Marcos 8

1Dbar kjwara ga nopga shrono töno šöng ara Jesús sök šishko. Dši ðëm kuzong ga ba oppinggaga rokara Jesúsdë tek ba zšong bäng, ga tjšê ba kong ga 2”Nopga kjwe šöng bor tjok na öötong dbargwo mya, ga ðëye uako ðëme. E kjîshko ga songe šër. 3Jek ichër ba ushko ië ðëm ga äe. Kjone kjone tjwe pjola dwayo. E kjîshko ga wopjir irbo kjwe” še. 4Kuya šok ga tjšê ba kong ga “¿Nopga träk ðëm kjwe sèy sorë? ¿Kjok no ðëmshko ëre dši wšêy kjone?” še. 5Kuya ga tjšê ba kong ga “¿Pjãy pjšung shosho suk pjir tjeng kjwobi?” “Tjeng kjwo kjäk (7)” še ba kong. 6Eni ga nopga ši ichara Jesúsdë wšar uunkong töshko. Pjir ga pjšung shosho suk pjir kjwo kjäk (7) ši, e kjrara, ga tjšê Sbö kong ga “Tjawa kong dši tworop ëre. Tjawa ber wopjšú bop tjok e kjîshko” še. E irgo ga dši ši tora, twara ba oppinggaga kong. Ga pjšorgara šok nopga tjeng kës ši kong. 7Mã tjeng kjšöbö chilawa bakoe. Eni ga Jesús tjšê Sbö kong ga “Tjawa kong dši tworop ëre. Tjawa ber wopjšú bop tjok e kjîshko” še. no hay nada še. E irgo ga mã ši twara ba oppinggaga kong, pjšorgue šok nopga tjeng kës ši kong wšo. 8Eshko ga nopga uunkong iono beno šöng bö tjung, wopjšúe. E irgo ga dši worbo töna ba oppinggagarë šok shing roshko, beno tjeng shing kjwo kjäk (7), tjung tjunge. 9Domerga iono uunkong ga dogšo sak dbäw dbäw pjšogšo pkëng (4,000) dik. Wašëga, kjwozirga, e shtak ðëme. E irgo ga nopga briktong pjir ga 10Jesús opyono kjyong roshko ba oppinggaga tjok, ga to ey dwayo, jek öötong šöng Dalmanuta kjokyo. 11Eshko ga fariseoga tek shrono šöng Jesús shwoy, ba tjšîk wšo. Tjšê ba kong ga “Ðëbo îydëba ðëm wšeniyo shäryos borwa kong kjrina, pja ichaga Sbörë jšõre miydërwa e go wšo” še. 12Kuya ga tjwšõ shrono rong, ga tjšê ba kong ga “¿Eerishko dbaryo sopga, woydëmi ga ðëbo jyãgšo shäryër bomi kong ega? Šër bomi kong jšõkoyo ga shäryër ðëme” še, 13ga rayara beno šöng eshko. E irgo ga opyono kjyong roy, ga dipzono jek di bäng buk kësbang ši kjwo kašëkong. 14Ga jek šöng kjyong roshkoshko ga miydara ba oppinggagarë šok ga dši söra šok ðëm, pjšung shosho suk pjir beno buk kjwara eröe. 15Ga Jesús tjšê ba kong šok ga “Pjãy sjëk fariseoga, Herodes, ba pjšung shosho uukkšo wše tjok” še. 16Eni ga epga tjšê šok ëng kong ga “Shji pjšung shosho suk pjir söno ðëme. Še shäng bi kong eni e kjîshko” še. 17Tjšê šöng ëng tjok ðë ši miydara Jesúsdë kuzong ga tjšê ba kong ga “¿“Shji pjšung shosho suk pjir söno ðëme” šëmi ega? ¿Bor tjšõkwo ši ðë šokšo miydomirë ðëm obire? ¿Ðëye kumi woydë ðëm obire? 18Pjãy bokkwo tjok, gueniyo pjãy kjok îgö ðëme. Pjãy kwomgwo tjok, gueniyo pjãy kjok kugö ðëm bakoe. ¿Ðëye woyo bomi kong ðëmdo? 19¿Domerga sënor dogšo sak dbäw dbäw pjšogšo shkëng (5,000), pjšung shosho suk pjir kjwo shkëng (5) goshko ga dši beno obi tönomi shingyo kjwobi?” “Shingyo dšinorwa kjwo sak kjwara kjingsho pjök (12)” še šok ba kong. 20Eshko ga tjšê ba kong šok obi ga “¿Domerga sënor dogšo sak dbäw dbäw pjšogšo pkëng (4,000), pjšung shosho suk pjir kjwo kjäk (7) goshko ga dši beno obi tönomi shingyo kjwobi?” “Shingyo dšinorwa kjwo kjäk (7)” še šok ba kong. 21Eni ga tjšê ba kong šok ga “¿Eni ga bor tjšõkwo ðë šokšo miydëmi ðëm obire?” še. 22E irgo ga Jesús öötong shäng Betsaida kjokyo. Eshko ga domer sök kjšara kjok îgö ðëme. E söraba shrono šöng Jesús zšong bäng, ga tjšê šok ba kong ga “Rokërwa bop kong ga domer ëre porwos sira, poptëp wšo” še. 23Kuya ga domer ši orkwo shara, ga söra jek u šokshko ši worbo go. Öötong šöng eshko ga Jesús tröng twono domer ši bokkwo go, orkwo iara ba bokkwo kjing go, ga tjšê ba kong ga “¿Ðëbo îgöpde?” še. 24Eshko ga kjok roîno, ga tjšê ga “În ga no jëk jonge. Gueniyo ga îgör yõtso ðëme. E kjîy ga nopga jëk šöng ši în ga so kjor kjoyoe” še. 25Eni ga Jesús orkwo iono ba bokkwo kjing go jek obi. Eshko ga bokkwo poptono, beno kjok îgö wêšëe. 26E irgo ga Jesús tjšê ba kong ga “Pja nom bop ushko. Pja jek äär Betsaida kjokyo guing ðëme” še. 27E irgo ga Jesús, ba oppinggaga, e jek šöng Filipo Cesarea kjokyo shto obšë obšë. Eshko ga jek šöng irbo ga Jesús tjšê ba kong šok ga “¿Kumi ga tja ë šëba?” 28”No kjone kjone tjšê ga pja Juan No Waga ši woshrokdo še. Kjone kjone tjšê ga pja Sbö tjšõkwo šaga tek dënashko so Elías tjwayde shäng še. Kjone kjone obi tjšê ga pja Sbö tjšõkwo šagaga tek dënashko so kjšara ši woshrokdo še” še šok ba kong eni. 29Kuya ga tjšê ba kong ga “E ga pjãy e, ¿tja ë šëmi?” še. Kuya Pedrorë ga tjšê ba kong ga “No pjšuyo ichara Sbörë shrono shäng ši, e pja” še. 30Kuya ga tjšê ba kong šok ga “Tja ë šëmi ë kong ðëme” še. 31Eshko jek šëkong ga Jesús tjšê ba oppinggaga kong ga “Äär dbar kjwara ga no to ter kjok dogo dwayo ëre shdungoba ara guing. Judío tjšapgaga kjok ðgwega wšeniyo, syõshtaga kägäyoga, no pinggaga kjok ðgwekkšo tara Moisésdë ši go, tja wšokjre šok ðëme. Ga tja zrökoba, gueniyo äär dbargwo mya ga tja woshre Sbörë iröng obi” še eni. 32Ðëbo shäryëba ba kong tjwe ši, e šara ba oppinggaga kong wêšë, miyde šok wšo. Kuya Pedrorë ga Jesús rokara tjoksa, ga wšonae. 33Gueniyo ga Jesús bojono, ba oppinggaga ðamo beno tjeng ši îk wšo. Eshko ga tjšê Pedro kong ga “¡Ä, pja opkjos bor zšong dwayo! Ðëye woyde Sbörë ši woyotjšîp shäng ðëme. Ðëye woyde norë ši woyotjšîpdë shäng eröe” še. 34Eshko ga ba oppinggaga rokara tek ba zšong bäng, nopga tjeng ši rokara eni bakoe. Ga tjšê ba kong ga “Ëye jëk woydë bor tjok jšõkoyo ga ber shäng bor woyotjšîk îyado, wotjšîk ðëbo shäryë kjok ëre kjing goshko ame bakoe. Bor kjîshko ga ðëye shäryëba ba kong ðë pogoshko ši, e zrökoba pjang kjšös go ëmdë ga e ba kong ga ðëye ðëme. 35Ëye wotjšîk opdë om go, zrökoba bor kjîshko ðëm wšo še ga äär kjok dogo ðëme. Gueniyo ëye jëk bor tjok jšõkoyo, e zröraba bor kjîshko, ðëm ga Sbö tjšõkwo roy pjšú kjîshko ëmdë ga era ber sök së îyado kjok dogo. 36Ëye ðëbo tjeng kjok ëre kjing go kës ši kjrara tjeng ba wšoy ëmdë ga e ðëno ðëme. Wošono ga öötong kjok dogo ðëm ga to jeno ba ðëbo ši tjok. 37Shji ber šöng së îyado Sbö tjok wšo ga tjwšêkkšo kjok ëre kjing goshko drete. 38”Nopga šöng eerishko dbaryo ši owa, so domer orkwosmok shäng pjir, gueniyo jëk shäng wašë obšë tjok kjoyoe. Ðono ga no to ter kjok dogo dwayo ëre tjwe bor Data dbo kãšã goshko, bor parkagaga kjok dogo so tjok. Eerishko ga ëye, tja šökyokjre nopga owa bokshto ga eshko ga šökyokjrër eni bakoe”

will be added

X\