Marcos 15

1Wêshko kjok shröng ga syõshtaga kägäyoga, judío tjšapgaga kjok ðgwega wšeniyo, no pinggaga kjok ðgwekkšo tara Moisésdë ši go, e töno šok Judío Kjok Ðgwegaga Këskësyo uunkong tjok, ðëye shärye šok Jesús tjok ši ðgweya šok ba tjok wšo. Šanyotkara šok pjir ga Jesús orkwo pjrira, ga söra, twara Pilato kong. 2Öötong šöng ba bokshto ga Pilato tjšê Jesús kong ga “¿Judío pjšuyo ši pjare?” “Šëp sök om go širo” še ba kong. 3Eshko ga Jesús rotara syõshtaga kägäyogarë, ðëbo ara kjîshko. 4E kjîshko ga Pilato tjšê Jesús kong ga “Tja kuzong. Pja rote šöng ara. ¿Dboryëp ðëmde?” " še. 5Gueniyo dboryara ðëme. E kjîshko ga woyotjšîya Pilatorë beno sök arae. 6Äär šu pjšobi go ga Israel tjëyoga döktong tek Egipto kjokyo dwayo dbaryo shrëkkšoshko ga nopga bängzak tjeng no shdûzšong uyo roshko ši, enido ga raye Pilatorë kjšara. Rokëba ba kong ë ga e rayayde." 7Eshko ga domer bängzak shäng no shdûzšong uyo roshko kjšara ko Barrabás. Dënashko ga ba pjšu, e woyde ðëme. E kjîshko ga ëng töno obšë tjok kjšöbö, ga ëngkjwono šok pjšu ši nopga tjok, ga nopga zröra šok. E kjîshko ga bängzak shäng eshko, no zröga obšë ši tjok. 8Eni ga nopga shrono šöng ara ga tjšê Pilato kong ga “Rokërwa bop kong sira ga nopga bängzak tjeng no shdûzšong uyo roshko ši rayos kjšara borwa kong, shäryëp enido sorë ga eni” še. 9Kuya ga tjšê nopga ši kong ga “¿Woydëmi ga judío pjšuyo šëmi ši dötë bomi kongde?” še. 10Miydara pjšú ga Jesús woydëba ara kjîshko ga ymoyotke syõshtaga kägäyogarë ara, ga söra šok ba kong e kjîshko. 11Gueniyo ga nopga tjeng eshko ši poshduna syõshtaga kägäyogarë arae. Tjšê šok ba kong ga “Rokozî ba kong ga Barrabás, e döyde bi kong dey” še ba kong. Ga rokara šok eni. 12Eni ga Pilato tjšê nopga ši kong ga “¿Eni ga ðëye woydëmi ga shäryër judío pjšuyo šëmi ši kong?” še. 13Kuya šok ga tjšêno dbo go, tjšê ga “¡Zrös pjang kjšös go!” 14”¿Ðë kjîy? Ðëbo owa shäryara ši šozî bor kong” še ba kong. Gueniyo ga nopga öö še, tjšê jek obi ga “¡Zrös pjang kjšös go!” še. 15Eni ga woydara Pilatorë ga nopga ber šöng wopjšú ba tjok wšo kuzong ga Barrabás, e shira, ga rayarae. E irgo ga Jesúsda twara ëngkjwagaga kong, shpoya šok no shpokkšo go wšo, zröya šok pjang kjšös go wšo bakoe. 16Eni ga söra šok öötong shäng Pilato u bongkjako. Shto eshko, e kowëba pretorio. Ga ëngkjwagaga töno tjeng uunkong eshko. 17Eshko ga kong shwong wšêna šok kara pjšupga shwong wšeniyo ko dingding shwëshwë, ga pjuna šok ba do go. Ga shkö sho ywara šok kjrina, beno pjšu dšu iokšo wšeni, ga iara šok ba dšu go. 18Eni ga tjšê šok dbo go ga “¡Judío pjšuyo, pja pjšú, pja tjwšõ arae!” še šok ba kong, joywe šok wšo. 19Eshko ga shpokza šok ara kjorkung go ba käshko, go tröng tjwara šok bakoe. E irgo ga kjök tono ba zšong bäng, poshrëya šöng wšeni, miga ba joywayde šok erä. 20Joywara šok pjir ga ba shwong pjang ba do go ko dingding shwëshwë ši skwara šok, ga ba shwong baîya ši pjuna šok jek iröng obi. E irgo ga söra šok to, zröya šok pjang kjšös go wšo. 21Jek šöng irbo bäng go ga domer tek shäng kjšara ko Simón, e Cirene so. E wapga domerga do pjök ko Alejandro, Rufo. Simón ši tek shäng kjšoy dwayoshko ga îya ëngkjwagaga jek šöng širë ga ichara šok dbo go Jesús kjšös ši sök. 22Ga Jesús söra šok jem öötong šöng kjokyo ko Gólgota. (E “No Kä Dbogšo dšupyo” šokšo.) 23Eshko ga kjiðgwo bo dyo dbo ara ropsrära šok dwšo šõ pjšëbšë tjok. Ga pina šok Jesús kong ie wšo, gueniyo iara ðëme. 24Öötong dšo wenzong ga šöra šok pjang kjšös go. Ga Jesús šök pjang šishko, kjibokwo iak pjang kjwara, e zröya šok ðë kjîy miydëba wšo. Kjibokwo tak pjang ši tjšê ga “Domer ëre, e judío pjšuyo.” E irgo ga ëngkjwagaga tjeng ši tjöto šok ðëbo jyãgšo go, Jesús shwong ši ber ë kong îya šok wšo. 27Jesús šöra šokshko ga šûgwangga šöra šok do pjök šok kjšös go bakoe. Kjšara pjang or këšë, kjšara pjang or mišë, kjšösyo dboy dboye. 29Eshko ga nopga jek šöng Jesús šök pjangshko ši kä wikza tjã tjã, joywe šok wšo. Ga šãywe šöng owa bakoe. Tjšê ga “¿Pja Sbö u shdök ber dret, ga äär dbargwo mya ga shäryëp ber ba shtoshko iröng obi šorop ga pja oto? 30Pja opdös om go, pja ter opšõs töshko kjšös kjwe go dwayo” še ba kong eni. 31Syõshtaga kägäyoga, no pinggaga kjok ðgwekkšo tara Moisésdë ši go, e omšãywono šok eni bakoe. Tjšê šok ëng kong ga “Oba obšëra döra, gueniyo opdök om go ga äe. 32No pjšuyo ichara Sbörë shrono shäng ši, Israel tjëyo pjšuyo ši, e pjang om go. Tjawa mär ba go wšo ga woyde ga opšong om go jer töshko kjšös kjwe go dwayo. Eni ga înwa, ga jšõe šërwa bakoe” " še. Nopga do pjök šök šok kjšös go Jesús pjšor kar kar ëmdë ga omšãywë šok eni bakoe. 33Öötong dšo dšuw ga kjok ro zoktong kjok kjwang jîkong beno yêt erä. Beno eni äär jong dšo pjö šë wšeni. 34Dšo öötong eni ga Jesús tjšêno dbo go, tjšê ga " “Eloi, Eloi, ¿lama sabactani?” še. (E “Bor Sbö, bor Sbö, ¿tja rayorop jûni ega?” šokšo.) 35Kuya nopga tjeng eshko širë ga tjšê ëng kong ga “Kjwe kuzong. Sbö tjšõkwo šaga tek dënashko so Elías, e rokayde pjang” še. 36Eshko ga domer shäng kjšara jek tji tji, ga ðëbo ðukðuk di shak ara wšeniyo kjrara kjwara, pöra kjiðgwo bo dyo shpoä go, kjrochara kjor dbo go, ga poyona, shuya Jesúsdë wšo. E irgo ga tjšê nopga tjeng eshko ši kong ga “Wêyê. Elías tjwe ba šong kjšös kjwe go dwayore îy” še. 37E irgo ga ay še Jesúsdë dbo go, ga wošonoe. 38Sbö u roshko ga shwong kësbang iak pjang eshko ši dwšëtong aas ter kjomo dwayo äär jong töshko, beno kjring pjök. 39Jesús šök pjang kjšös go ši bokshto ga ëngkjwagaga šöng ši kägäyo shäng eshko. Jesús wošono sorë ši îya ga tjšê ga “Shinmo šök pjang kjšös go kjwe, e Sbö Wa jšõe” še. 40Eshko ga wašëga tjeng kjšöbö, kjupäshko ga öötong šöng Jerusalén kjokyo Jesús tjok. Eshko ga ðëye shäryëba Jesús kong ši îya tjeng pjola sit. E tjrëko tjeng dogšo mya, kjšara ko María Magdala so, kjšara ko Salomé, kjšara ko María. María ši, e Santiago mite ši mekë, José mekë bakoe. Jesús jëk shäng Galilea kjokyo obishko ga epga jëktong šöng ba tjok, ga kjimtara šok däwe. Wašëga obšë omshäryono eni eshko bako, ga to tek ba tjok, shrono šöng Jerusalén kjokyo bebi. 42Jesús wošono šishko ga poshäryozšong dbaryo ši ey. Eshko ga woshtozšong dbaryo ši dšoyo ääto, kjok sëng tjän. 43Eshko ga domer shäng kjšara ko José. E Arimatea so, Judío Kjok Ðgwegaga Këskësyo kjšarayo, tjwšõ ara wšeniyo. Sbö ber no pjšuyo dbaryo ši koshe sök bakoe. E opyono wokjang, jek öötong shäng Pilato shwoy, ga Jesús doyo rokara ba kong, jneya wšo. 44Kuya Pilatorë ga beno sök wotjšîk ga Jesús, e wošono mašing jšõre še. Eni ga ëngkjwaga kägäyo ši rokara tek ba shwoy, ga tjšê ba kong ga “¿Jesús wošono tjände?” 45”Ëng, wošono tjän” še ba kong. Eni ga José ichara Pilatorë Jesús doyo pjang ši kjrë, jneya buk sakshko wšo. 46Eni ga José shwong tjwšêno kara ko pjšubšún, pjšú wšeniyo, ga jek öötong shäng shinmo šök pjang kjšös go šishko. Eshko ga doyo ši šona ter töshko, popgara shwong ši go, ga söra jek öötong sakshko. Eshko ga iara pjšëbgwo kak jong guëmkwota roshko, ga ak kësbang dira beno jong ba u bäng bäng go, bängzaya wšo. 47María Magdala so, María José mekë, Jesús doyo ši iak buk kjone, e îya beno šöng eshko.

will be added

X\