Romanos 1

1Kjibokwo ëre taga tja Pablorë. Tja Cristo Jesús parkaga. Tja rokara Sbörë, tja iara beno shäng ba tjšõkwo roy pjšú šaga Cristo Jesús ãska. 2Dënashko ga tjšõkwo pjšú ëre šara Sbörë ba tjšõkwo šagaga kong jšõkoyo, ga tara šok beno pjang ba kjibokwo go. 3Tjšõkwo ëre, e bi Tjšapga Jesucristo roy šayde. E Sbö Wa weno no, David tjëyo bakoe. 4Ga wošono irgo ga woshrara Sbörë iröng obi dbo ara go. E go ga shji pina Sbö Sëyarë ga e no erö ðëm, e Sbö Wa bakoe. 5Sbö wopjšú ši kjîshko ga tja rokara Jesucristorë beno ba tjšõkwo roy šaga ba ãska, nopga judío ðëm wšeniyo rokër mär ber šöng ba go wšo, ba tjšõkwo koše šok wšo, ba ko ie šok ber kësbang, tjwšõ ara wšo bakoe. 6Sbö nopga šöng Roma kjokyo, kjibokwo ëre ichër jek bomi kong. Nopga rokara Sbörë ber Jesucristo î ši pjãy bakoe. Pjãy woyde Sbörë ara. Rokër bi Data Sbö kong, Tjšapga Jesucristo kong ga ba wopjšú ši kjîshko ga pjãy kjimte šok ara, pjãy ie ber šöng wšêp bakoe. 8Pjãy mär šöng Jesucristo go ši, e roy shdöktong kjok kjwang jîkong. E kjîshko ga Jesucristo ko go ga tja tjšê bor Sbö kong ga tja wopjšú ba tjok bomi kjîshko šër eni. 9Tja Sbö parkaga. Ba Wa roy pjšú šër shäng jšõkoyo. Ga miyde Sbörë om go ga pjãy woyoshrër îyado, 10tja syõshtëshko ga rokër ba kong îyado ga tja äätë bomi kjokyo ðëm obi ëmdë ga tja kjimte äär bomi îk eshko. 11Tja kjimtara Sbö Sëyarë ara, ga pjãy în woydë jšõkoyo, pjãy kjimte eni bako wšo, pjãy dbokjrë e go wšo. 12Shji ëng kjimtë kar kar šotë bomi kong. Tja mär shäng Jesucristo go sorë ši înomi ga pjãy dbokjrë e go. Pjãy mär šöng ba go sorë ši înor ga tja dbokjrë e go eni bakoe. 13Pjeyoga Jesús tjšõkwo kjraga, tja jek bomi îk šoror ara, nopga šöng eshko ši pin, Jesús tjšõkwo kjre šok wšo, shäryër shäng nopga judío ðëm wšeniyo kong kjok shto obšë obšë sorë ga eni. Šër bomi kong, miydëmi wšo. Gueniyo tja jek bomi îk šërshko ga ðëbo wen bor kong îyado. 14Nopga tjšê Grecia so tjšõkwore, de ðëmde, nopga kjok miydë arare, de ðëmde, e bor kong ga ðëno ðëme. Bek ga Sbö tjšõkwo roy pjšú šër nopga judío ðëm wšeniyo šöng kës ši kong. 15Tja jek woydë jšõkoyo Roma kjokyo, Sbö tjšõkwo roy pjšú šër bomi kong eshko wšo e kjîshko. 16Tjšõkwo pjšú ëre šër wšo ga e šökyo bor kong ðëme. E dbo ara. Ëye omtjšõkwo kjrono ga döya Sbörë. Shärye eni judíoga kong bäm go, e irgo ga nopga judío ðëm wšeniyo kong bakoe. Šër ga šökyo bor kong ðëm e kjîshko. 17Miydëy tjšõkwo pjšú ëre go ga shji ie Sbörë ber pjšo bek ba bokso, shji mär ba go kjîshko, tak pjang ba tjšõkwo go sorë ši eni. Tjšê ga “Ëye mär Sbö go ga era ber pjšo bek ba bokso.” 18Nopga owa to šöng ðëbo owa shäryë obšë obšë, tjšõkwo bek ši miydëba ðëm wšo. Gueniyo Sbö sorë miydëy wšo ši, e miydara šok pjir tjän, pina Sbörë ba kong kjîshko. E kjîshko ga Sbö sök kjok dogo ši iirkë ba kong šok ara, ga shdûya kjangshko ga îgöy wêšëe. 20Kjok ëre shäryara Sbörë tek šëkong ga Sbö îgöy ðëme. Ðëbo shäryara ši îydë döe. Sbö sök jšõ, e sorë, ba dbo ara ši pjir ðëm, e miydëy pjšú e go, kjok ëre shäryara tek šëkong. E kjîshko ga “Miydororwa ðëme” še nopga širë ga äe. 21Sbö miydara šok ëmdë ga iara beno šok kësbang, tjwšõ ara ðëm, “Tjawa wopjšú bop tjok” šara šok ba kong ðëm bakoe. Opyono beno šöng ðëbo ðëno ðëm ši woyotjšîk erö, beno šöng wotjšîk drete. 22Epga kjok miydë ara še šok ëmdë ga beno šöng kjok miydë ðëme. 23Sbö wošon ðëm, e tjwšõ ara bakoe. Eni ëmdë ga poshrëya šok woydë ðëm, ga rayara šok. Ðëbo wošon wšo ši jyãgšo shäryara šok, no jyãgšo, sënwa jyãgšo, öng jyãgšo, äya kjšoshko so jyãgšo bako, ga beno šöng ba poshrëk shara. 24E kjîshko ga epga rayara Sbörë beno šöng ba wotjšîk owa ši tjok, ðëbo šökyo ara ši shärye šok ëng tjok wšo. 25Tjšõkwo bek ši rayara, Sbö miyde šok woydë ðëm kjîshko. Tjšõkwo bek ðëm ši kjrayde šok shara. Ðëbo shäryara Sbörë ši poshrëyde šok, gueniyo Sbö ba shäryaga šira poshrëra šok ðëme. Era poshrëkko îyado wšo. Ber eni. 26E kjîshko ga rayara Sbörë beno šöng ba wotjšîk owa, šökyo ara wšeniyo ši tjok. Wašëga ëmdë ga domerga woyde ame, opyono beno šöng ðëbo shäryako ðëm ši shäryë ëng tjok shara. 27Domerga eni bakoe. Wašëga woyde šok ame, wotjšîk pë domerga tjok erä. Ðëbo shäryako ðëm ši shäryara ëng tjok. Eshko ga ðëbo weno ba kong ši beno ba shdunggšo, ðëbo owa shäryara ši kjîshko. 28Sbö woyotjšîya šok woydë ðëm kjîshko ga epga rayara beno šöng ðëbo shäryako ðëm ši shäryë erä. 29Beno šöng ðëbo owa shäryë obšë obšë. Ðëbo owa shärye, wotjšîk dbur töng ba kong erö, wotjšîk owa obšë kong, no zröya, ëng dboryë kar kar iir go, jyõrkë, obšë îywa shjiktëng, 30obšë šãywe owa, Sbö îywa shjiktëng, ëng äyoshtë, krë ara, ðëbo owa wšêya obšë obšë, ba data, ba mekë koše ðëm, 31wotjšîk ðëm, ðëye še ši shärye ðëm, obšë woyde ðëm, obšë songe še ðëm bakoe. 32Sbö tjšêno ga ëye opshäryë eni ga e zrökko. E miyde šok pjšú, gueniyo shärye šöng eni wopjšú, obšë ðëbo owa shäryë eni ši îya šok ga šöng wopjšú e kjîshko bakoe.

will be added

X\