MATEO 24

1E irgo ga Jesús opshino jek Sbö u jong šishko dwayo. Jëk shängshko ga ba oppinggaga tek šöng ba zšong bäng ga tjšê šok ba kong ga “U šok ëre îzong” še. 2Kuya ga tjšê ba kong ga “¿U šok ëre îmi šöngde? Šër bomi kong jšõkoyo ga ëreshko akkwo ëmdë ber tjeng ëng kjing go kjwara ðëme. Ðëbo tjeng kës ëre pjir ber drete” še. 3E irgo ga jem öötong šöng Olivos dšupyo ga Jesús sirkeno sök eshko. Ba oppinggaga tek šöng ba zšong bäng, tjšê ba kong tjoksa wšo. Eshko ga tjšê šok ga “¿Ðëye šëp shäng ši, e shäryë ðono? ¿Pja tjwe iröng dörö ši jyãgšo wen ðë? ¿Kjok pjir dörö ši jyãgšo wen ðë?” 4”Pjãy sjëk, pjãy jyãpgwëba ðëm wšo. 5Eshko ga nopga wen tjwe ara tjšê ga “No pjšuyo ichara Sbörë shrono shäng ši tja” še. E go ga oba jyãpgwe ara. 6”Roy kumi ga oba ëngkjwë kjok shto obšë obšë arashko ga ðëye bangkjrëmi ðëme. E shäryë eni kjšuwe. Gueniyo eshko ga kjok pjir dbaryo ši äätë ðëm obi. 7Tjëyoga obšë obšë ëngkjwë šok ëng tjok. Nopga kjok shto obšë obšë so ëngkjwë šok ëng tjok bakoe. Pjši tjwe ara kjok shto obšë obšë. E ga yo tjwe ara kjok shto obšë obšë bakoe. 8Gueniyo ðëbo wen tjwe owa anmoyõ ši soye ðëbo kës ëre go kjwšë jã. 9”Eshko ga pjãy twëba kjok ðgwegaga kong, pjãy shdûya šok wšo, ga pjãy zröya šok bakoe. Bor kjîshko ga pjãy îywaba shjiktëng kjok kjwang jîkong. 10Eshkoshko ga nopga ara mär bor go ame. Epga ëng îywõ shjiktëng, ëng rotë kar kar, ëng twë kjok ðgwegaga kong bakoe. 11Eshko ga nopga ara to šöng tjšê ga “Tja Sbö tjšõkwo šaga” še, gueniyo e ichaga Sbörë ðëme. E go ga oba jyãpgwe ara. 12Eshko ga nopga wotjšîk owa ëng kong ara. E kjîshko ga nopga šöng ara ëng woydë ame. 13Gueniyo ga ëye mär bor go äär jong ba dbo go ga era där ber shäng pjšú îyado. 14Sbö ber no pjšuyo sorë ši roy pjšú, e shdär kjok kjwang jîkong, miyde tjëyoga uunkongdë wšo. Eshko ga öötong kjok pjir dbaryoshko. 15”Dënashko ga Sbö tjšõkwo šaga Daniel, e tjšõkwo tono ðëbo shäryë owa anmoyõ Sbö shto zrek roshko kjîshko. Ëre woydër ga kumi yõtso. 16Eshko ga pjãy šöng Judea kjokyo ga pjãy tökzong dšup šëkong; 17pjãy šöng bop u dbo kjing sdok ši kjing go ga pjãy tökzong mašing, pjãy opzrëk jek bomi u roshko ðëbo kjrë ðëme; 18pjãy šöng bomi kjokshko ga pjãy jek bomi ushko iröng bomi shwong kop šëkong ši kjrë ðëm bakoe. 19E dbaryo ga wašëga šöng kjšaraso ðëm, e song jšõe. Wašëga kjwozirwa tjeng nä ië, e song jšõ bakoe. 20Rokozî Sbö kong ga pjãy tök kjok owa dbaryo ðëm, woshtozšong dbaryo ðëm bakoe. 21”E dbaryo ga ðëbo wen nopga kong owa anmoyõ. Ðëbo eni, e îkdaba tek dämärshko dwayo ðëm, ga wen e kjoyo ame. 22Ðëbo owa ëre ie Sbörë ber dbar ara ðëm, ba nopga kjrara ši woyde ara kjîshko. Eni ðëm kjwe ga ëye där ber sök së kjšara ðëme. 23”Eshko dbaryo ga no tjwe shäng tjšê ga “¡No pjšuyo ichara Sbörë ši shäng na îzîa!” še. Obšë tjšê ga “¡Shäng kjwe!” še bomi kong, gueniyo jšõ šëmi ðëme. 24Eshko ga nopga ara to šöng tjšê ga “No pjšuyo ichara Sbörë shrono shäng ši, e tja” še. “Tja Sbö tjšõkwo šaga kjok ëre so” še. Gueniyo e ichaga Sbörë ðëme. Ðëbo îydëba ðëm wšeniyo shärye šok kësbang obšë obšë ara. Ðëbo jyãgšo shärye šok obšë obšë bakoe. Shärye šok eni, oba ara jyãpgwe wšo, Sbö nopga kjrara ši ëmdë jyãpgwe wšo še, gueniyo epga jyãpgwe ga äe. 25Gueniyo miydëmi pjir wšo ga ðëye wen eshko ši šoror bomi kong tjän. 26E kjîshko ga ëye tjšê ga “¡No pjšuyo ichara Sbörë ši shäng kjok dogro no ðëmshko!” še bomi kongshko ga pjãy jek eshko ðëme. Ëye tjšê ga “¡Opjneno sök na!” še bomi kongshko ga jšõ šëmi ðëm bakoe. 27No to ter kjok dogo dwayo ëre tjwe iröng obishko ga e ber so ðgwšëng ðer kãšã ðetðet kjok dogo ðaw pogo kjoyoe. Eni ga tja îga nopga uunkongdë wêšëe. 28Shinmo doyo buk kjone ga šà tjwe tön ara eshko. 29”Ðëbo owa ëre dbaryo irgo ga ““Dšo ber pjang yêt, ga mok kãšã të ame. Dbala šon ter kjok dogo dwayo, ga kjopkwo ber dete erä.” 30”Eshko ga îkoba ga no to ter kjok dogo dwayo ëre jyãgšo ši wen kjok dogo ga bangkjrëba kjok kjwang jîkong, ga sšar šok ara. Eshko ga îkoba ga tja ter tjwe pjäng sho roy ga bor dbo kãšã îkoba wêšëe. 31Bor parkagaga kjok dogo so ichër wši kësbang të, ga bor nopga kjrara ši kjre šok kjok kjwang jîkong, tòya wšo. 32”Tja kuzîa. Pjãy pin, kjor ko higuera ši go. Kjor kowo wen mite, korga wen tjagšënshko ga miydëmi e go ga šushko dbaryo äätoe. 33Eni ga ðëbo tjeng kës ëre shäryë ši îmishko ga miydëmi e go ga no to ter kjok dogo dwayo ëre tjwe iröng obi dbaryo ši ääto eni bakoe. 34Šër bomi kong jšõkoyo ga nopga šöng eerishko dbaryo kjone kjone wošontë ðëm obishko ga ðëye šër shäng bomi kong ëre shäryë uunkong. 35Kjopkwo, kjok ëre, e pjir ber drete. Gueniyo bor tjšõkwora ber pjang îyado. 36”E dbaryo ðono, kjok orë, ëye ommiydë ðëme. Miydaga Sbö parkagaga kjok dogo sorë ðëm, miydaga Sbö Wa ërerë ðëm bakoe. Miydaga Data Sbörë eröe. 37No to ter kjok dogo dwayo ëre tjwe iröng obi döröshko ga ðëbo shäryë kjok ëre kjing go ši, e ber so ðëbo shäryono Noé dbaryoshko ši dik. 38Eshko ga kjok ëre pitë ðëm obishko ga nopga to šöng wšêp dši uë, di ië, orkwosmok ëng tjok öötong Noé opzrëno jem kjyong kësbang roshko dbaryoshko. 39Ðëye tjwe shäryë eshko ši miydaraba ðëme. Eshko ga shunyo shrono kësbang, ga nopga ši söra dirë, shtena drete. No to ter kjok dogo dwayo ëre tjweshko ga e shäryë eni bakoe. 40Eshko dbaryo ga domerga šöng do pjök parkë ba kjokshko. Kjšara söya, kjšara ie ber shäng eshko. 41Ga wašëga šöng do pjök ðëbo kšäk. Kjšara söya, kjšara ie ber shäng eshko. 42”E kjîshko ga pjãy šöng sjëk îyado, bomi Tjšapga ëre tjwe dbar ðono miydëmi ðëm kjîshko. 43Tja kuzîa. Ëye tjwe šûrkë ðono miyde u sogo širë kjwe ga koshe, ba u de, ðëbo šûyotkëba ðëm wšo. 44No to ter kjok dogo dwayo ëre tjwe ðono miydëmi ðëm kuzong ga pjãy ber šöng bor koshë, poshäryak pjir îyado. 45”Parkaga ie ba pjšurë ber ba parkagaga obšë daga, sèya äär ba dšoyo go kjok orë ga woyde ga parkaga ðëye še ba kong ši shärye eni wšeniyo, kjok miydë ara wšeniyo bakoe. ¿Gueniyo ga kjre sorë? 46Tjwe iröng obishko ga parkaga wšêya ba pjšurë shäng ba pak shäryë pjšú ši, e kongda ber pjšúe. 47Šër bomi kong jšõkoyo ga era ie ba pjšurë ber shäng ba ðëbo uunkong kägäyo. 48Gueniyo ga parkaga ši wotjšîk owa wšeni ga wotjšîk ga ba pjšu tjwe mašing ðëme še, 49ga opyorgö to shäng parkagaga obšë shdung, ga gšö ara nešõga tjok. 50Eni wšeni ga koshe shäng ðëm dbaryoshko ga ba pjšu tjwe. 51Eshko ga parkaga owa ši shdûya, iche nopga Sbö tjšõkwo söga jšõkoyo še, gueniyo wotjšîk owa ba pjšúshko tjeng šishko, ber shäng sšar eshko, kowo uë, ðëbo bang ara ba kong kjîy.

will be added

X\