1 Jesús tjšê ba oppinggaga kong ga “Sbö ber no pjšuyo sorë, e so ðëbo šër bomi kong ëre kjoyoe. Domer shäng kjšara kjiðgwo bo ara kjokyo sogo. Pjšara ga opshino jek kjok shröngteng, nopga wšêk parkë ba kong wšo. 2 Eshko ga tjšêno parkagaga ši kong ga potjwšêya dbar kjwara ãska šara, ga ichara jek parkë ba kjok buk šishko. 3 ”Dšo wenzong ga opshino jek obi, ga nopga wšêna šöng kjšöbö pak dret, ðëbo soynezšong. 4 Eshko ga tjšê ba kong ga “Pjãy nom parkë bor kjokshko, ga pjãy potjwšên bëye” še. 5 Eni ga to jek šok parkë ba kong.“Dšo dšuw ga shäryara eni jek obi. Dšo pjö šë wšeni ga jek shäryara obi. 6 ”Dšo töy wšeni ga opshino jek obi, ga nopga wšêna šöng kjšöbö pak drete. Eshko ga tjšê ba kong ga “¿Pjãy dbo ga šöng parkë ðëm ega?” 7 ”“Tjawa parkë ë tjok ðëm kjîshko” še šok ba kong.“Kuya ga tjšê ba kong ga “Pjãy nom parkë bor kjokshko” še. 8 ”Öötong kjok shkë ga kjok sogo ši tjšê ba parkaga kägäyo kong ga “Parkagaga to rokëp, ga potjwšêma. Shrono parkë iröng ši potjwšêp bäm go, shrono parkë bäm go ši potjwšêp ber iröng” še 9 Eshko ga parkagaga shrono dšo töy ši potjwšêna dbar kjwara ãska. 10 ”Roy kuya parkagaga shrono bäm go širë ga wotjšîk ga potjwšêya šok iröng ši kjinmo še. Gueniyo potjwšêna dbar kjwara ãska bakoe. 11 Potjwšêna šok pjirshko ga kjok sogo ši šãywe šok owa ëng kong, 12 tjšê šok ga “¿Nopga tjwe šöng iröng kjwe parkono wop tjok erä, ga potjwšêna borwa tjok bëy ega? ¡Tjawa song parkono dšo roshko dboe!” še šok ëng kong eni. 13 ”Eni ga kjok sogo ši tjšê parkaga kjšara kong ga “Tja shäng ðëbo owa shäryë bop kong ðëme. Pja potjwšên eni šoror bop kong, ga jöšö šorop bor kong. 14 Bop dburwa kjros, ga pja nom na dwayo. Parkagaga tjwe šöng iröng ši potjwšên woydë bopoya dik bako ga 15 miydaga ber tjarë, dbur ši botoya kjîshko. ¿Pjãy wotjšîk owa bor kong, tja no sëng ä kjîshkore?” še. 16 ”Eni ga tjwšõ ara eerishko ši, e ber šöng tjwšõ chira eshko, e ga eerishko tjwšõ chira ši, e ber šöng tjwšõ ara eshko” še. 17 Jesús jek shäng Jerusalén kjokyoshko ga ba oppinggaga dogšo sak kjwara kjingsho pjök (12) ši rokara dboshko, ga tjšê ba kong ga 18 ”Shji to Jerusalén kjokyo. Eshko ga no to ter kjok dogo dwayo ëre twëba ber tjeng syõshtaga kägäyoga wšoshko, no pinggaga kjok ðgwekkšo tara Moisésdë ši go wšoshko bakoe. Eshko ga tja iche šok, zrökoba wšo, 19 ga tja twe šok nopga judío ðëm wšeniyo kong. Eshko ga tja joywe šok, tja shpoya šok no shpokkšo go, ga tja zröya šok pjang kjšös go. Gueniyo äär dbargwo mya ga tja woshre Sbörë iröng obi” še. 20 Eshko ga Zebedeo wapga ko Santiago, Juan, e mekë tek shrono šöng Jesús zšong bäng ga kjök tono, tjšê ba kong ga “Ðëbo shäryëp bor kong sira” še. 21 Kuya ga tjšê ba kong ga “¿Ðëye woydëp?” “Pja ber sök no pjšuyoshko ga bor wapga do pjök ëre iëp ber šöng bop tjok, or mišë kjšara, or këšë kjšara” še ba kong. 22 Kuya ga tjšê ba kong šok ga “Ðëye rokëmi šöng bor kong ši, e ðë miydëmi šöng ðëme. ¿Pjãy shdungoba, bokrotkëba botoya dik ga pjšúre?” “Ëng” še šok ba kong. 23 Kuya ga tjšê ba kong ga “Šër bomi kong ga pjãy shdungoba, bokrotkëba, zrökoba botoya dik jšõe. Gueniyo ga pjãy kjrër ber tjeng bor or këšë, or mišë, e šaga tjarë ðëm, e šaga bor Datarë. Shto bor or këšë, or mišë, e ber ëye kjrara bor Datarë tjeng ši kong” še. 24 Kuya ba oppinggaga dogšo sak kjwara (10) širë ga iirkono ba pjeyoga pjök ši kong. 25 Gueniyo rokara Jesúsdë uunkong, ga tjšê ba kong ga “Miydëmi pjšú ga kjok ëre kjing go ga nopga judío ðëm wšeniyo ichagaga ba nopga ichë parkë ara ba kong. Nopga dbo ara wšeniyo ba nopga ichë parkë ara ba kong bakoe. Ëye songe še ðëm, iche parkë ara ba kong erä. 26 Gueniyo woydër ga pjãy omshäryë eni ðëme. Ëye opyë woydë ber tjwšõ ara obšë kjinmo ga opyë ber shäng obšë kjimtaga dey. 27 Ëye opyë woydë ber bäm go ga opyë ber shäng parkaga tjwšêk shäng pjir wšeniyo obšë kong dey. 28 No to ter kjok dogo dwayo ëre shrono shäng kjok ëreshko, ëye parkë bor kong wšo ðëme. Tja shrono shäng parkë obšë kong wšo. Ga tja optwë, wošon wšo, tja ber nopga ara potjwšêkkšo wšo, epga där wšo” še. 29 Jesús opshino jek shäng Jericó kjokyo dwayo ba oppinggaga tjokshko ga nopga to jek ara ba tjok. 30 Eshko ga domerga šöng irbo sor go do pjök kjok îgö ðëm wšeniyo. Kuya šok ga Jesús jek shäng eshko ga tjšêno dbo go, tjšê ga “¡Tjšapga, David tjëyo, tjawa songe šozong!” še. 31 Eni ga nopga jëk šöng Jesús tjok ši tjšê ba kong ga “Pjãy kjinkozong” še. Kuya šok gueniyo kjinkë šok ðëme. Tjšê šok dbo go jek obi ga “¡Tjšapga, David tjëyo, tjawa songe šozong!” še. 32 Eni ga Jesús kojongö shäng, ga tjšê ba kong ga “¿Ðëye woydëmi ga shäryër bomi kong?” 33 ”Tjšapga, tjawa kjok îk woydë” še ba kong. 34 Eshko ga songe še Jesúsdë, ga bokkwo porwara. Jekdo eshko ga beno šöng kjok îgö wêšë, ga to jek šok Jesús tjok.
