Juan 9

1Jesús jek jëk shäng wopro ga domer îna sök kjšara kjok îgö ðëm, weno buk eni. 2Eshko ga ba oppinggaga tjšê šok ba kong ga “Tjšapga no pingga, ¿domer kjwe weno buk kjok îgö ðëm kjweni ega? ¿Ðëbo owa shäryaga erëre, de ba datagarë?” 3”Eni ðëme. Beno kjweni, opshäryono owa kjîshko ðëm, ba dataga opshäryono owa kjîshko ðëm bakoe. Domer kjwe kjok îgö ðëm, Sbö dbo ara ši pin oba kong wšo. 4Pak twara bor ichagarë bi kong, shäryëy wšo. Ga dbar tjok obi wopro ga pak ši shäryëy kjšuwe. Dbar pjitong ga ðëye shäryëy wšo ame. 5Tja sök kjok ëre kjing go obishko ga tja so iök jong shjiy nopga kjok ëre so kong kjoyo, kjok miyde šok ara wšo” še ba kong. 6Tjšêno pjir ga tröng tjwono kšung kjing go, ga ba tröng ši rorwara kšung sho tjok beno dishäng. Eshko ga kjrara sira, ga shtira domer sök ši bokkwo kjing go kar kar, 7ga tjšê ba kong ga “Pja nom bokkwo shkwë di buk di bapkwo ko Siloé roshko ši go” še. (Siloé, e ichara šokšo.) Kuya ga to jek eshko, bokkwo shkwono di šara ši go. E irgo ga tjwe shäng iröng obi, ga bokkwo poptono beno pjšúe. 8Îya ba pjeyoga šöng soshko širë ga tjšê šok ëng kong ga “¿Domer kjwe, îy sök dbur rokë oba kong kjupargue kjwe ðëmdo?” še šok eni. Nopga dämär ga omîno dbur rokë oba kong wšeniyo omšono eni bakoe. 9Eshko ga kjone kjone tjšê ga “Kjwe jšõe” še. Kjone kjone obi tjšê ga “Ðëme. Domer kjwe so e kjoyo erä” še. Tjšê šöng ðë ši kuya domer širë ga tjšê ba kong ga “Domer šëmi šöng ši, e tja” še. 10Kuya šok ga tjšê ba kong ga “¿Eni ga pja kjok îk pjšú sorë?” 11”No shäng kjšara kowëba Jesús. E dishäng shäryono sira, ga shtira bor bokkwo kjing go. E irgo ga tja ichara bokkwo shkwë di buk di bapkwo ko Siloé roshko ši go. E irgo ga tja öör bokkwo shkwë eshko, ga tja beno shäng kjok îk pjšúe” še. 12Kuya šok ga tjšê ba kong ga “¿Domer šëp shäng ši kwonðo?” “Miydër ðëme” še ba kong. 13Eshko ga woshtozšong dbaryo. E kjîshko ga domer ši söra šok, jek öötong shäng fariseoga šöng ši shwoy. 15Eshko ga fariseoga tjšê šok ba kong ga “¿Pja poptono sorë?” “Dishäng shtira Jesúsdë bor bokkwo kjing go. E irgo ga tja bokkwo shkwono, ga tja beno shäng kjok îk pjšúe” še ba kong. 16Kuya šok ga kjone kjone tjšê ga “Domer še ši, woshtozšong dbaryo jneya ðëme. Miydëy e go ga e ichaga Sbörë ðëme” še. Kjone kjone obi tjšê ga “¿Gueniyo e ðëbo owa shäryaga wšeniyo kjwe ga ðëbo îydëba ðëm wšeniyo shärye sorë?” še. Eni ga beno šöng wotjšîk obšë obšë. 17E irgo ga tjšêno šok domer poptono shäng ši kong obi. Tjšê ga “Bokkwo poptono ši pja. ¿Eni ga bop kong ga domer šëp shäng ši ë?” “Bor kong ga domer ši, e Sbö tjšõkwo šaga” še ba kong. 18Kuya judío tjšapgaga šöng širë ga tjšõkwo kjre ðëme. E kjîshko ga no ichara šok ba dataga wšokjrë. 19Söra šok, öötong šöng eshko ga judío ichagaga ši tjšê šok ba kong ga “¿Weno kjok îgö ðëm šëmi šöng ši kjwe jšõre? ¿Eni ga shäng kjok îk pjšú sorë?” 20”Miydërwa ga kjwe borwa wa jšõe. Ga weno kjok îgö ðëme. 21Gueniyo eeri ga kjok îgö pjšú sorë, poptaga ë, e miydërwa šöng ðëme. Kjwe këguë tjän. Kjakrokozî ba kong om go dey, pjãy dborye om go wšo” še ba kong. 22Šara šok eni, judío tjšapgaga ši bangkjre šok ara kjîshko. Tjwayde šok ðëm obishko ga judío tjšapgaga ši tjšêno šok ëng kong ga “Ëye tjšêno ga “No pjšuyo iche še Sbörë ši, e Jesús” šara ga ichërwa opzrëk bi syõ uyo roshko ame” šara šok eni pjir tjän, ga beno eni. E miydara domer ši data, mekërë pjire. Tjšêno ga “Kjwe këguë tjän. Kjakrokozî ba kong om go dey” šara šok eni e kjîshko. 24E irgo ga domer bokkwo poptono ši rokara judío ichagaga širë jek obi, ga tjšê šok ba kong ga “Miydërwa ga domer šëp shäng ši, e ðëbo owa shäryaga eröe. E kjîshko ga tjšõkwo šos bëy, Sbö ber kësbang, tjwšõ ara wšo” še. 25Kuya ga tjšê ba kong šok ga “Domer ši ðëbo owa shäryagare, de ðëm, e miydër shäng ðëme. Gueniyo ga dämär ga tja kjok îgö ðëm, ga eeri ga tja kjok îgö pjšúe. Era miydër pjšúe” še. 26Eshko ga tjšêno šok ba kong obi. Tjšê ga “¿Bop bokkwo kjwe popteshko ga ðëye shäryara bop kong?” 27”Šoror bomi kong tjän, gueniyo tja tjšõkwo kjrëmi woydë ðëme. ¿Kjakrokëmi bor kong kjër ðëno? ¿Pjãy kjšopswë woydë ber šöng opping ba tjokde?” še ba kong. 28Kuya šok ga domer ši äyoshtakza šok tjã tjã, tjšê šok ga “¡Ba oppingga ši pja eröe! ¡Tjawa opping Moisés tjšõkwo go! 29Miydërwa ga tjšõkwo šaga Moisés kong ši, e Sbö. Gueniyo domer šëp shäng ši wen tjwe kjone dwayo miydërwa ëmdë ðëme” še. 30Kuya ga tjšê ba kong šok ga “¿E sorëro? E wen tjwe kjone dwayo miydëmi šöng ðëm, gueniyo bor bokkwo poptara beno pjšúe. 31Miydëy pjšú ga ðëbo owa shäryaga syõshtë Sbö kongshko ga tjšõkwo kuya ðëme. Gueniyo ëye Sbö poshrëk, ðëye woyde ši shäryë îyado ga era syõshtë ba kong ga tjšõkwo kuya. 32¿Kuy ðonoshko ga ëye weno kjok îgö ðëm ši bokkwo poptaraba eni šëba? Ëye ðëme. 33Domer ši ichaga Sbörë ðëm kjwe ga ðëbo shärye kjweni ga äe” še. 34Kuya šok ga tjšê ba kong ga “Pja wenoshko tek šëkong ga pja ðëbo owa shäryaga eröe. ¿Eni ga tjawa pim woydë ega?” še šok ba kong, ga ichara šok judíoga syõ uyo dwayo, ga ichara šok opzrëk e roshko ame. 35Roy kura Jesúsdë. Eni ga domer ši wšêna, ga tjšê ba kong ga “¿Pja mär no to ter kjok dogo dwayo ši gore?” 36”Tjšapga, šëp shäng ši ë šos bor kong, tja mär ber shäng ba go wšo” še ba kong. 37Kuya ga tjšê ba kong ga “E înop tjän. Shäng šan bop tjok ši e” še. 38Kuya ga tjšê ba kong ga “Tjšapga, tja mär bop go” še, ga kjök tono sök ba zšong bäng, ga poshrëra. 39Eshko ga tjšê domer ši kong ga “Tja shrono shäng kjok ëre kjing go no ðgwega, nopga kjok îgö ðëm wšeni ber šöng kjok îk pjšú wšo, nopga kjok îk pjšú wšeni ši ber šöng kjok îgö ame wšo bakoe” še. 40Fariseoga šöng eshko kjšöbö. Tjšêno eni ši kuya šok ga tjšê ba kong ga “¿E sorë? ¿Enira bop kong ga tjawa šöng kjok îgö ðëm wšenire?” 41”Pjãy šöng kjok îgö ðëm kjwe ga pjãy ber shdungko, ðëbo owa shäryoromi ši kjîshko ðëme. Gueniyo pjãy kjok îk pjšú šëmi kuzong ga pjãy shdungko” še.

will be added

X\