Romanos 15

1Ðëbo shäryëy ber pjšo bek Sbö bokso ši miydëy pjšú wšeni ga woyde ga shji iirkë bi pjeyoga ommiydoydë ðëm obi ši kong ðëme. Ðëbo ber bi kong pjšú ši wšêydë ðëm, 2ðëbo ber pjšú bi pjeyoga kong ši wšêydë dey, opping mär Sbö go jek këgong wšo. 3Cristo ëmdë ga ðëbo shäryono ber pjšú ba kong wšo ðëm, tak pjang Sbö tjšõkwo go sorë ši eni. Tjšê ga “Pja šãywaraba owashko ga tja šãywaraba wšeni.” 4Ðëbo uunkong tak pjang Sbö tjšõkwo go dënashko ši beno bi poshdunggšo, shji opping ber šöng e go wšo, shji dbokjrë e go wšo. Eni ga ðëbo wen bi kong owashko ga kuy kjang ga pjšú, ðëbo tak pjang ši koshëy šöng wopjšú kjîshko. 5Shji kjimte Sbörë dbokjrë jek këgong, ðëbo wen bi kong owa ši kuy kjang wšo. Rokër ba kong ga pjãy mär šöng Cristo Jesús go wopro ga pjãy kjimte wotjšîk kjrinaso, 6pjãy uunkong Sbö poshrëk no kjšaraso wšeni wšo. Bi Tjšapga Jesucristo Data ši e. 7Pjãy wšokjrara Cristorë sorë ga pjãy ëng wšokjros kar kar eni bako, Sbö poshrëkoba wšo. 8Cristo öör judíoga kjimtë, ba parkaga tjwšêk shäng pjir wšeniyo dik, tjšõkwo bek šara Sbörë ba tjšapgaga tek dënashko so tjwšõ ara kong jšõkoyo ši ber jšõkoyo wšo. 9Ga nopga judío ðëm wšeniyo songe šara bako, Sbö ie šok ber kësbang, tjwšõ ara wšo, tak pjang Sbö tjšõkwo go sorë ši eni. Tjšê ga “Pja poshrër tjëyoga obšë obšë bokshto,tja të bop kong bakoe.” 10Sbö tjšõkwo tak pjang eni obi: “Sbö nopga šöng wopjšú,nopga judío ðëm wšeniyo,pjãy ber šöng wopjšú bakoe.” 11Sbö tjšõkwo tak pjang eni obi: “Nopga judío ðëm wšeniyo,Tjšapga poshrëzîa.Tjëyoga obšë obšë,pjãy të ba kong, ba poshrëkkšo.” 12Ga Isaías tjšêno beno eni: “Isaí tjëyo wen kjšara,ber tjëyoga obšë obšë ichaga.Nopga judío ðëm wšeniyo mär ba go.” 13Shji kjimte Sbörë ðëye šara ši koshë šöng wopjšúe. Rokër ba kong ga pjãy mär ba go kuzong ga pjãy kjimte ber wopjšú, wšêpe. Rokër ba kong obi ga pjãy kjimte ba Sëyarë, ðëye šara ši koshë šöng wopjšú anmoyõ wšo. 14Pjeyoga, miydër pjšú ga ðëbo shäryëy ber pjšo bek Sbö bokso ši miydëmi pjšú, shäryëmi pjšú, ga pjãy ëng ping e go ga pjšú bakoe. 15Gueniyo kjibokwo ëre go, ðëbo toror bomi kong obšë obšë kjang, woyojemi ðëm wšo. Sbö wopjšú ši kjîshko ga tja iara beno Cristo Jesús parkaga nopga judío ðëm wšeniyo kong, Sbö tjšõkwo roy pjšú šër ba kong wšo, epga twër ber Sbö kong, öng zröraba, sho suraba, pjono dret Sbö poshrëkkšo wšeni wšo, epga ie ba Sëyarë ber tjeng dboy ba kong wšo bakoe. Kjibokwo ëre toror bomi kong kjang e kjîshko. 17E kjîshko ga tja shäng wopjšú Cristo Jesús tjok, pak shäryoror Sbö kong ši beno pjšú kjîshko. 18Ðëbo obšë šanyotkër ðëme. Ðëbo shäryara Cristorë bor go ši šanyotkotë eröe. Tja ichara ba tjšõkwo roy šë nopga judío ðëm wšeniyo kong. Ga tja kjimtara ba Sëyarë ðëbo îydëba ðëm wšeniyo shäryë ba kong obšë obšë ara. Eni ga Cristo roy pjšú šoror ba kong Jerusalén kjokyo dwayo äär jong Iliria kjokyo, ga tjšõkwo ši kjrara nopgarë ara, beno šöng Sbö košë shara. 20Tek dënashko ga tjšõkwo roy pjšú ši šër woydë kjok shto obšë obšë, nopga omkuydë ðëm obi šöng šishko. Obšë öör omšë tjänshko ga tja äär woydë omšë jek obi eshko ðëme. 21Shäryër woydë, tak pjang Sbö tjšõkwo go sorë ši eni. Tjšê ga “Ba roy äär, äätë kjone ðëm obi šishko.Ëye ba roy kuydë ðëm obi ga kuya.” 22Tja jek bomi îk šoror ara, gueniyo tja jekdë ðëm obi e kjîshko. 23Tja jek bomi îk woyotjšîn sök šu kop ara tjän. Eerishko ga bor pak pjitong kjok ëreshko. 24Eni ga tja jek shäng España kjokyoshko ga pjãy în äär woydë, tja ber sök bomi tjok dbar kjwöbö wšo, pjir ga tja kjimtëmi jek äär eshko wšo. 25Gueniyo tja to Jerusalén kjokyo bäm go. Sbö tjšõkwo kjragaga šöng Macedonia kjokyo, Acaya kjokyo, e dbur töno, iche Sbö nopga song wšeniyo šöng Jerusalén kjokyo ši kong wšo, ga jek sör ba kong. 27Shäryara šok eni ba woshko, miyde šok ga pogo tjwšõ ba kong ara. Judíoga Sbö tjšõkwo roy shdöno nopga judío ðëm wšeniyo kong. E kjîshko ga bek ga kar ðëbo twe ba kong, ba kjimtokšo. 28Eni ga dbur ši ioror beno tjeng ba wšoshko pjir ga tja jongya España kjokyo shara. Tja jek shäng eshkoshko ga pjãy în äär. 29Miydër pjšú ga tja äär bomi shwoyshko ga shji kjimte Cristorë ara eshko. 30Pjeyoga, shji mär bi Tjšapga Jesucristo go, ga shji ie ba Sëyarë ëng woydë ara kar kar. Eni ga tja drön bor pak shäryë wopro ga rokër bomi kong ga pjãy syõshtë Sbö kong bor kjîshko jšõkoyo. Enira tja kjimtëmi ba shäryë. 31Rokozî ba kong ga tja döya Cristo tjšõkwo kjragaga ðëm šöng Jerusalén kjokyo ši wšoshko dwayo. Rokozî ba kong obi ga bi pjeyoga šöng Jerusalén kjokyo ši, ðëbo söror ba kong ši wšokjre šok wopjšúe. 32Woyde Sbörë eni wšeni ga tja äär bomi îk wopjšú, tja woshtë bomi shwoy ga pjšú wšo. 33Rokër Sbö kong ga pjãy ie ber šöng wšêpe. Ber eni.

will be added

X\