Apocalipsis 12

1E irgo ga ðëbo jyãgšo weno pjang kësbang kjok dogo. Wašë shäng kjšara eshko, doyono shäng dšo go wšeni, mok pjang ba dre dirko, ga dbala tjeng ba kä kjing kjwo sak kjwara kjingsho pjök (12), pjšu dšu iokšo wšeni. 2Wašë ši shäng kjšaraso ðëm, ga ay še ara, chida buk dörö kjîshko. 3Eshko ga ðëbo jyãgšo weno pjang kjrina obi. Äya kësbang sök kjšara kjšo srëzrþn, so Ööka kjoyoe. Äya ši kägä kjwo kjäk (7), pjšu dšu iokšo iak jong kjwara kjwara ši kjing go, sjö kjwang sak kjwara (10) bakoe. 4Dbala shdöktong beno kjringgwo mya. Ga kjrara kjrina ba pjšak go, ga dbura ter šok kjok ëre kjing go. Eshko ga öötong sök wašë ši bokshto, chida ši wen bukshko ga ue jekdo wšo še. 5E irgo ga chida buk kjšara domer. Ðono ga tjëyoga šöng kës ši iche kjange. Gueniyo eshko ga chida ši kjara Sbörë ey dwayo, ga söra jek öötong kjok dogo beno sök ba tjok. 6Wašë šira töktong jek öötong sök kjok shäryara Sbörë ba kong kjok dogro no ðëmshko šishko, ga dara Sbörë eshko dbargwo sak dbäw dbäw kjingsho sak dbäw pjšogšo pjök kjingsho sak tjer (1,260). 7E irgo ga Sbö parkaga kjok dogo so ko Miguel, e töno ba pjeyoga Sbö parkaga kjok dogo so tjok, ga ëngkjwono šok äya ši tjok, äya pjeyoga kjok dogo so ši tjok bakoe. 8Ga äya ši jenoe. E kjîshko ga epga beno šöng eshko kjok dogo ame. 9Äya ši dburaba ter kjok ëre kjing go, ba pjeyoga kjok dogo so ši tjok. Äya ši, dgur dënashko ši e. E kowëba Ä. Nopga Sbö miydë ðëm wšeniyo jyãpgwaga ši e. 10Eshko ga kur ga ëbo tjšêno dbo go kjok dogo. Tjšê ga “Eeri ga ba nopga döra Sbörë pjire. Bi pjeyoga rotaga shkë dba bi Sbö bokshto ši, e dburaba jer kjok ëre kjing go. E go ga Sbö dbo ara, Cristo dbo ara, e îy wêšëe. Ga Sbö beno sök bi pjšuyo. 11Ä zana bi pjeyogarë pjir, Öng Wšêp Ushko So Ðgwokšë srëng ši go, Sbö tjšõkwo šara šok ši go bakoe. “Tjawa mär Öng ši go” še šok, ga wošon ši bangkjre šok ðëme. 12E kjîshko ga pjãy šöng kjok dogo, pjãy wopjšúe. Gueniyo pjãy šöng kjok kjing go, pjãy šöng dšung roy, pjãy song jšõe. Ä to jer öötong shäng bomi shwoy, ga iirkë ara, dbar ba kong beno sira dö kjîshko. Pjãy šöng song jšõ e kjîshko” še. 13Äya so Ööka kjoyo ši šono ter kjok ëre kjing go eni. Miydarashko ga to shäng chida ši mekë irpjang. 14Gueniyo wašë ši kong, sjàgä twara Sbörë ko pjök, këskës, döbung sjàgä wšeni. E irgo ga sjàgä ši go ga dbuktong to, öötong sök kjok shäryara Sbörë ba kong kjok dogro no ðëmshko šishko, shaya dgur širë ga ä šishko, ga dara Sbörë eshko, šu pjšogšo sak mya kjingsho bëy. 15E irgo ga di ichara dgur širë tur ba kjak roy dwayo, di kës wšeni, wašë ši söya di širë wšo še. 16Gueniyo wašë ši kjimtara kšung širë, jyã dšoktong, ga di jer ši dwara pjire. 17E kjîshko ga äya ši iirkono ara wašë ši kong, ga to ëngkjwë ba tjëyoga tek beno ba irgo ši tjok. Nopga Sbö tjšõkwo košaga mär šöng Jesús go ši epga. 18Äya šira beno sök dšung sor go erä.

will be added

X\