Filipenses 3

1Era eni ga pjeyoga, pjãy šöng mär Tjšapga Jesús go kuzong ga pjãy ber šöng wopjšú e go. Tjšõkwo toror bomi kong ši tër bomi kong jek obi. Tja kwšeya ba të ðëme. E ber bomi wšikokšo wšeni. 2Pjãy sjëk, nopga owa šöng ðëbo owa shäryë wšeniyo tjok. Epga so shjiti kjšoshko so kjoyoe. To šöng tjšê ga “Woyde ga shji opsho zë, shji ber jyã tak pjir Sbö î wšo” še šok eni. 3Miga jyõ erä. Jyã tak pjir Sbö î jšõkoyo ši shji. Shji kjimte ba Sëyarë ba poshrëk. Shji töno beno tjeng Cristo Jesús tjok. Shji mär ðëbo shäryëy om go ši go ðëme. Shji jyã tak pjir Sbö î jšõkoyo e kjîshko. 4Shji där ðëbo shäryëy ši go kjwe ga där bäm go ši tja. Tja ðëbo pjšú shäryono ara anmoyõ, obšë kjinmo. 5Tja buk chirawa öötong dbar kjwongshko (8) ga tja doyo jyã taraba pjire. Tja Israel tjëyo, tja Benjamín tjëyo bakoe. Tja hebreo jšõkoyo tek dämär dwayo. Dënashko ga tja fariseo. E kjîshko ga tja jëk to shäng pjšo bek kjok ðgwekkšo tara Moisésdë ši go. 6Tja parkë woydë Sbö kong jšõkoyo. E kjîshko ga Jesús tjšõkwo kjragaga irpjanor, shdunor ara. Kjok ðgwekkšo ši, e söror beke. Tja ðëbo owa shäryono šëba ga äe. 7Dënashko ga tja mär ðëbo tjeng kës ëre go. Gueniyo eerishko ga tja mär shäng Cristo go shara. E kjîshko ga bor kong ga ðëbo ëre tjwšõ drete. 8Cristo Jesús, e bor Tjšapga. E miydër woydë pjšúe. Tjwšõ ara anmoyõ ši e. Ðëbo obšë kës ši, e ber bor kong ga tjwšõ drete. Cristo kjîshko ga ðëbo kës ši, e rayoror pjir, bor kong ga ioror beno tjwšõ ame, ðëbo dburoy wšeni. Woydër ara ši, e Cristo. 9Woydër ga tja ber baîya. Tja ber pjšo bek Sbö bokso wšo ga woyde ga tja jëk pjšo bek kjok ðgwekkšo tara Moisésdë ši go ðëme. Woyde ga tja mär Cristo go dey. Eni ga tja ie Sbörë ber pjšo bek ba bokso. 10Cristo, e miydër woydë pjšúe. Cristo woshrara Sbörë iröng obishko ga ba dbo ara pina bi kong wêšëe. Ba dbo ši miydër woydë bakoe. Cristo shdunaba ara, ga zrörabae. Woydër ga tja shdungoba eni bako, ga tja wošon woydë baîya dik bebi. 11Woydër eni, ðono ga nopga woshre Sbörë iröng obishko ga tja woshre ba tjok bako wšo. 12Tjšõkwo šoror kës ëre wšênor pjir, e šotë ðëme. Tja iara Sbörë beno pjšo bek tjän, e šotë ðëm bakoe. Gueniyo tja jeke. Tja kjrara Cristo Jesúsdë, e miydër pjšú wšo. E kjîshko ga tja drön ara, e miydër wšo. 13Pjeyoga, tja öötong tjän, e šotë ðëme. Gueniyo tja wotjšîno to katöe. Ðëye shäryono tjän ši, e woyotjšîn ame, ðëbo wen tjwe ši woyotjšîntë. 14Tja töna Sbörë beno tjeng Cristo tjok ga tja rokara jem sök ba tjok îyado wšo, ðëbo twe ber bor kong wšo. E kjîshko ga tja drön ara, kjrër wšo. 15Woyde ga shji wotjšîk këkboga dik. Pjãy kjone kjone wotjšîk obšë sira wšeni ga pjšú ši pîya Sbörë bomi kong, miydëmi wšo. 16Ðëye shäryëy kjone pogo ga woyde ga shji jëk šöng tjšõkwo bek miydoroy tjän ši go. 17Pjeyoga, tja omshäryë shäng sorë ga pjãy omshäryos uunkong eni bakoe. No kjone kjone šöng bomi tjrëko omshäryë šöng pjšú borwatoy dik. Pjãy omshäryos baîya dik bakoe. 18Tjšõkwo šoror bomi kong ara tjän ši, e šër bomi kong jek pjšara obi, ga tja sšar ëëe. Nopga ara omshäryë pjšú ðëme. Cristo wošono pjang kjšös go ši, ba kong ga tjwšõ ðëme še šok wšeni. 19E beno tjeng shdungko îyado wšo. Wotjšîk Sbö ðëme. Wotjšîk ðëbo tjeng kjok ëre kjing go eröe. Wotjšîk šöng ðëbo ber pjšú ba doyo kong ši shäryayde. Zok ga ðëbo owa shäryara ši, e kjwe šökyokjre ara, gueniyo eni ðëme. Roy shdöya šok wopjšúe. 20Gueniyo ga shjira kjok ëre so ame. Shji iara Sbörë beno šöng kjok dogo so tjän, ðono ga shji äär ber šöng ba tjok eshko wšo. Bi döga tjwe eshko dwayo ši koshoydë šöng. Tjšapga Cristo Jesús ši e. 21E dbo ara, ðëbo tjeng kës ši iche ga pjšú wšo. Ga ba dbo go ga bi doyo tjwšõ ðëm ëre kjšopswe ber wošëso, baîya dik, e sök kjok dogo doyo sorë ga eni.

will be added

X\