e woydëy ara kjîshko ðëm, ðëbo pjšú shäryoroy kjîshko ðëm bakoe. 17Ðëbo šara Sbörë Egipto so pjšuyo kong ši tak pjang ba tjšõkwo go eni: “Pja ioror beno no pjšuyo, bor dbo kësbang pin bop go wšo, tja ë miyde nopga šöng kjok kjwang jîkong širë wšo bakoe.” 18Miydëy e go ga ëye songe še woydë ga songe še, ëye ie woydë ber sök ëye kuya woydë ðëm ga ie ber šöng eni bakoe. 19Pjãy kjone kjone kjwe šöng wotjšîk ga “¿Eni ga ðëye shäryëy ši šaga erë kuzong ga shji shdûya ega?” šëmi eni kjwe. 20Gueniyo pjeyoga, shji no eröe. ¿Ðëbo shäryara Sbörë ši owa šëy ba kong sorëro? No parkë ðëbo shäryë kšung shosho go ga “¿Tja shäryorop jûni ega?” še kšung shosho širë ba kong ga äe. 21Kšung shosho kjrinaso ëmdë ga sbi shärye kjwo pjök e go ga pjšúe. Kjwara shärye wošësowa, tjwšõ ara, ie ber tjeng dboy wšo, kjwara obi shärye uriso, ber ðë pogo wšo. Ðëbo shärye e go, woyde sorë ši eni ga pjšúe. 22Woyde Sbörë ga miydëba ga e iirkë ara nopga ðëbo owa shäryono ši kong, ga shdûya kjang, ba dbo ara go ga pjšúe. Eni ëmdë ga nopga shdungko ši shduna mašing ðëm, kura sök kjing erä. 23Shäryara eni, ba dbo kãšã pîya nopga songe šara ši kong wšo. Epga kjrara dënashko, ðëbo pjšú shärye ba kong wšo. 24Shji rokara eni. Judíoga rokara dö ðëm, nopga judío ðëm wšeniyo rokara bakoe. 25Kjibokwo tara Sbö tjšõkwo šaga tek dënashko so Oseasdë. Ðëbo šara Tjšapgarë ši tak pjang e go eni: “Ðono ga nopga botoya ðëm šöng ši iër ber šöng bor nopga shara, ga nopga woydoror ðëm šöng ši woydër ara shara.” 26Sbö tjšõkwo tak pjang eni bakoe: “Dënashko ga Sbö tjšêno nopga kong ga “Pjãy bor nopga ðëme” šara eni. Gueniyo ðono ga kjok eshko sopga kowe Sbö sök së ši wapga shara.” 27Dënashko ga Isaías tjšêno Israel tjëyoga kjîshko eni: “Israel tjëyoga träk ðëm, ša sho tjeng dšung kjako wšeni ëmdë ga där ber kjšöbö doë. 28No ðgweya Tjšapgarëshko ga nopga šöng kjok ëre kjing go ši shdûya pjir, jekdo, šara sorë ši eni.” 29Bäm go ga Isaías tjšêno eni: “Tjšapga, ðëye shärye woydë ši shärye ga pjšúe. Shji tjëyoga tek ber bi irgo ši iara beno šöng së kjšöbö ðëm kjwe ga shji šöng Sodoma sopga dik, shji šöng Gomorra sopga dik bakoe.” 30¿Eni ga ðë šoydë? Nopga judío ðëm wšeniyo wotjšîno ðëbo pjšo bek ši shäryë ðëme. Eni ëmdë ga mär Cristo go kjîshko ga iara Sbörë beno pjšo bek ba bokso. 31Gueniyo Israel tjëyogara dröno ara, ðëbo pjšo bek ši shäryë wšo. Eni ëmdë ga öötong beno pjšo bek Sbö bokso ðëme. 32¿Eni ega? Äär ber pjšo bek Sbö bokso wšo ga ðëbo pjšú tak pjang kjok ðgwekkšo tara Moisésdë go ši shärye woydë, gueniyo mär woydë Cristo go ðëme. Eni ga sabyono akkwo iara beno nopga sabyokšo ši go wšeni, 33tak pjang Sbö tjšõkwo go sorë ši eni. Tjšê ga “¡Îzîa! Akkwo iër ber buk kjwara Sión kjokyo, nopga sabyë e go wšo. Gueniyo ëye mär ba go ga ðëye koshe ši wšêya jšõkoyo.”

will be added

X\