Marcos 4

1Jesús öötong sirkeno sök di bäng buk kësbang ši sor go ga nopga pina eshko jek obi. Nopga shrono šöng ara kjîshko ga Jesús opyono kjyong roshko, ga sirkeno sök eshko. Nopga ši beno tjeng di bäng ši kjako. 2Eshko ga epga pina ara ðëbo jyãgšo go. Tjšê ga 3”Tja kuzîa. Domer shäng kjšara dwša sguingga. Pjšara ga opshino to jek dwša sguing. 4Sguîyashko ga kjone kjone šono tjeng irbo bäng, ga sënwa shrono, ga uara šok drete. 5Kjone kjone šono tjeng ak ara tjrëko, kšung sho ara ðëmshko, ga weno mašing, kšung sho rong ðëm kjîshko. 6Gueniyo sšenggwo dret kjîshko ga dšo wenoshko ga sura, beno dogroe. 7Dwša kjrina obi, e šono tjeng shkö sho roshko, ga shkö sho ši kunoshko ga dwša ši ðgwîna beno bo ðëme. 8Dwša kjrina obi, e šono tjeng kšung sho pjšú kjing go, ga kuno, botjyono pjšúe. Kjoneshko ga sok kjwara botjyono kjwo sak mya (30), kjoneshko ga botjyono kjwo sak tjer (60), kjoneshko ga botjyono kjwo sak dbäw (100)” še. 9E irgo ga tjšê ba kong jek sira obi ga “Ëye kwomgwo tjok ga woyde ga kuya yõtso” še. 10Nopga tjeng kës ši briktong irgo ga Jesús oppinggaga dogšo sak kjwara kjingsho pjök (12) ši, oba obšë jëk šöng ba tjok wšeniyo, e tjšê šok ba kong ga “Rokërwa bop kong sira ga ðëye šorop ðëbo jyãgšo go yê, e ðë šokšo pjšoðgwes borwa kong, miydërwa wšo” še. 11Kuya ga tjšê ba kong ga “Sbö ber no pjšuyo sorë ši roy miydaydëba ðëm ši pinaba bomi kong. Gueniyo nopga obšë kongda, šër ðëbo jyãgšo go erä. 12Eni ga““Îya šöng kjër ga ðë îyde miyde šok ðëm, kuya šöng kjër ga ðë šokšo miyde šok ðëm bakoe. Eni ðëm kjwe ga optwë ber Sbö kong, ga owa pjang ba go ši šòya ber drete”“ še. 13E irgo ga Jesús tjšê ba kong ga “¿Tjšõkwo šër shäng ðëbo jyãgšo go ëre ðë šokšo miydëmi ðëmde? Miydëmi ðëm ga tjšõkwo šër ðëbo jyãgšo go obi ga miydëmi ðëm bakoe. 14Dwša sguingga ši, e Sbö tjšõkwo šaga oba kong ši šokšo. 15Kjone kjone, e so dwša šono tjeng irbo bäng ši kjoyoe. Tjšõkwo ši kuya, gueniyo Ä tjwe eshko, ga döya ba shjiryo. 16”Kjone kjone, e so dwša šono ak ara tjrëko ši kjoyoe. Tjšõkwo ši kuya ga kjre šok wopjšúe. 17Gueniyo tjšõkwo ši äär ber ba pjšúshko jšõkoyo ðëm kjîshko ga ðëye wen ba kong sirashko, epga shdungoba tjšõkwo ši kjîshkoshko ga raye, söya ame. 18”Kjone kjone, e so dwša šono shkö sho roshko ši kjoyoe. Tjšõkwo ši kura, 19gueniyo ðëbo tjeng kjok ëre kjing goshko ši woyotjšîya ara, wo pjang dbur go, ðëbo tjeng kës ši kjre woydë ber ba kong wšo bakoe. E kjîshko ga tjšõkwo ši woyo ba kong ame, ga bo wen tjšõkwo ši kjîshko ðëme. 20”Gueniyo ga kjone kjone obi, e so dwša šono tjeng kšung sho pjšú kjing go ši kjoyoe. Tjšõkwo ši kuya, ga kjre jšõkoyo. E ber shäng so dwša botjyono pjšú kjoyoe. Kjoneshko ga sok kjwara botjyono kjwo sak mya (30), kjwo sak tjer (60), kjwo sak dbäw (100)” še. 21E irgo ga Jesús tjšê ba kong ga “Iök borkey jong shjiy, jney ðëbo dorko wšo ðëme. Iëy jong kjókshko dey. 22Ðëbo jnek tjeng ši, e woyde Sbörë ga ber îkoba wêšë wšo. Ga ðono ga e ber miydëba dret, iök shjiy poyong jong kjókshko wšeni. 23Ëye kwomgwo tjok ga woyde ga kuya yõtso. 24”Ga ðëye kumi šöng ši kuzî yõtso. Kumi yõtso wšeni ga pjãy opping ara. Kumi yõtso ðëm wšeni ga pjãy opping ara ðëme. Kumi sorë ga pjãy opping eni, ga pjãy opping e kjinmo obi. 25Ëye ðëbo tjok ga sèya jek obi. Ëye ðëye ðëm ga ðëye tjeng sirawa ši döya ba shjiryo drete” še. 26E irgo ga Jesús tjšê ba kong obi ga “Sbö ber no pjšuyo sorë, e so dwša sguina domer kjšararë kjoyoe. Dwša, e sguina beno kšung sho kjing go, ga domer ši shrono iröng ba ushko. Eshko ga pë, woðen, ga bë sök wšêpe. E wopro ga dwša sguina beno tjeng ši weno, ga kuno, shäryë eni sorë miyde domer širë ðëm gueniyo. 28Dwša ši kun jong šaga kšung shorë. Kun jem, korga wen, kjing shen, ga bo kwirkë shjiye. 29Bo kwirkono shjiy kuzong ga domer ši jongya ba skok kjwšë jã” še. 30E irgo ga Jesús tjšêno ba kong jek obi. Tjšê ga “¿Sbö ber no pjšuyo sorë, e so ðë kjoyo? ¿Šër bomi kong sorë ga pjšú? 31E so kjor dwšayo chirawa ko mostaza dgoroy kšung roy kjoyoe. Dwšagwo ëre chirawa, dwšagwo obšë obšë dorko. 32Gueniyo kun kësbang, dwšagwo obšë obšë kjinmo. Eshko ga sënwa ðë usho ywë ba kowo go” " še. 33Nopga pina Jesúsdë ðëbo jyãgšo go eni. Kura šok, gueniyo ðë šokšo miydara šok uunkong ðëme. 34Jesús tjšêno nopga kong ðëbo jyãgšo go erä. Gueniyo nopga tjeng kës ši briktong šok pjirshko ga ðëye šara ðëbo jyãgšo go ši, e ðë šokšo pjšoðgwera ba oppinggaga kong pjire. 35Kjok sëng ga Jesús sök kjyong roshko obi, ga tjšê ba oppinggaga kong ga " “Shji to dipzë, di bäng buk kësbang ëre kjwo kašëkong” še. Kuya šok ga opyono šok kjyong ši roy ga “Tjawa toe” še šok nopga kong, ga to jek ey dwayo. Eshko ga kjyong obšë sökoba jek tjeng ba tjok bakoe. 37Eshko ga pjšuk tjwe jong träk ðëm, dbo ara di bäng buk kësbang ši kjing go. Di iõya ara, ga di dšin jong kjyong ši roy, pir sek seke. 38Eshko ga Jesús buk pë kjyong sigwo šëkong, kä iak buk kä iokšo kjing go. Eni ga ba oppinggaga jek šöng ba woðeng, ga tjšê ba kong ga “¡Tjšapga no pingga! ¡Shji ba pitoe! ¿Pja buk wšêp ega?” še. 39Kuya ga kojono, ga tjšê pjšuk, di iõya ši kong ga “Pja sšanzong. Pja ber tjëkso” še, ga beno buk tjëkso. 40Eshko ga tjšê ba oppinggaga kong ga “¿Kjok bangkjrëmi ara ega? ¿Pjãy mär bor go ðëm obire?” še. 41Eni ga epga shgawara šöng ara. Ga tjšê ëng kong ga “¿Kjwe ëro? Îzîa. Tjšêno pjšuk, di iõya ši kong ga koše pjšúe”

will be added

X\