Filipenses 4

1Era eni ga pjeyoga, pjãy wokjang, pjãy šöng Tjšapga Jesús tjok îyado. Pjãy woydër ara. Pjãy în woydë ara. Tja iëmi ber wopjšúe. Pjãy beno bor potjwšêkkšo wšeni, tja parkono Sbö kong ara kjîshko. 2Wašëga tjeng eshko do pjök ko Evodia, Síntique. Rokër ba kong ga töno beno tjeng Tjšapga Jesús tjok kuzong ga jëk šöng wopjšú ëng tjok, epenga dö wšeni. 3Pja bor kjšara, ga woydër ga pja ber shäng ba kjimtaga. Epga parkono šöng Jesús roy pjšú shdök bor tjok pjšúe. Clemente, bi pjeyoga obšë, epga parkono šöng bor tjok eni bakoe. Ëye ber šöng së îyado Sbö tjok wšo ga ba ko, e tak pjang Sbö kjibokwoyo go. Ga pjãy ko tak šok e go bakoe. 4Pjãy šöng mär Tjšapga Jesús go kuzong ga pjãy ber šöng wopjšúe. Šër jek obi ga pjãy ber šöng wopjšúe. 5Ðëbo shäryozî obšë kong yõtso, pjãy šöng wopjšú oba kong šëba wšo. Tjšapga Jesús, e tjwe döröe. 6Shji woydë ðë kjîy ðëme. Pjãy sorëborë ga pjãy syõshtos Sbö kong, “Tjawa kjimtozong” šozî ba kong. Ga pjãy syõshtëshko ga “Tjawa wopjšú bop tjok” šozî ba kong eni bakoe. 7Eni ga pjãy töno beno tjeng Cristo Jesús tjok kuzong ga pjãy ie Sbörë ber šöng wšêp, pjãy woydë ame wšo. Shji nopga kong ga shärye eni ši, e ðëbo kësbang, e shay uunkong ber tjeng bi kä roy ga äe. 8Era eni ga pjeyoga, ðëbo bek ši, e woyotjšîzî eröe. Bangkjrako ši, bek ši, owa ðëm ši, wošëso ši, woydako ši, roy pjšú ši, e woyotjšîmirë. 9Ðëye šoror bomi kong kuromi ši, e shäryozî eni. Ðëye shäryoror înomi sorë ga pjãy omshäryos eni bakoe. Eni ga pjãy ie Sbörë ber šöng wšêpe. 10Tja kong ðëbo shäryëmi kjwšë jã. E go ga miydër ga tja woyotjšîmi šönge. E kjîshko ga tja iara Tjšapga Jesúsdë beno sök wopjšúe. Tja woyojeromie šër ðëme. Miydër ga tja woyotjšîmi šöng îyado. Tja kjimtëmi šoromi ara, gueniyo tja kjimtëmi ga ä öötong dbar kop ara. 11Šër bomi kong eni, ðëbo woydër obi kjîshko ðëme. Tja sorë pogo ga tja oppino sök wopjšúe. 12Shji ðëye dret ga e sorë miydër. Shji ðëbo ara ga e sorë miydër bakoe. Tja dši arare, de tja pjši ara, tja ðëbo arare, de tja ðëye dret, eshko ga tja oppino sök wopjšú îyado. 13Tja kjimte Tjšapga Jesúsdë kjîshko ga ðëbo uunkong eniyo shäryër ga pjšúe. 14Eni gueniyo ga tja songshko ga tja kjimtoromi ši, e pjšúe. 15Jesús roy pjšú šër soyër shäng pjãy Filipos sopga kongshko ga tja opshino jek bomi kjokyo Macedonia dwayo. Eshko ga dbur ichoromi bor kjimtokšo. Tjšõkwo kjragaga shto obšë so šira, tja kjimtara kjšara ðëme. E miydoromi tjän. 16Tja sök Tesalónica kjokyo ëmdë ga dbur ichoromi bor kjimtokšo pjšaraso ðëme. 17Tja wotjšîk ðëbo ichoromi ši kjrë erö ðëme. Woydër ga pjãy kong ðëbo twe Sbörë ara e kjîshko. 18Ðëbo ichoromi Epafrodito tjok ši, e kjroror pjir tjän. E tjok ga öötong woydoror ši kjinmo, ðëye woydër ame. Ðëbo ichoromi ši, e beno Sbö kong pjšú, šõ pjšëbšë, öng zröraba, sho suraba, pjono dret, ba poshrëkkšo wšeni. 19Bor Sbö, e ðëbo ara. Eni ga ðëye woydëmi ši, e twe bomi kong pjir, pjãy töno beno tjeng Cristo Jesús tjok kjîshko. 20Bi Sbö, e bi Data. E poshrëy, iëy ber kësbang, tjwšõ ara îyado wšo. Ber eni. 21”¿Yonde?” šëmi Sbö nopga töno beno tjeng Cristo Jesús tjok šöng ši kong. Pjeyoga šöng bor tjok ëreshko ši, “¿Pjãy yonde?” še bomi kong. 22Jesús tjšõkwo kjragaga šöng kës ši, “¿Pjãy yonde?” še bomi kong. Tjšõkwo kjragaga parkë šöng pjšu kësbangyo ushko ši, “¿Pjãy yonde?” še bomi kong bakoe. 23Rokër Tjšapga Jesucristo kong ga ba wopjšú ši kjîshko ga pjãy kjimte ara. Ber eni.

will be added

X\