Lucas 4

1Eshko ga Jesús go Sbö Sëya jšõkoyo. Eni ga tjwe iröng Jordán diyo dwayoshko ga söra Sbö Sëyarë jek öötong shäng kjok dogro no ðëmshko. 2Eshko ga tjšîna Ärë shäng dbargwo sak pkëng (40), ðëbo owa shäryë wšo še. Dbar eshko ga Jesús iono ðëme. E irgo ga pjši jonge. 3Eni ga Ä tjšê ba kong ga “Pja Sbö Wa jšõkoyo ga akkwo ëre posgos ber pjšung shosho suk pjir, uëp wšo” še. 4Kuya ga tjšê ba kong ga “Sbö tjšõkwo tak pjang eni: “No mär dši go dö ðëme”“ še. 5E irgo ga söra Ärë jem öötong shäng dšup jong kjókshko dbo go, ga kjok kjwang jîkong kjrina kjrina ši pina ba kong uunkong jekdo. 6Eshko ga tjšê ba kong ga “Pja kjök tok, tja poshrëp wšeni ga kjok uunkong ëre twër ber bop kong. Ba ðëbo wošësowa tjeng kës kjwe, ba dbo ara, e ber bopoya, ga pja ber ba ichaga. E twak beno bor kong uunkong, ga twër woydë ë kong ga twër” še. 8Kuya ga tjšê ba kong ga “Sbö tjšõkwo tak pjang eni: “Tjšapga, bop Sbö ši poshrëmirë döe. E košomirë döe”“ še. 9E irgo ga söra Ärë jek öötong shäng Jerusalén kjokyo, Sbö u kësbang jong šishko. Eshko ga söra jem öötong shäng Sbö u dbo go, ga tjšê ba kong ga “Sbö tjšõkwo tak pjang eni: ““Ba parkagaga kjok dogo so iche Sbörë bop dë, pja shaya ba orkwo go, pja dre pjë akkwo go ðëm wšo.” E kjîshko ga pja Sbö Wa jšõkoyo ga pja optos jer na dwayo” še. 12Kuya ga tjšê ba kong ga “Sbö tjšõkwo tak pjang eni bakoe: ““Tjšapga, bop Sbö ši tjšîy ðëme”“ " še. 13Tjšîna Ärë pjir ga rayara to ey dwayo. Ga barwara ame äär jong ðono jã. 14E irgo ga Jesús to jek Galilea kjokyo iröng obi. Jëk shäng Sbö Sëya dbo ara ši tjok. Ga e roy shdöktong kjok eshko kjwang jîkong. 15Kjok kjrina kjrina ga oba pîya judíoga syõ uyo roshko, ga poshrëkoba uunkong." 16Pjšara ga Jesús jek öötong shäng Nazaret kjokyo, kuno shäng šishko. Ga öötong woshtozšong dbaryo ga opzrëno jek shäng judíoga syõ uyo jong eshko ši roy. Eshko ga kojono shäng, Sbö tjšõkwo šë nopga tjeng ši kong wšo, sgara shäng enido sorë ga eni. 17Ga kjibokwo tara Sbö tjšõkwo šaga tek dënashko so Isaíasdë ši twara tjeng ba kong. Eshko ga kjibokwo ši koshwina, ga šara nopga ši kong. Tjšõkwo tak pjang šara ši tjšê eni: 18”Tja kjrara Tjšapga Sëyarë, ba tjšõkwo roy pjšú šë oba song wšeniyo kong wšo. E kjîshko ga Tjšapga Sëya pjang bor go. Tja ichara tjšê nopga shdung šöng ši kong ga “Pjãy där mašinge”, tjšê nopga kjok îgö ðëm ši kong ga “Pjãy kjok îk shara”, tjšê nopga bokrotkëba ara ši kong ga “Pjãy bokrotkëba ame”, 19tjšê nopga uunkong kong ga “Sbö nopga där dbaryo ši öötonge.”“ 20E irgo ga kjibokwo ši ðira, twara iröng ba kjimtaga parkë shäng judíoga syõ uyo roy ši kong, ga sirkeno sök eshko. Eshko ga îya nopga šöng širë beno šöng drëng erä. 21Eni ga Jesús tjšê ba kong ga “Sbö tjšõkwo ëre kuromi ši, e shäryono eeri” še. 22Tjšê shäng ga ba kugaga šöng ši tjšê ëng kong ga “Kjwe pjšúe. Ba tjšõkwo še ši, e wošësowa” še, ga beno šöng yëy še erä. Ga tjšê ëng kong ga “¿Domer kjwe José wa ðëmdo?” še. 23Kuya Jesúsdë ga tjšê ba kong ga “Ðëye šëmi woydë bor kong ši, e miydoror pjir tjän. ¿No dwšomnega shäng kjšara swšo ara ga shji tjšê ba kong ga “Pja no dwšomnek pjšúra pja opdwšomnes om goshko” šëy eni ðëmdo? Eni ga “Pja no dwšomnek pjšúra nopga tjeng bop kjok ëreshko dwšomnezong” šëmi woydë bor kong eni. “Capernaúm kjokyoshko ga ðëbo shäryorop obšë obšë ara ši roy kurorwa pjire. Eni ga bop kjok ëreshko ga shäryos eni bakoe” šëmi woydë bor kong eni bakoe. 24Šër bomi kong jšõkoyo ga Sbö tjšõkwo šaga, e iëba tjwšõ ara ba kjok om go šishko ðëme. 25Šër bomi kong jšõkoyo ga Sbö tjšõkwo šaga Elías dbaryoshko ga shunyo shrono ðëm šu pjšogšo mya kjingsho bëy, ga pjši shrono ara kjone pogo. Eshkoshko ga syãpga tjeng ara Israel kjokyo, Elías sök šishko, 26gueniyo ichara Sbörë syãpga šöng eshko ši kjimtë ðëme. Miga ichara Sarepta kjokyo, kjok ši buk Sidón kjokyo worbo go, syã sök kjšara eshko kjimtë wšo. 27Sbö tjšõkwo šaga Eliseo dbaryoshko ga nopga tjeng Israel tjëyoga ara pogšo go swšo ara, sho an do jîkong wšeniyo, gueniyo poptara kjšara ðëme. Miga domer Siria so ko Naamán, era poptara” še. 28Kuya nopga tjeng judíoga syõ uyo roshko širë ga iirkono ara ba kong. 29Ga kojono šok, ga Jesús söra šok jek kjok eshko dwayo. Kjok eshko ši, e pjang dšup pogšo go. Eni ga söra šok jek öötong šok dšup ši dbo go, dbuya šon jer töshko wšo šara. 30Miga Jesús opdöno jek ba tjrëko, ga toe. 31E irgo ga jek öötong shäng Capernaúm kjokyo, e Galilea kjokyo obi. Ga öötong woshtozšong dbaryo ga opzrëno jek shäng judíoga syõ uyo jong eshko ši roshko, ga nopga pina. 32Tjšõkwo šara jšõkoyo, dbo ara go. E kjîshko ga nopga šöng ba kuga ši beno šöng yëy še erä. 33Eshko ga domer shäng kjšara, goshko Ä sëya kjšara. Ga Jesús îya sëya širë ga öö še ba kong dbo goshko, tjšê ga 34”Jesús, Nazaret so, ¿pja tek shäng borwa barwë ega? ¿Pja tek shäng borwa pjigare? Pja ë miydër pjšúe. Pja iak beno shäng dboy Sbö kong” še. 35Kuya ga sëya ši wšona, tjšê ga “Pja kjinkozong. Pja opkjos domer kjwe go dwayo” še. Kuya ga domer ši dbura buk töshko, gueniyo ðëye owa shäryara ba kong ðëme. Eshko ga opkjono ba go dwayo. 36Eni ga nopga tjeng eshko ši beno šöng yëy še erä. Ga tjšê ëng kong ga “¿Tjšõkwo kjwe ðëro? Dbo ara go ga Ä sëyaga iche opkjë ga koše jšõkoyo” " še. 37Ga Jesús roy shdöra šok kjok eshko kjwang jîkong. 38E irgo ga Jesús opshino judíoga syõ uyo ši roshko dwayo, ga jek öötong shäng Simón ushko. Eshko ga Simón ëm buk swšo ara, wšoyo kjšikdë. Eni ga nopga tjeng eshko ši tjšê Jesús kong ga " “Rokërwa bop kong sira ga kjwe kjimtozong” še. 39Öötong shäng ba zšong bäng ga kjšik ši zenoe. Jekdo eshko ga kojono, ga dši shäryono ba kong. 40Jek kjok ro zar ga nopga swšo obšë obšë wšeniyo söraba ara Jesús kong. Ga orkwo iono kjšara kjšara kjing go, ga poptara. 41Jesús, e no pjšuyo ichara Sbörë shrono shäng ši miyde Ä sëyaga tjeng oba goshko širë owa ðëme. Epga toshko ga tjšê šöng dbo go ga “¡Pja Sbö Wa!” še. E kjîshko ga ichara Jesúsdë tjšê ðëme. 42Wêshko kjok shröngto ga Jesús opshino jek kjok eshko dwayo, to jongya ëye ðëmshko, ber sök tjoksa wšo. E irgo ga nopga to šöng ba wšêk. Ga wšêna šok, ga tjšê šok ba kong ga “Pja brik ðëme” še. 43Gueniyo kuya ga tjšê ba kong ga “Tja to jongya kjok shto obšë obšë, Sbö ber no pjšuyo sorë ši roy pjšú shdök, miydëba wšo. Tja ichak shäng e kong wšo” še. 44Eni ga to shäng ba šë judíoga kjokyo kjrinashko kjrinashko, judíoga syõ uyo šok kjwobi ši roshko.

will be added

X\