Lucas 13

1Eshko ga nopga šöng kjšöbö tjšê Jesús kong ga “Galilea sopga šöng kjšöbö öng zrök, sho suya, pjë dret Sbö kong wšo. E wopro ga nopga ichara bi pjšuyo Pilatorë ba zrök, ga zröra šok eshko” še. 2Kuya ga tjšê ba kong ga “¿Pjãy wotjšîk ga Galilea sopga ši zröraba, epga owa, nopga obšë ba kjokshko so kjinmo kjîshko šëmire? 3Šër bomi kong ga eni ðëme. Gueniyo ðëbo owa shäryëmi šöng ši, e owa jšõe šozî, ga rayozîa. Ðëm ga pjãy pjir bakoe. 4¿E ga pjãy wotjšîk ga nopga wošono Siloé kjokyo dogšo sak kjwara kjingsho kjwong (18), ak sho jong kjókshko eshko ši dgono jer ba kjing goshko ši, e owa, Jerusalén sopga ðamo ši kjinmo šëmire? 5Šër bomi kong ga eni ðëme. Gueniyo ðëbo owa shäryëmi šöng ši, e owa jšõe šozî, ga rayozîa. Ðëm ga pjãy pjir bakoe” še. 6E irgo ga tjšêno nopga kong ðëbo jyãgšo go. Tjšê ga “Domer shäng kjšara, kjor jong kjšara, ba kjiðgwo bo ara kjokyo ši tjrëko. Kjor ši ko higuera. Dbar kjwara ga jek jëk shäng e go, bo tjokde îya wšo, gueniyo bo drete. 7Eni ga tjšê ba kjok daga ši kong ga “Kuzong. Eeri ga öötong šu pjšogšo mya ga kjor kjwe înshko ga bo wšên kjwara ðëme. ¡Kjwe kòzong! ¿Shto kjrë jong ara ðënoro?” še ba parkaga ši kong. 8”Kuya ga tjšê ba kong ga “Tjšapga, wêyê. Rayos ber jong šu pjšara obi, sor pokër, ga dwšomner, 9botjyëre îy wšo, ðëm ga köm eshko jã ga pjšúe” še ba pjšu kong” še. 10Woshtozšong dbaryo kjwara ga Jesús sök oba ping judíoga syõ uyo jong kjwara ši roshko. 11Wašë sök kjšara eshko, swšo ara šu pjšogšo sak kjwara kjingsho kjwong (18) tjän, wšoyo Ä sëya kjšararë. Wašë ši beno shäng wozönge. 12Îya Jesúsdë ga rokara tek ba shwoy, ga tjšê ba kong ga “Pja döktong, pja rayara bop swšo wšerë” še, 13ga orkwo iono ba go. Jekdo eshko ga wašë ši poptono beno shäng kjšo bek ba shtoshko. Ga opyono beno shäng Sbö poshrëk. 14Gueniyo judíoga syõ uyo kägäyo ši shäng eshko. Îya ga iirkono ara, tjšê nopga šöng ši kong ga “Shji parkozšong dbaryo iak šok kjwo tjer (6). Pjãy poptë woydë ga pjãy tek eshko dbaryo ga pjšúe. Gueniyo woshtozšong dbaryo šira ðëme” še. 15Kuya Jesúsdë ga tjšê ba kong ga “¡Pjãy Sbö tjšõkwo söga jšõkoyo šëmi, gueniyo pjãy wotjšîk owa bomi pjšúshko! Wašë kjwe, e Abraham tjëyo, ga tjeng Ä wšoshko eeri ga öötong šu pjšogšo sak kjwara kjingsho kjwong (18). ¿Pjãy uunkong bomi öng dök, sömi di ië woshtozšong dbaryo ðëmdo? ¿Eni ga wašë kjwe döror Ä wšoshko dwayo dbar ëreshko ga owa šëmi sorëro?” še. 17Kuya ba wšoyoga širë ga šökkjrono ara. Gueniyo ðamoga šöng šira beno šöng wopjšú, ðëbo shäryara kës ši kjîshko. 18Eshko ga Jesús tjšê šöng ši kong ga “¿Sbö ber no pjšuyo sorë, e so ðë kjoyo? ¿Šër bomi kong sorë ga pjšú? 19E so kjor dwšayo chirawa ko mostaza dgoroy kšung roy kjoyoe. Kuno ga kësbang, kjor wšeni. Eshko ga sënwa ðë usho ywë ba kowo go” še. 20E irgo ga tjšê ga “¿Sbö ber no pjšuyo sorë, e so ðë kjoyo? 21E so wašë pjšung shosho ðruno bayo ara ba uukkšo tjok, ga ie ber buk uur wšo kjoyoe. Ba uukkšo shdöktong pjšung shosho ši kjwang jîkong” še. 22Jesús to jek shäng Jerusalén kjokyo wšo še. Eshko ga jëk shäng irbo goshko ga äär kjok kjrina kjrinashko ga sšan oba ping. 23Pjšara ga no kjšara ðëbo kjakrokono ba kong. Tjšê ga “Tjšapga, ¿no kjre Sbörë där wšo ši kjšöbö döre?” 24”Pjãy drön ëë, pjãy opzrëk jek kjër bäng bam chira ši go wšo. Šër bomi kong ga nopga ara opzrëk woydë jek e go wšo, gueniyo jek ga äe. 25U sogo ši u bäng bängzano pjir ga pjãy beno šöng kjoko ši, u bäng ši porwëmi kjöw kjöw, ga öö šëmi, pjãy tjšê ga “Tjšapga, u bäng dös borwa kong sira” šëmi eni. “Kuya ga tjšê bomi kong ga “Pjãy ë, pjãy kjone so, e miydër ðëme” še. 26”Eshko ga pjãy tjšê ba kong ga “Dënashko ga tjawa iono bop tjok, ga oba pinop borwa kjokshko bakoe” šëmi eni. 27”Kuya ga tjšê bomi kong ga “Pjãy ë, pjãy kjone so, e miydër ðëme. Pjãy ðëbo owa shäryaga eröe. Pjãy opkjos bor shwoy ëre dwayo” še. 28”Eshko ga Abraham, Isaac, Jacob, Sbö tjšõkwo šagaga šöng kës ši, e ber šöng Sbö sök no pjšuyo îyado šishko. Ga nopga kjok kjwang jîkong so sirkek äär ber šöng ië ba tjok. Îmi eni ga pjãy iak beno tjeng kjoko kjîshko ga pjãy ber tjeng sšar eshko, kowo uë, ðëbo bang ara bomi kong kjîshko. 30Eerishko ga kjong kjong tjwšõ ara ši, e ber šöng tjwšõ chira eshko. E ga eerishko ga kjong kjong tjwšõ chira ši, e ber šöng tjwšõ ara eshko” še. 31Eshko ga fariseoga shrono šöng kjšöbö, ga tjšê ba kong ga “Pjšu Herodes, pja zröya woydë. E kjîshko ga pja nom jûy dwayo” še. 32Kuya ga tjšê ba kong ga “Domer šëmi šöng ši, e oba jyãpgwaga erä. Pjãy nom ba shwoy, ga pjãy tjšê ba kong ga “Eeri, bong ga tja shäng Ä sëyaga tjeng oba goshko ši ichë to, ga tja shäng oba poptë bakoe. Pak shäryër wšo ši, e pjir kjönma” šëmi ba kong eni. 33Gueniyo ga eeri, bong, kjönma ga tja to jek shäng Jerusalén kjokyo wšo. Tek këgongshko ga Sbö tjšõkwo šagaga zröraba shtoyo eshko. 34”¡Jerusalén sopga, tja kuzîa! Sbö tjšõkwo šagaga zrömi. Sbö tjšõkwo roy šagaga ichara bomi kong ši šömi ak go, zrömi wšo. Woydoror enido ga pjãy tön, kjörkö meyo ba wapga töno tjeng ba sjàgä dirko wšeni, gueniyo woydoromi ðëme. 35Tja kuzîa. Bomi u, e raye Sbörë ber jong tjoksa. Šër bomi kong ga tja ëre îmi ame, äär jong pjãy tjšê šöng ga ““Kjwe ichara Tjšapgarë tjwe kjok ëreshko. Kjwe kjimte Sbörë” šëmi šöng guing”

will be added

X\