Filipenses 2

1Eni ga pjãy töno tjeng Cristo tjok kuzong ga pjãy kong dbo twe îyado. Pjãy woyde ara kjîshko ga pjãy woydë ðëme. Sbö Sëya tjeng bomi tjok îyado. Pjãy songe še Sbörë bakoe. 2Eni kuzong ga ðëye šër bomi kong ši shäryozîa. Pjãy wotjšîs jong kjrinaso, ðëye woyotjšîmi kës ši shäryëmi ga pjšú wšo. Pjãy ëng woydos ara kar kar, pjãy ber šöng ëng tjok wopjšú wšo. Shäryoromi eni ga tja ber wopjšú kësbang eshko. 3Pjãy ðëbo shäryë, pjãy äär ber tjwšõ ara wšo šëmi ðëme. Pjãy opyë tjwšõ ara obšë kjinmo ðëme. Obšë iozî ber tjwšõ ara bomi kjinmo dey. Pjãy ber wotöshko. 4Pjãy ðëbo wšêk pjšú bomi kong dö ðëme. Wšêzî ber pjšú obšë kong bakoe. 5Cristo Jesús, e wotjšîk sorë ga pjãy wotjšîk eni bakoe. 6Kjok shäryayde Sbörë ðëm obishko ga e Sbö jšõkoyo, tjwšõ baîya dik bakoe. Gueniyo ga “Tja ber sök jûshko tjwšõ ara îyado wšo” šara ðëme. 7Opyono beno shäng tjwšõ ðëm, parkaga tjwšêk shäng pjir wšeniyo dik, weno no, so shji kjoyoe. 8Eshko ga opyono beno shäng wotöshko anmoyõ. Ba Data košara kjîshko ga opyono beno wošon pjang kjšös go, nopga owa wšeni. 9E kjîshko ga iara Sbörë beno tjwšõ ara anmoyõ, obšëga kës ši kjinmo. 10Shäryara eni, uunkong kjök tok ba kong wšo, ëye šöng kjok dogo, ëye šöng kjok ëre kjing go, ëye šöng kšung ëre dorko bakoe. 11Eshko ga “Jesucristo, e bi pjšuyo jšõe” še šok uunkong. Eni ga Data Sbö ber tjwšõ ara bakoe. 12Pjeyoga, Sbö, e drön ëë bomi tjok, ðëye še ši shäryëmi eni wšo. Tja shäng bomi tjokshko ga tja košoromi pjšúe. Era eerishko ga tja shäng pjola ga woyde ga pjãy drön ëë, Sbö košë, bangkjrë îyado wšo. Pjãy döra ðëbo pjšú ëre kong wšo. 14Ðëye shäryëmi dö ga shäryozî šöng wopjšúe. Shji kjšoshtë ðëm, shji ëng dboryë kar kar ðëm bakoe. Eni ga pjãy šöng pjšo bek, pogo ðëye dret Sbö bokso. Pjãy Sbö wapga tjän, pjãy šöng nopga owa jëk šöng pjšo bek ðëm ši tjrëko gueniyo. E kjîshko ga pjãy ðëbo owa shäryë ðëme. Eni ga shji ber šöng së jšõkoyo sorë tjšõkwoyo ši šëmi nopga kongshko ga pjãy îya šok ga obšë, dbala šok shjiy kjok ro sî roshko wšeni. Eni ga Cristo tjwe iröng obishko ga tja wopjšú bomi kjîshko, pak shäryoror ši beno tjwšõ ara kjîshko. 17Pjãy mär šöng Jesús go kjîshko ga pjãy shdungoba šöng songe. Ga miydër ga tja kjwe zrökoba, tjšõkwo šoror bomi kong kjîshko. Eni ëmdë ga tja wopjšúe. Tja wopjšú bomi kjîshko bakoe. 18Pjšú wšo ga ðëye wen bomi kongshko ga pjãy šöng wopjšúe. Ga pjãy ber wopjšú bor kjîshko bakoe. 19Pjãy roy miydër woydë, tja ber wopjšú wšo. E kjîshko ga tja kjimte Tjšapga Jesúsdë ga Timoteo, e ichër jek mašing bomi îk, pjãy roy söya bor kong wšo šër. 20Ðëbo ber pjšú bomi kong sorë ši woyotjšîya shäng jšõkoyo îyado botoya dik. Ëye obšë, pjãy woyotjšîya eni ðëme. 21Ðamo šöng ëreshkora, ðëbo baîya woyotjšîyde. Ðëbo Jesucristo î, e woyotjšîya šöng ðëme. 22Gueniyo Timoteora parkë shäng bor tjok Jesús roy pjšú šë oba kong, wapga parkë šöng ba data tjok sorë ga eni. E miydoromi tjän. 23Eni ga ichër woydë jek bomi îk, tja därde, de tja där ðëm, e miydoror guing. 24Ga miydër ga tja kjimte Tjšapgarë wop ä ga jek bomi îk bakoe šër. 25Bi kjšara Epafrodito, e ichoromi tek bor kong, tja kjimte bomi ãska wšo. E parkono shäng bor tjok pjšú, dröno ara bor kjimtë Cristo roy šë. Gueniyo pjšú wšo ga ichër jek woydë bomi shwoy iröng obi. 26Pjãy îya woydë arae. Miyde ga swšo ara roy kuromi, ga woydë ara e kjîshko. 27Öör buk swšo ara jšõe. Wošono seke. Gueniyo songe šara Sbörë, ga kjimtara. Ðëye shäryara ba kong ši beno bor kong pjšú bakoe. Tja song îyado. E wošono kjwe ga tja beno sök woydë ara eshko. 28E kjîshko ga ichër jek woydë bomi shwoy mašing, înomishko ga pjãy ber šöng wopjšú obi wšo, tja sök woydë ba kjîshko ame wšo. 29Tja kjimtëmi om go ga ä kjîshko ga shrono shäng na bor kjimtë bomi ãska. Parkë shäng Cristo kong ëreshkoshko ga wošono seke. E kjîshko ga jek öötong shäng bomi shwoyshko ga wšokjrozî šöng wopjšú, bomi kjšara wšeni. Ëye parkë baîya dik ga bangkjrozî bakoe.

will be added

X\