Juan 16

1”Šër shäng bomi kong eni, pjãy mär ber šöng bor go wšo, tja rayëmi ðëm wšo. 2Pjãy ichëba opzrëk jek judíoga syõ uyo roshko ame. Ga dbar tjwe kjwara ga pjãy zröya nopgarëshko ga wotjšîk šok ga ðëbo shärye šöng Sbö kong pjšúe še. 3Shärye šok eni, tja, Data Sbö, tjawa miyde šok ðëm kjîshko. 4Šër shäng bomi kong eni, äär ba dbaryoshko ga tjšõkwo ëre woyoshrëmi eshko wšo. “Tjšõkwo ëre šoror bomi kong tek dämärshko ðëm, eshko ga tja shäng bomi tjok obi kjîshko. 5Gueniyo eerishko ga tja to bor ichaga sök šishko. Eni ëmdë ga “¿Pja to kjone?” šëmi bor kong ðëme. 6Ðëbo šër shäng ši kuromi kjîshko ga pjãy beno šöng woydë ara. 7Gueniyo šër bomi kong jšõkoyo ga tja briktong ši, e ber bomi kong pjšú anmoyõ. Tja brik ðëm kjwe ga Sbö Sëya, bomi poshdungga ši tjwe ber bomi tjok ðëme. Gueniyo tja briktong pjir ga e ichër tjwe ber bomi tjok. 8Ga shronoshko ga nopga Sbö miydë ðëm wšeniyo, epga diktong ara ši pîya ba kong, miyde šok wêšë wšo. Mär šöng bor go ðëm kjîshko ga pîya ba kong ga wotjšîk bëy ðëbo owa ši kjîshko ðëme. Tja to Data Sbö sök šishko kjîshko ga pîya ba kong ga irbo bek ši miyde šok ðëme. 11Kjok ëre ichaga ši iak beno shdungko tjän kjîshko ga nopga ðgweya Sbörë sorë ši miyde šok ðëm bakoe. 12”Tja ðëbo šë woydë bomi kong ara obi, gueniyo eni tjok ga woyotjšîmi ga pjãy äär ba dbo go ðëme. 13Gueniyo Sbö Sëya shronoshko ga tjšõkwo bek kës ši pîya bomi kong. Eshko ga tjšõkwo še bomi kong ba woshko ðëm, tjšõkwo kura ši šayde bomi kong eröe. Ga ðëye wen wšo ši še bomi kong, wentë ðëm obishko. 14Tjšõkwo botoya ši še bomi kong, miydëmi wšo. Eni ga tja ie ber kësbang, tjwšõ ara. 15Data Sbö ðëbo tjeng kës ši, e botoya. Tjšõkwo botoya ši še Sbö Sëyarë bomi kong, miydëmi wšo šoror bomi kong e kjîshko. 16”Wop ä ga tja îmi shäng bomi tjok ame. Gueniyo wop ä obi ga tja îmi shäng bomi tjok jek obi” še. 17Kuya ba oppinggagarë šok ga tjšê šok ëng kong ga “¿“Wop ä ga tja îmi shäng bomi tjok ame. Gueniyo wop ä obi ga tja îmi shäng bomi tjok jek obi” še shäng ši ðë šayde? ¿“Tja to Data Sbö sök šishko” še shäng ši ðë šayde?” še šok eni. 18Ga kjakroke šok ëng kong jek obi ga “¿“Wop ä” še shäng ši ðë šayde? Ðë šayde miydëy šöng ðëme” še šok ëng kong eni. 19Ðëye kjakroke woyde ba kong ši miydara Jesúsdë pjire. E kjîshko ga tjšê ba kong šok ga “¿“‘Wop ä ga tja îmi shäng bomi tjok ame. Gueniyo wop ä obi ga tja îmi shäng bomi tjok jek obi’ še shäng ši ðë šayde?” šëmi šöng ëng kong eni. 20Šër bomi kong jšõkoyo ga nopga Sbö miydë ðëm wšeniyo šöng wopjšú wopro ga pjãy šöng woydë, sšar ara eshko. Gueniyo e irgo ga pjãy ber šöng eni ame, pjãy kjšopswë ber šöng wopjšú shara. 21”Wašë wšoshko buk döröshko ga shaya swšorë, dbaryo öötong kjîshko. Gueniyo wšoshko tjeng irgo ga bang ara ši woyo ba kong ame, wopjšú ba chida tjeng ši kjîshko. 22Eni wšeni ga eeri ga pjãy šöng woydë ara. Gueniyo e irgo ga pjãy în jek obishko ga pjãy ber šöng wopjšúe. Eshko ga wopjšú ši döga ërë bomi shjiryo ðëme. 23Eshko dbaryo ga ðëye kjakrokëmi bor kong wšo drete. Šër bomi kong jšõkoyo ga ðëye rokëmi bor Data kong bor ko go ši, e twe bomi kong. 24Ðëbo rokomirë Sbö kong bor ko ši go ðëm obi. Gueniyo eeri ga ðëbo rokozî ba kong, ga kjrëmi, ga pjãy ber šöng wopjšú jšõkoyo. 25”Tja tjšê shäng bomi kong ðëbo jyãgšo go, gueniyo ðono ga tja tjšê bomi kong eni ame. Eshko ga bor Data šãywër bomi kong wêšëe. 26Eshko dbaryo ga ðëbo rokëmi ba kong om go bor ko go. Tjara ðëbo rokë ba kong bomi kjîshko guing ame. 27Tja woydëmi, ga miydëmi ga tja ter shrono Sbö shwoy dwayo. E kjîshko ga pjãy woyde Data Sbörë om go. 28Tja ter shrono kjok ëre kjing go ba shwoy dwayo, ga tja to kjok ëre kjing go dwayo jem ba shwoy iröng obi” še. 29Kuya ba oppinggagarë šok ga tjšê šok ba kong ga “Eeri ga pja tjšê shäng borwa kong wêšë. Pja tjšê shäng ðëbo jyãgšo go ðëme. 30Ëre go ga miydërwa ga ðëbo tjeng kës ši miydëp shäng pjir, ðëbo kjakrokëba bop kong guing ðëme. E kjîshko ga miydërwa ga pja ter shrono Sbö shwoy dwayo” še. 31Kuya ga tjšê ba kong šok ga “¿Bor tjšõkwo kjrëmi tjände? 32Dbar tjwe kjwara ga pjãy shdär ber šöng ðaw pogo, pjãy kjšara kjšara ber šöng bomi ushko om go. Eshko ga tja rayëmi ber sök tjoksa. Gueniyo eshko ga tja sök tjoksa ðëm, bor Data sök bor tjok kjîshko. Ga dbar tjwe šër ši, e shrono tjän. 33Šër shäng bomi kong eni, pjãy ber šöng wšêp bor kjîshko. Pjãy šöng kjok ëre kjing go obishko ga ðëbo wen tjwe bomi kong owa ara. Gueniyo nopga Sbö miydë ðëm wšeniyo ši dbo zanor pjir tjän. E kjîshko ga pjãy dbokjrozong”

will be added

X\