MATEO 7

1”“No obšë ðëbo owa shäryono” šëy ë kong ðëm, pjãy ðëbo owa shäryono še Sbörë ðëm wšo. 2Obšë woyotjšîmi sorë ga pjãy woyotjšîya Sbörë eni bakoe. Shäryëmi obšë kong sorë ga shärye Sbörë bomi kong eni bakoe. 3”Bomi kjšara bok bäng kjor pjšoyo îmi kjër. E wopro ga bomi bok roshko kjorkwang buk kjwangna ši îgömi ðëme. ¿Shäryëmi eni egaro? 4¿Pjãy bok roshko kjorkwang buk kjwangnashko ga “Kjor pjšoyo buk bop bok bäng kjwe shir bop kong” šëmi bomi kjšara kong sorëro? 5¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Kjorkwang buk bomi bok roshko ši shizî bäm go. Enira kjor pjšoyo buk bomi kjšara bok bäng ši îgömi wêšë, shimi ba kong wšo. 6”Ðëbo Sbö î ši twëmi ba wšoyoga kong ðëm, e so shjiti kjšoshko so sëmirë wšeni. Eni ga tek workwë bomi kjing go iröng obi, ga pjãy ue. Bomi obrikkwo tjwšõ ara wšeniyo dbumi köchi kong ðëme. Eni ga sho shgšëya bomi shjiryo drete. 7”Ðëbo rokozî Sbö kong, ga twe bomi kong. Ðëbo wšêzî, ga wšêmi. “U bäng bäng dözî bor kong” šozî, ga där bomi kong. 8Ëye ðëbo rokë ga e kjre. Ëye ðëbo wšêk ga e wšêya. Ëye “U bäng bäng dözî bor kong” šë ga e där ba kong. 9”¿Data kjone dey ga kong dši roke ba warëshko ga kong apkwo twaydero? 10¿Ga kong mã rokeshko ga kong dgur twaydero? 11Eni ga pjãy nopga owa ëmdë ga pjãy wotjšîk ðëbo pjšú twë bomi wapga kong. Eni wšeni ga bomi Data sök kjok dogo ši kong ðëbo rokëmishko ga pjãy kong ðëbo twe pjšú anmoyõ. 12”Eni ga pjãy ðëbo shäryos obšë kong, woydëmi ga shärye šok bomi kong sorë ga eni. Pjãy omshäryë enira kjok ðgwekkšo tara Moisésdë ši, tjšõkwo šara Sbö tjšõkwo šagaga tek dënashko sorë ši, e shäryëmi šöng uunkong. 13”Pjãy opzrëk jek kjër bäng bam chira ši go. Irbo jek jong äär nopga shdûya ber tjeng îyado shtoyoshko ši, e kjang ðëm, kjëryo u bäng bam ee bakoe. Nopga jëk ara e go. 14Gueniyo irbo jek jong äär shji ber šöng së îyado Sbö tjok shtoyoshko ši, e kjang, kjëryo u bäng bam chira bakoe. Nopga jëk e go kjšöbö döe. 15”No kjone kjone to šöng tjšê ga “Tja Sbö tjšõkwo šaga” še, gueniyo ichaga Sbörë ðëme. Tek šöng bomi shwoy öng wšêp ushko so wšeni, miga pjãy shaywa, ue wšo še, shjiti kjšoshko so dik. 16Kjiðgwo bo kjrëy shkö sho doyo go ðëme. Kjor bo kjrëy shkšik doyo go ðëm bakoe. Eni ga ðëye shärye nopga širë goshko ga epga sorë miydëmi wêšëe. 17Kjor doyo pjšú ga ba bo, e pjšúe. Kjor doyo owa ga ba bo, e owa. 18Kjor bo owa wšêy kjor doyo pjšú goshko ðëme. Kjor bo pjšú wšêy kjor doyo owa go ðëm bakoe. 19Kjor šok bo owa kjšobi ši kòy, suy wšo. 20Eni ga Sbö tjšõkwo šagaga kjok ëre so ši miydëmi ba bo go. 21”Oba ara tjšê bor kong ga “Pja bor Tjšapga jšõkoyo” še. Gueniyo epga kjone kjone äär ber šöng Sbö sök no pjšuyo îyado šishko ðëme. Ëye bor Data sök kjok dogo ši košë ga äär ber ba nopga eröe. 22No ðgwezšong dbaryoshko ga oba ara tjšê bor kong ga “Pja borwa Tjšapga jšõkoyo. Bop tjšõkwo šororwa ara. Bop ko go ga Ä sëyaga tjeng oba goshko ši ichororwa toe. Bop ko go ga ðëbo îydëba ðëm wšeniyo shäryororwa ara” še. 23Gueniyo eshko ga tja tjšê ba kong ga “Pjãy bor nopga ðëme. Pjãy nopga owa erä. Pjãy opkjos bor shwoy ëre dwayo” šër ba kong eni. 24”Ëye, tja tjšõkwo kuya, ga ðëye šoror ši shärye ga e so domer u ywaga kjšara kjoyoe. U shäryarashko ga shwšeyo pjšona rong, ga ak iara ba so bäng pjribrie. Shäryara pjir ga shunyo shrono, di to jer, pjšuk shrono träk ðëm, pjono u ši goshko ga to wito ðëm, ba shwšeyo pjšong šok rong, ak roshko kjîshko. 26”Gueniyo ëye, tja tjšõkwo kuya, ga ðëye šoror ši shärye ðëm ga e so domer u ywaga obšë kjoyoe. U shäryarashko ga shwšeyo pjšona uriso, rong ðëme. Shäryara pjir ga shunyo shrono, di to jer, pjšuk shrono träk ðëm, pjono u ši goshko ga skwara pjir, söra dirë drete” še. 28Tjšêno pjir ga nopga uunkong šöng ši beno šöng yëy še erä, pina sorë ši kjîshko. 29Tjšõkwo šara jšõkoyo, dbo ara go, še no pinggaga kjok ðgwekkšo tara Moisésdë go širë dik ðëme.

will be added

X\