Apocalipsis 11

1Eshko ga tja kong kjorkwang twara ëborë kjšara, ðëbo tjšîkkšo wšeni, ga tjšê bor kong ga “Pja kojõs, pja nom Sbö u tjšîk, öng sho sukkšo jong ba zšong bäng ši tjok, ga šöng ba poshrëk eshko ši shtëp bakoe. 2Gueniyo ba u bäng kjako ši tjšîp ðëm, e twak beno tjeng nopga judío ðëm wšeniyo ši kong. Sbö kjokyo Jerusalén, e twak beno tjeng ba wšoshko, epga jek šöng, tek šöng e roshko mogšo sak pkëng kjingsho pjök (42) wšo. 3Eshkoshko ga nopga ichër do pjök, bor tjšõkwo roy šë oba kong dbargwo sak dbäw dbäw kjingsho sak dbäw pjšogšo pjök kjingsho sak tjer (1,260) wšo. Ga shärye šok eni, doyono šöng sopokkšo shwongyo go” še. 4Kjok ëre Tjšapgayo ši bokshto ga kjor šok do pjök ko olivo, iök shjiy bapkwo šok do pjök bakoe. Kjor ši, iök bapkwo ši, e nopga do pjök ši jyãgšo. 5Ëye tjwe ba shdung šeshko ga iök to tur nopga do pjök ši kjak roy dwayo, ga ba wšoyoga tjwe šöng ši pjiya drete. Ëye ba shdung woydë ga wošon eni kjšuwe. 6Epga kong dbo twaraba, shunyo sšong, äär jong Sbö tjšõkwo šara pjir guing. Ga kong dbo twaraba obi, di kjšopswë ber srëng wšo, swšo obšë obšë ichë tjwe kjok ëre kjing go wšo bakoe. 7Sbö tjšõkwo šara šok pjir irgo ga äya owa sök pjšëbgwo jong rong anmoyõ šishko ši shrono shäng ëngkjwono ba tjok, ga epga zröra. 8E irgo ga ba doyo beno tjeng kjok tjwšõ ara ši irbo bäng go, Tjšapga Jesús zröraba pjang kjšös go dënashko kjokyo šishko. Kjok eshko ši, e so Sodoma kjokyo, Egipto kjokyo, e kjoyoe. 9Ga nopga tjwe shinmoga tjeng ši îk ara, tjëyoga obšë obšë uunkong, nopga tjšê tjšõkwo obšë obšë uunkong, kjok shto obšë obšë uunkong sopga bakoe. Öör šöng eni äär jong dbargwo mya kjingsho bëy, gueniyo ëye wotjšîno ba doyo tjeng ši jnek ðëme. 10Eshkoshko ga nopga šöng kjok ëre kjing go beno šöng wopjšú, ga ðëbo twara šok ëng kong, ba sënggšo, shinmoga wošono dbaryo ši shrëk wšo. Shäryara šok eni, šöng së obishko ga nopga ši shduna Sbö tjšõkwo šagaga širë ara kjîshko. 11Gueniyo öötong dbargwo mya kjingsho bëyshko ga woshrara Sbörë iröng obi, ga kojongö šöng. Îya nopga šöng širë ga bangkjre šok ara anmoyõ. 12Eshko ga ybö kura nopga do pjök širë ter kjok dogo dwayo pjšara, tjšêno dbo go. Tjšê ba kong ga “Pjãy tëmö” še. Ga îya ba wšoyogarë šöng wopro ga to jem kjok dogo, pjäng sho roshko. 13Jekdo eshko ga yo to jem kësbang. Kjok eshko ši shdöktong beno kjringgwo sak kjwara (10), ga kjrina šishko ga u šok ši toktong pjir, ga nopga wošono dogšo sak dbäw dbäw pjšogšo kjäk (7,000). Beno šöng së ši, Sbö sök kjok dogo ši bangkjrara šok ara, ga iara šok beno kësbang, tjwšõ ara bakoe. 14Ðëbo owa anmoyõ pjök ši jek tjän. Gueniyo kjrina obi ši tjwe döröe. 15E irgo ga Sbö parkaga kjšara obi, ba wši bakwara, e tjok ga öötong pjšogšo kjäk (7). Eshko ga ëbo tjšêno šok dbo ara kjok dogo. Tjšê ga “Bi Tjšapga, ba Cristo, e öötong beno šöng nopga šöng kjok kjing go ši pjšuyoga, ga iche šok îyado” še. 16E irgo ga tjšapgaga kjok ðgwega wšeniyo dogšo sak pjök kjingsho pkëng (24) šöng Sbö bokshto, ba pjšu sökkšo kjwara kjwara kjing go ši kjök tono, ga Sbö poshrëra šok, 17tjšê ga “Tjšapga Sbö, ðëye shäryëp woydë ši shäryëp ga pjšúe. Pja sök îyado. Bop dbo ara go ga pja öötong sök nopga šöng kës ši ichaga. Tjawa wopjšú bop tjok e kjîshko. 18Tjëyoga šöng kës ši iirkono ara bop kongshko ga pja iirkono ara ba kong šok bakoe. Shinmoga ðgwezšong dbaryo ši öötonge. Bop parkagaga, bop tjšõkwo šagaga, ba potjwšêzšong dbaryo ši öötong bakoe. Bop nopga tjwšõ ara, tjwšõ chira, bop ko bangkjragaga šöng kës, epga potjwšêp pjire. Ga kjok pjiga ši pjip drete” še. 19Eshko ga Sbö u jong kjok dogo ši u bäng roshwinaba jong oojong, ga roshko ba tjšõkwo woyoshrokšo bapkwo buk ši înor. Eshko ga ðgwšëng tur jong ðetðet ðaw pogo, kjrik ri ri še ara, yo ian pjang, di zeng shrono ter kjwošong ara bakoe.

will be added

X\