Juan 18

1Jesús syõshtono pjir ga opshino jek eshko dwayo ba oppinggaga tjok, ga jek dipzono Cedrón diwa kjwo kašëkong. Eshko ga kjok dgak buk kjrina, kjor ko olivo šok ara, ga opzrëno jek šok eshko. 2Jesús tön shäng enido eshko ba oppinggaga tjok. E kjîshko ga kjok ši miydara Judas, ba soynega širë pjšúe. 3Eni kuzong ga Judas jek äär shäng eshko. Ëngkjwagaga, Sbö u dagaga, e jek šöng ba irgo, ichak syõshtaga kägäyoga, fariseogarë. Ëngkjwokšo söya tjeng ba wšoshko, iök bakoe. 4Ðëye shärye ba tjok ši miyde Jesúsdë shäng. Eni ga ëng wšêno ba tjok, ga tjšê ba kong šok ga “¿Ë wšêmirë?” 5”Jesús, Nazaret so ši wšênwarë” še šok ba kong. Eni ga tjšê ba kong šok ga “E tja” še. (Judas, ba soynega ši shäng eshko ba tjok bebi.) 6Šara eni ši kuya šok ga opshino jek šok iröng sira, ga dgono jek rish rish tjeng töshko. 7Eshko ga Jesús tjšê ba kong šok jek obi ga “¿Ë wšêmirë?” “Jesús, Nazaret so ši wšênwarë” še šok ba kong. 8Eni ga tjšê ba kong šok jek obi ga “E tja šoror bomi kong tjän. Tja wšêmirë dö ga ðamo šöng ëre ichozî toe” še. 9Shäryono eni, tjšõkwo šara šunashko ši ber jšõkoyo wšo. Tjšêno ga “Nopga tworop bor kong ši jeror kjšara ðëme” šara eni. 10Eshko ga Simón Pedro dröng shino kjwangna ba bapkwo roy dwayo, ga syõshtaga kësbangyo parkaga kwomgwo zakza tas jer šon pjik buk töshko erä. (Parkaga ši ko Malco.) 11Eshko ga Jesús tjšê ba kong ga “Bop dröng kjwe jnes ba shtoy iröng obi. Tja ichara Data Sbörë, tja shdungoba, bokrotkëba, zrökoba wšo, ga shäryër eni kjšuwe” še. 12Eshko ga ëngkjwagaga, ba kägäyo, Sbö u dagaga, Jesús shara šok, ga kjrochara. 13E irgo ga söra šok jek Anás bokshto. Anás, e Caifás kegue. Šu eshko ga Caifás parkë sök syõshtaga kësbangyo. 14Kjupäshko ga tjšêno ga “Pjšú wšo ga no wošon kjšara oba uunkong ãska” šara eni. 15E wopro ga Simón Pedro, Jesús oppingga kjšara obi, e jek šöng Jesús sökoba jek shäng ši irgo. Jesús oppingga obšë ši miyde syõshtaga kësbangyo širë kuzong ga pjöyîkong jek opzrëno shäng Jesús tjok u ši worbo go. 16Pedrora beno sök kjoko, u bäng zšong. Eshko ga Jesús oppingga obšë ši opshino tek iröng, ga šano kjogšo parkë shäng u bäng daga ši tjok, ga Pedro söra jek ba tjok kjër roshko. 17Eshko ga kjogšo ši tjšê Pedro kong ga “¿Pja ëmdë ga domer ši oppingga bebi ðëmdo?” “Ðëme” še ba kong. 18Eshko ga smo ara kuzong ga parkagaga, Sbö u dagaga šöng ši, e iök boktöno kjwara, ga beno šöng iökkok. Pedro ëmdë ga shäng iökkok ba tjok bakoe. 19E wopro ga syõshtaga kësbangyo ši ðëbo kjakrokono Jesús kong, ba oppinggaga kjîshko, ðë pîyde oba kong ši kjîshko bakoe. 20Kuya ga tjšê ba kong ga “Tja tjšêno oba uunkong bokshto. Dbar kjwobi go ga oba pinor shäng judíoga syõ uyo šok ši roshko, ðëm ga Sbö u zšong bäng, judíoga šöng kës ši tön šöng enido ši shtoshko. Ðëbo šoror šûtshko ðëme. 21¿Eni ga ðëbo kjakrokëp bor kong ega? Kjakrokos bor tjšõkwo kugaga kong. Ðëye šoror ši miyde šok pjire” še. 22Šara eni ši kura Sbö u daga kjšara shäng širë, ga Jesús kwomso shpokza pjök, ga tjšê ba kong ga “¿Tjšapga syõshtaga kësbangyo kjwe dboryëp eniro?” 23”Ðëbo šoror owa kjwe ga ðë šos bor kong. ¿Gueniyo šoror pjšú ga tja shpop ega?” še ba kong. 24E irgo ga ichara Anásdë jek jëk shäng kjro go Caifás, syõshtaga kësbangyo ši shwoy. 25E wopro ga Simón Pedro shäng iökkok kjoko, ga šöng ši tjšê ba kong ga “¿Pja ëmdë ga domer ši oppingga bebi ðëmdo?” “Ðëme” še ba kong. 26Syõshtaga kësbangyo parkaga kjšara shäng eshko, e domer kwomgwo zara Pedrorë ši pjeyo. E tjšê Pedro kong ga “¿Pja înor shäng kjok dgak buk, kjor ko olivo šok ara šishko ba tjok bebi ðëmdo?” 27”Ðëme” še ba kong. Jekdo eshko ga kjörkö kjšunoe. 28Kjok shröngto ga Jesús söraba to Caifás shwoy dwayo, jek öötong šöng kjok eshko so ichaga ko Pilato, e ushko, gueniyo judío tjšapgaga šira opzrëno jek šok u ši roshko ðëme. (Dbar shrëkkšo ðë döröshko ga judíoga sgara šöng opkjë šöng dboshko. Opzrëno šok nopga judío ðëm wšeniyo u roshko wšeni ga Israel tjëyoga döktong tek Egipto kjokyo dwayo dbaryo ši shrëya ga äe še. Opzrëno jek šok u ši roshko ðëm e kjîshko.) 29Eni kuzong ga Pilato opshino tek kjoko, ga tjšê ba kong šok ga “¿Domer kjwe rotëmi ðë kjîshko?” 30”Ðëbo owa shäryara ðëm kjwe ga sörorwa tek bop kong ðëme” še ba kong. 31Eni ga Pilato tjšê ba kong šok ga “Eni ga sözî, ðgwezî pjãydë om go bomi kjok ðgwekkšo ši go” še. Kuya šok ga tjšê ba kong ga “Gueniyo no zrörwa tjawarë om go ga äe. No zrökko šaga ši pja eröe” še. 32Shäryono eni, tjšõkwo šara Jesúsdë, e wošon sorë ši ber jšõkoyo wšo. 33Eshko ga Pilato jek opzrëno ba u roshko iröng obi, ga Jesús rokara tek ba shwoy, ga tjšê ba kong ga “¿Judío pjšuyo ši pjare?” 34”¿E kjakrokëp shäng, tja ë miydëp woydë kjîshkore, de šaga obšërë bop kong?” še ba kong. 35Kuya ga tjšê ba kong ga “¿Tja judío šëpdo? Pja söga, twaga bor kong ši, e bop pjeyoga om go, syõshtaga kägäyoga bakoe. ¿Pja ðëye owa shäryono?” 36”Tja ber pjšu kjok ëre kjing go wšo ðëme. Eni kjwe ga bor nopga ëngkjwë judíoga tjok, tja wšike šok wšo. Gueniyo bor pjšu shtoyo ši kjokyo obšë” še ba kong. 37Kuya ga tjšê ba kong ga “¿Enira pja pjšure?” “Tja pjšu šaga pjarë, ga šorop beke. Tja weno to ter shäng kjok ëre kjing go, tjšõkwo bek ši šaga. Ëye tjšõkwo bek ši kuk woydë ga tja kuya” še. 38Kuya ga tjšê ba kong ga “¿Tjšõkwo bek ši ðë?” še. Šara eni pjir ga opshino jek šan judío tjšapgaga tjok obi. Tjšê ga “Domer ëre bor kong ga ðëye owa shäryara ber shdungko wšo drete. 39Äär šu pjšobi go ga Israel tjëyoga döktong tek Egipto kjokyo dwayo dbaryo shrëkkšoshko ga nopga bängzak tjeng no shdûzšong uyo roshko ši, enido ga rayër kjšara. ¿Eni ga woydëmi ga judío pjšuyo šëmi ši dötë bomi kongde?” 40”Ðëme. ¡Barrabás, e döpdë dey!” še ba kong. Barrabás, e dënashko ga ëngkjwono Roma sopga tjok.

will be added

X\