Filemón 1

1Kjibokwo ëre taga tja Pablorë, bi kjšara Timoteo tjok. Tja sök kjërshko. Tja bängzak shäng jûshko, Cristo Jesús tjšõkwo kjîshko. Filemón, pja parkë shäng borwa tjok, ga pja woydërwa ara. Kjibokwo ëre ichërwa jek bop kong, 2borwa dor Apia kong, borwa kjšara Arquipo kong, Jesús tjšõkwo kjragaga tön šöng bop ushko ši kong bakoe. Arquipo parkë shäng Jesús kong borwa tjok. 3Rokër bi Data Sbö kong, Tjšapga Jesucristo kong ga ba wopjšú ši kjîshko ga pjãy kjimte šok ara, pjãy ie ber šöng wšêp bakoe. 4Filemón, pja roy kuror ga pja mär shäng Tjšapga Jesús go, ba tjšõkwo kjragaga woydëp ara bakoe. E kjîshko ga tja syõshtë Sbö kongshko ga pja woyotjšîn ga tja wopjšú bor Sbö tjok bop kjîshko. 6Rokër Sbö kong ga pja kjimte jëk pjšú tjšõkwo kjragaga ši tjok jek këgong, ðëbo pjšú twe Cristorë bi kong ši miydëp uunkong wšo. 7Pja bor kjšara. Tjšõkwo kjragaga ši kjimtëp ara, ga epga šöng wopjšú bop kjîshko. E kjîshko ga tja wopjšú, woowa ðëme. 8E kjîshko ga ðëbo rokër bop kong. Tja kong dbo twara Cristorë kjîshko ga pja ichër ba shäryë dbo goshko ga pjšúe. Gueniyo ga shji ëng woydë ara kar kar kuzong ga pja ichër woydë eni ðëme. Tja tjšabša tjän, ga tja bängzak shäng kjërshko, Cristo Jesús tjšõkwo kjîshko. 10Eni ga ðëbo rokër bop kong Onésimo kjîshko. Tja sök kjërshko, orkwo kjrochak pjir dröng sho goshko wopro ga e Jesús tjšõkwo kjrono, ga beno bor wa wšeni e kjîshko. 11Dënashko ga sök bop tjokshko ga e bop kong ga ðëno ðëme. Gueniyo eerishko ga e beno tjwšõ ara bop kong shara, tjwšõ ara bor kong bakoe. 12E ichër jek bop kong iröng obi, woydër ara bor wa wšeni gueniyo. 13Tja bängzak shäng Jesucristo tjšõkwo roy pjšú ši kjîshko. Eni ga pja shäng jûshko kjwe ga miydër ga tja kjimtëp. E kjîshko ga woydoror ga e ber sök bor tjok bop ãska. 14Gueniyo ga shäryër eni ðëme. E bopoya kjîshko ga ðëbo shäryër woydë ba tjok ðëm, kjakrokër bop kong guing. Tja kjimtëpshko ga woydër ga shäryëp bop woshko, pja ichoror ba shäryë dbo go kjîshko ðëme. 15Tja wotjšîk ga töktong bop ushko dwayo dbar kjwöbö ga pjšúe šër. Eerishko ga äär iröng ber sök bop tjok îyado wšo shara. 16Ber bop parkaga tjwšêk shäng pjir wšeniyo dö ame, ber bop kjšara, woydëp ara wšeniyo bakoe. Tja omwoydë ara, gueniyo ga woydër ga pja omwoydë e kjinmo. Ber bop parkaga dö ame, ber bop kjšara bako, mär shäng Tjšapga Jesús go kjîshko. Woydër ga pja omwoydë ara e kjîshko. 17Eni ga bop kong ga tja bop kjšara šëp wšeni ga Onésimo wšokjrëp, tja wšokjrorop wšeni. 18Ðëbo shäryara bop kong owa, pogo tjwšõ bop kong wšeni ga ba tjwšõ ši rokëp ba kong ðëm, rokëp bor kong dey. 19Tja Pablo, tjšõkwo ëre tër bop kong bor orkwo om go go shara. Pogo tjwšõ bop kong kjöme ši tjwšêngga tjarë bop kong. Pja döktong, tjšõkwo šoror bop kong ši kjîshko. E kjîshko ga pja pogo tjwšõ bor kong ara bakoe. Gueniyo woyoshrër woydë bop kong ðëme. 20Pja bor kjšara. Ga shji töno beno tjeng Cristo tjok kjîshko ga ðëye rokër bop kong ši shäryos bor kong eni. Eni ga tja ber wopjšú eshko. 21Miydër ga ðëye rokër bop kong ši, e shäryëp eni. Miydër ga shäryëp e kjinmo bakoe. Kjibokwo ëre tër bop kong e kjîshko. 22Ðëbo rokër bop kong kjrina obi. Pja syõshtë Sbö kong ga tja kjimte äär eshko iröng obi. Ga tja kong shto wšêp kjrina, tja äärshko ga tja ber sök kjone shtoyo tjok wšo. 23Bor kjšara Epafras, “¿Pja yonde?” še bop kong. E shdung shäng bor tjok ëreshko, Cristo Jesús tjšõkwo kjîshko. 24Marcos, Aristarco, Demas, Lucas, “¿Pja yonde?” še šok bop kong bakoe. Tja kjimte šok bor pak shäryë. 25Rokër Tjšapga Jesucristo kong ga ba wopjšú ši kjîshko ga pja kjimte ara.

will be added

X\