MATEO 23

1E irgo ga Jesús tjšê nopga tjeng ara ši kong, ba oppinggaga kong ga 2”No pinggaga kjok ðgwekkšo tara Moisésdë ši go, fariseoga, e wotjšîk šok ga no pinggaga Sbö tjšõkwo go jšõkoyo ši epga, ëye obšë drete še šok eni. 3E kjîshko ga pjãy pîya sorë ga shäryozî eni, gueniyo epga omshäryë šöng sorë ši, pjãy omshäryë eni ðëme. Nopga kjwe tjšê ga “Ðëbo shäryëy jûni” še, gueniyo omshäryë šöng obšë. 4”Oba pîyashko ga tjšõkwo še šok ara ši shäryëba uunkong ga äe. E so ðëbo kwing ä twe obšë kong söya wšo kjoyoe. Shärye šok eni, gueniyo epga om go omkjimtë ba sök ðëm, ba sakkwo go ëmdë ðëm bakoe. 5Ðëbo shärye šok kës ši, e îkoba wšo erä. Sbö tjšõkwo tak pjang kjibokwo go ši pjriya šok ba bokdo go, ba sjàkso go îyado. Ba shwong kjarbo shêshê ši shärye šok kur may, pjë äär kjšay kšung go wšo. 6Oba tön, iëshko ga woyde ga šöng bäm goshko, sökkšo pjšú goshko, shärye šok eni judíoga syõ uyo roshko bakoe. 7Woyde šok ga miga ðë šëba ba kong yõtso ðëbo soynezšong, ga kowëba no pingga. 8”Gueniyo ga pjãyda epenga dö wšeni. Pjãy pingga sök kjšaraso. E kjîshko ga pjãy kowëba no pingga ðëm dey. 9Pjãy Data kjšaraso, Sbö sök kjok dogo ši e. E kjîshko ga kjok ëre kjing goshko ga ëye kowëmi data ðëm dey. 10Pjãy bapshiga kjšaraso. Tja, no pjšuyo ichara Sbörë shrono shäng ëre ši e. E kjîshko ga pjãy kowëba no bapshiga ðëm dey bakoe. 11Ëye opyë woydë tjwšõ kësbang, obšë kjinmo ga opyë ber shäng obšë kjimtaga dey. 12Ëye opyono tjwšõ ara ga ie ber tjwšõ ðëme. Ëye opkjšopswono beno wotöy ga ie ber tjwšõ ara. 13”¡No pinggaga kjok ðgwekkšo tara Moisésdë ši go, fariseoga, pjãy song jšõ, pjãy shdungko! ¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Nopga, Sbö ie ber ba pjšuyo wšo ši še ga somi ara. E so u bäng bängzami, nopga opzrëk jek ba roshko ðëm wšo kjoyoe. Pjãy opzrëk eshko ðëm, ga no obšë opzrëk woydë eshko ši ichëmi opzrëk eshko ðëm bakoe. 15”¡No pinggaga kjok ðgwekkšo tara Moisésdë ši go, fariseoga, pjãy song jšõ, pjãy shdungko! ¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Pjãy to šöng dšung kjing, kjok shto obšë obšë, no wšêk ber bomi oppingga wšo. Wšênomishko ga pimi owa. Eni ga ber shäng owa, bomi kjinmo. Pjãy shdungko, pjãy ber šöng iök pjë jong ri ri sjer ðëm shtoyo ši roshko wšo. Gueniyo bomi oppinggaga ši, e shdungko, bomi kjinmo anmoyõ. 16”¡Pjãy song jšõ, pjãy shdungko! Pjãy so no kjok îgö ðëm wšeniyo kjoyo, gueniyo no wšosömi šëmi. Pjãy tjšê oba kong ga “Shji tjšêno jšõkoyo Sbö u kjîshko ga e ðëno ðëme. Gueniyo shji tjšêno jšõkoyo dbur sho shõyšør smok šok Sbö u goshko ši kjîshko ga ðëye šoroy jšõkoyo ši shäryëy kjšuwe” šëmi oba kong eni. 17Pjãy kjok miydë sira ðëme. Pjãy so no kjok îgö ðëm wšeniyo kjoyoe. Dbur sho shõyšør smok šok Sbö u goshko ši iak beno tjeng dboy Sbö kong, Sbö u ši kjîshko. ¿Eni ga ðëye tjwšõ ara anmoyõ ši ðë, dbur sho shõyšør šire, de Sbö u ši? 18”Pjãy tjšê oba kong ga “Shji tjšêno jšõkoyo öng sho sukkšo ši kjîshko ga e ðëno ðëme. Gueniyo shji tjšêno jšõkoyo öng twara, zröra, suya buk öng sho sukkšo kjing go ši kjîshko ga ðëye šoroy jšõkoyo ši shäryëy kjšuwe” šëmi oba kong eni. 19Pjãy so no kjok îgö ðëm wšeniyo kjoyoe. Öng twara, zröra, suya buk öng sho sukkšo kjing go ši iak beno buk dboy, öng sho sukkšo ši kjîshko. ¿Eni ga ðëye tjwšõ ara anmoyõ ši ðë, öng šire, de öng sho sukkšo ši? 20”E kjîshko ga ëye tjšê shäng jšõkoyo öng sho sukkšo ši kjîshko ga tjšê shäng jšõkoyo ba kjîshko dö ðëme. Tjšê shäng jšõkoyo ðëbo buk ba kjing go ši kjîshko bakoe. 21Ëye tjšê shäng jšõkoyo Sbö u kjîshko ga tjšê shäng jšõkoyo Sbö sök eshko ši kjîshko bakoe. 22Ëye tjšê shäng jšõkoyo kjok dogo kjîshko ga tjšê shäng jšõkoyo Sbö pjšu sökkšo kjîshko bako, Sbö sök ba sökkšo kjing go kjîshko bakoe. 23”¡No pinggaga kjok ðgwekkšo tara Moisésdë ši go, fariseoga, pjãy song jšõ, pjãy shdungko! ¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Ðëbo wšênomi ši shtëmi äär ba sakyo (10) go, ba sakyo (10) go, shimi kjrina kjrina, ga twëmi Sbö kong. Bomi dši mokyo obšë obšë tjok ga shäryëmi šöng jšõkoyo eni bakoe. Gueniyo kjok ðgwekkšo tak pjang tjwšõ ara, ba kjinmo šira košëmi šöng ðëme. Pjãy kjok ðgwek bek ðëme. Obšë songe šëmi ðëme. Ðëbo šëmi obšë kongshko ga shäryëmi ðëm bakoe. Pjšú wšo ga kjok ðgwekkšo tjwšõ ara ëre shäryomirë dey, kjok ðgwekkšo obšë ši shäryozî îyado bakoe. 24Pjãy so no kjok îgö ðëm wšeniyo kjoyo, gueniyo no wšosömi šëmi. Kjok ðgwekkšo, e ðë šokšo miydëmi ðëme. E kjîshko ga ðëye tjwšõ ara ðëm ši, e shäryomirë šöng. Gueniyo ðëye tjwšõ ara ši, e shäryëmi šöng ðëme. Pjãy so no sök di ië kjoyoe. Ðgwirwa buk ba di iokšo roshko ši shira, gueniyo öng kësbang buk ba roshko šira dwara jer, miydara ðëme. 25”¡No pinggaga kjok ðgwekkšo tara Moisésdë ši go, fariseoga, pjãy song jšõ, pjãy shdungko! ¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Pjãy ðëbo shäryë ara, pjãy pjšúe šëba wšo, gueniyo ga pjãy kirkë ara, pjãy wotjšîk dbur töng bomi kong erö. Pjãy so di iokšo, dši uokšo kjoyoe. E kwoshkwak ba pogšo go, gueniyo roshko wšiwšie. 26¡Fariseoga, pjãy so no kjok îgö ðëm wšeniyo kjoyoe! Pjšú wšo ga di iokšo, dši uokšo, e ro kwoshkwëmi bäm goshko. Pjir ga ber drëpdrë jšõe. 27”¡No pinggaga kjok ðgwekkšo tara Moisésdë ši go, fariseoga, pjãy song jšõ, pjãy shdungko! ¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Pjãy so shinmo bapkwo poshtik pjšubšún, wošësowa kjoyoe. Îkoba ga pogšo go pjšú, gueniyo roshko shinmo dbogšo, ðëbo wšiwši tjeng ara eshko. 28Pjãy so e kjoyo bakoe. Îkoba ga pjãy pjšo beke šëba, gueniyo pjãy wotjšîk owa erä, ðëye šëmi ga shäryëmi ðëme. 29”¡No pinggaga kjok ðgwekkšo tara Moisésdë ši go, fariseoga, pjãy song jšõ, pjãy shdungko! ¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Sbö tjšõkwo šagaga shinmotkono tjeng dënashko ši, ak sho shäryëmi ba sak kjing go, ber šöng kjone miydëba wšo. Nopga pjšo bek shinmotkono ši sakyo poshäryëmi, ber wošësowa wšo. 30E irgo ga pjãy tjšê ga “Tjawa kjwe šöng borwa tjšapgaga tek dënashko so dbaryoshko ga Sbö tjšõkwo šagaga zrörorwa ðëme” šëmi eni. 31Eni ga miydëmi ga pjãy Sbö tjšõkwo šagaga zröga ši tjëyoga. 32Shäryara bomi tjšapgaga tek dënashko so širë sorë ga pjãy omshäryë jek eni bakoe. 33¡Pjãy so dgur kjoyoe! Pjãy shdungko, pjãy ber šöng iök pjë jong ri ri sjer ðëm shtoyo ši roshko wšo. ¿Pjãy där, äär eshko ðëm wšo ga sorëro? 34”E kjîshko ga Sbö tjšõkwo šagaga, nopga kjok miydë ara, no pinggaga, e ichër jek bomi kong. Gueniyo kjone kjone zrömi, kjone kjone zrömi šok kjšös go, kjone kjone shpomi no shpokkšo go judíoga syõ uyo roshko, ga töktong šok. Eni ga irpjami to šöng kjok shto obšë obšë go. 35Tek dämär ga nopga pjšo bek ši srëng kwono ara. Tek jong Abel go äär jong Zacarías, Berequías wa ši go eni. Zacarías pjšo bek, gueniyo zröromi Sbö u jong ši, öng sho sukkšo jong ši, e tjrëko. Ðono ga owa ëre ber pjang bomi go. Pjãy shdungko e kjîshko. 36Šër bomi kong jšõkoyo ga eerishko dbaryo sopga, pjãy shdungko ðëbo owa ëre uunkong kjîshko. 37”¡Jerusalén sopga, tja kuzîa! Sbö tjšõkwo šagaga zrömi. Sbö tjšõkwo roy šagaga ichara bomi kong ši šömi ak go, zrömi wšo. Woydoror enido ga pjãy tön, kjörkö meyo ba wapga töno tjeng ba sjàgä dirko wšeni, gueniyo woydoromi ðëme. 38Tja kuzîa. Bomi u, e raye Sbörë ber jong tjoksa. 39Šër bomi kong ga tja ëre îmi ame, äär jong pjãy tjšê šöng ga ““Kjwe ichara Tjšapgarë tjwe kjok ëreshko.Kjwe kjimte Sbörë” šëmi šöng guing” še.

will be added

X\