Romanos 8

1Eni ga ëye töno beno tjeng Cristo Jesús tjok ga beno šöng shdungko ame. 2Dënashko ga tja ichaga bor wotjšîk owa širë, ga tja shäng wošon wšo. Gueniyo tja mär Cristo Jesús go kuzong ga ba Sëya twara bor kong, ga tja döra bor wotjšîk owa ši dbo dorko dwayo, tja iara beno shäng së jšõkoyo shara. Eni ga tja shäng wošon wšo ame. 3Shji döya kjok ðgwekkšo tara Moisésdë širë eni ga ä, shji iara bi wotjšîk owa širë ba košë ðëm kjîshko. Gueniyo Sbö, ba Wa ichara weno so shji nopga owa ëre kjoyo, ber owa pjang bi go ši potjwšêkkšo wšo. Eni ga ba Wa ši doyo shdunaba bi ãska, shji döya wšo. 4Shäryara eni ga bi shdunggšo pjšo bek tak pjang kjok ðgwekkšo go ši potjwšêkkšo, shji ber shdungko ame wšo. Eshko ga shji beno šöng ba Sëya košë shara, shji beno šöng bi wotjšîk owa ši košë ame. 5Ëye ichaga ba wotjšîk owa širë ga ðëye woyde om go ši woyotjšîya. Gueniyo ëye ichaga Sbö Sëyarë ga ðëye woyde Sbö Sëyarë ši woyotjšîyde erä. 6Ëye ichaga ba wotjšîk owa širë ga ber šöng wošon wšo. Gueniyo ëye ichaga Sbö Sëyarë ga ber šöng së jšõkoyo, ber šöng wšêp bakoe. 7Ëye ichaga ba wotjšîk owa širë ga e Sbö wšoyo. Kjok ðgwekkšo twara ši koše ðëm, koše ga ä, 8ga ðëbo pjšú shärye, Sbö ber wopjšú ba tjok wšo ga ä bakoe. 9Gueniyo pjãy go Sbö Sëya wšeni ga pjãy ichaga šöng bomi wotjšîk owa širë ame, pjãy ichaga šöng Sëya širë shara. Ëye go Cristo Sëya ðëm ga e Cristo î ðëme. 10Ðono ga bomi doyo, e wošon, ðëbo owa shäryoromi kjîshko. Gueniyo pjãy go Cristo wšeni ga bomi sëya ber šöng së îyado, pjãy iara Sbörë beno pjšo bek ba bokso kjîshko. 11Jesús woshrara Sbörë iröng obi, ga Sbö Sëya pjang bomi go. Eni ga ba Sëya iche, bomi doyo woshrë iröng obi eni bakoe. 12Pjeyoga, shji ichaga bi wotjšîk owa širë ame. Ðëye woyde ši shäryëy ðëm ga pjšúe. 13Pjãy iche bomi wotjšîk owa širë wšeni ga pjãy beno šöng wošon wšo. Gueniyo pjãy iche Sbö Sëyarë wšeni ga bomi wotjšîk owa ši rayëmi îyado, ga pjãy šöng së jšõkoyo. 14Ëye mär Sbö Sëya go ga e Sbö wapga. 15Parkagaga tjwšêk šöng pjir wšeniyo, ba sogo bangkjre šöng dete erä. Pjãy ie Sëya širë Sbö bangkjrë eni ðëm, pjãy iara beno ba wapga kjîshko. Eni ga shji kjimte Sëya širë tjšê Sbö kong. Shji tjšê ba kong ga “Abba. Data” šëy eni. 16Sbö Sëya om go ši tjšê bi kong ga shji Sbö wapga jšõkoyo še bi kong bi pjšúshko. 17Eni ga shji Sbö wapga kuzong ga ðëye twe ba wapga kong ši twe bi kong, twara Cristo kong sorë ga eni. Cristo shdunaba ara. E irgo ga iara Sbörë beno kësbang, tjwšõ ara. Shjira shdungoba ara eni bako wšeni ga shji ie Sbörë ber kësbang, tjwšõ ara eni bakoe. 18Ðëye shärye Sbörë bi kong ðono ši tjwšõ ara anmoyõ. E kjîshko ga ðëye wen bi kong owa eerishko ši, e ðë ðëm wšeni. 19Ðono ga Sbö wapga jšõkoyo ši pîya wêšëe. Ðëbo shäryara Sbörë kjok ëre kjing go tjeng kës ši šöng ba koshë. 20Ðëbo uunkong ši shäryara Sbörë pjšú, ðëbo shäryë wšo, ga shärye woydë eni jšõkoyo, gueniyo shärye ga ä, shduna Sbörë beno srer wšo kjîshko. Gueniyo dbar iara beno kjwara, ðëbo uunkong ši ber pjšú iröng obi wšo. 21Eshko ga Sbö wapga wošon ame, ga ðëbo uunkong ši ber srer ame wšo bakoe. 22Wašë wšoshko chida tjeng döröshko ga bangyo ara, ga kjšoshtë ara e kjîshko. Miydëy ga eerishko ga ðëbo uunkong shäryara Sbörë ši šöng kjšoshtë eni wšeni bakoe. 23Gueniyo song ši ðëbo shäryara ši dö ðëme. Shjira šöng kjšoshtë eni bakoe. Shji kong ba Sëya twara Sbörë. Miydëy e go ga ðono ga shji ie ber ba wapga jšõkoyo, ga bi doyo ie ber tjagšën bakoe. Gueniyo e dbaryo ši koshëy šöng wopro ga shji kjšoshtë ara. 24Shji döra Sbörë kuzong ga shji beno šöng e dbaryo ši koshë îyado. Ðëbo koshëy šöng ši îgöy ðëme. Ðëbo îgöy wêšë ga koshëy šöng ðëm, tjeng bi tjok tjän kjîshko. Gueniyo ðëbo koshëy šöng ši îgöy ðëm obi ëmdë ga koshëy šöng wopjšúe. 26Shji dbo ara ðëmshko ga shji kjimte Sbö Sëyarë. Shji syõshtë mae. E kjîshko ga ba Sëya om go ši kjšoshtë Sbö kong bi kjîshko, gueniyo ðëye še ši šëy bi tjšõkwo go ga äe. 27Eni ëmdë ga ðëye še ši miyde Sbörë pjire. Shji wotjšîk šöng ðë miyde Sbörë pjir, ga ðëye woyde še ba Sëyarë ba kong bi kjîshko ši, e šayde, ðëye še ši miyde pjir e kjîshko. 28Ëye Sbö woydë ara ga rokara Sbörë, ðëbo shärye ba tjok wšo. E kjîshko ga miydëy pjšú ga ðëbo wen ba kong kës ši ie ber ba kong pjšúe. 29Kjok ëre shäryayde ðëm obishko ga ëye mär ba go ši miydara pjir tjän. Eshko ga epga äär ber šöng ba Wa dik še. Shäryara eni, ba Wa ber tjwšõ ara, ba pjeyoga ara ši kjinmo wšo. 30Ga nopga äär ber šöng eni šara ši rokara. E irgo ga iara beno pjšo bek ba bokso, ga ðono ga ie ber kësbang, tjwšõ ara bakoe. 31¿Eni ga ðë šoydë obi? Sbö shäng bi tjok kuzong ga shji zangga ërë ðëme. 32Ba Wa ëmdë ga wšikara bi kong ðëm, ichara wošono bi kjîshko. ¿Eni ga ðëbo tjeng kës ši twe bi kong ðëmdo? 33Shji kjrara, iara beno pjšo bek ba bokso kuzong ga shji rotaga ërë ame. Cristo Jesús wošono, ga woshrara iröng obi, öötong beno sök Sbö orkwo këšëkong. Bi wšikaga Sbö bokso ši e. 35Shji woyde Cristorë ara îyado. Shji songshko ga shji woyde ara. Ðëbo wen bi kong owashko ga shji woyde ara. Shji shdungobashko ga shji woyde ara. Shji pjši arashko ga shji woyde ara. Shji shwong ðëmshko ga shji woyde ara. Shji wošontoshko ga shji woyde ara. Shji zröraba ëmdë ga shji woyde ara bako, 36tak pjang ba tjšõkwo go sorë ši eni. Tjšê ga “Bop kjîshko ga tjawa zrökoba woydë îyado. Tjawa beno šöng so öng wšêp ushko so sökoba, zrökoba wšo kjoyoe.” 37Gueniyo ðëbo uunkong ëre wen bi kongshko ga zãy îyado, shji kjimte bi woydaga širë kjîshko. 38Miydër pjšú ga shji woyde Sbörë ara îyado. Shji songshko ga shji woyde ara, shji wošonoshko ga shji woyde ara bakoe. Sšongga Sbö parkagaga kjok dogo sorë ðëm, sšongga sëyaga owarë ðëm bakoe. Eerishko ga shji woyde ara, shji woyde ara îyado wšo bakoe. 39Sšongga ðëbo tjeng kjopkwo širë ðëm, sšongga ðëbo tjeng kšung dorong širë ðëm, sšongga ðëbo tjeng kjone pogo širë ðëm bakoe. Shji woyde Sbörë ara îyado, shji töna beno tjeng bi Tjšapga Cristo Jesús tjok kjîshko.

will be added

X\