Juan 15

1Eshko ga Jesús tjšê ba oppinggaga kong ga “Tja so kjiðgwo sokö bo pjšëbšë tjok wšeniyo kjoyoe. Obšëyo tja dik drete. Bor Data, e so kjiðgwo ši daga kjoyo bakoe. 2Kjiðgwo kowo ðë botjyë ðëm ga ze tas tas. Kowo kjong kjong botjyë ga dbo toya pjäs pjäs, kowo ši botjyë pjšú anmoyõ wšo. 3Pjãy so kowo dbo tok pjir ši kjoyo, tjšõkwo šoror bomi kong ši kjroromi kjîshko. 4Eni ga pjãy ber šöng bor tjok, ga tja ber shäng bomi tjok bakoe. Kowo ðë botjyë om go ga ä, jong tuktëng ba sokö go guing. Pjãy so e kjoyo bakoe. Pjãy ber šöng bor tjok ðëm wšeni ga pjãy ðëbo pjšú shäryë ga äe. 5”Tja so kjiðgwo sokö ši kjoyoe. Pjãy so ba kowo ši kjoyo bakoe. Ëye šöng bor tjok, ga tja shäng ba tjok ga ðëbo pjšú shärye ara, so kowo botjyë pjšú ši kjoyoe. Gueniyo ëye šöng bor tjok ðëm ga ðëbo pjšú shärye ga äe. 6Ga ëye šöng bor tjok ðëm ga ber so kowo dbukko, iak beno tjeng dan dogro wšo ši kjoyoe. Kowo eni ši, e tòy, suy wšo erä. 7Gueniyo pjãy ber šöng bor tjok, ga pjãy mär ber šöng bor tjšõkwo go ga ðëye rokëmi woydë ši rokozî, ga twër bomi kong. 8Pjãy îkoba ga ðëbo pjšú shäryë ara, so kowo botjyë pjšú ši kjoyo ga miydëba e go ga pjãy bor oppingga, ga bor Data iëba ber kësbang, tjwšõ ara bomi kjîshko. 9”Pjãy woydër, tja woyde Data Sbörë sorë ga eni. E košër shäng îyado, ga tja woyde ber shäng eni îyado bakoe. Eni ga tja košozî ber šöng îyado, pjãy woydër ber šöng eni îyado bako wšo. 11Šër shäng bomi kong eni, pjãy ber šöng wopjšú, botoya dik wšo. Eni ga pjãy wopjšú jšõkoyo. 12Tjšõkwo šër shäng bomi kong shäryëmi wšo ši eni: Pjãy ëng woydos ara kar kar, pjãy woydoror sorë ga eni. 13Shji bi kjšara woydë ara ga ðëbo shäryëy ba kong tjwšõ ara anmoyõ ši, shji optwë wošon ba kjîshko ši e. 14Ga tja košëmi wšeni ga pjãy kowër bor pjeyoga. 15Parkagaga tjeng ši, ðëye shärye ba kägäyorë ši, e miyde šöng ðëme. Gueniyo ðëbo šara bor Datarë bor kong ši, e šoror bomi kong pjir tjän. E kjîshko ga pjãy kowër bor parkaga ame, pjãy kowër bor pjeyoga shara. 16”Tja kjraga pjãydë ðëm, pjãy kjraga tjarë. Ga pjãy ioror beno to šöng ðëbo pjšú ber îyado ši shäryë. Shäryëmi eni ga ðëye rokëmi Data Sbö kong bor ko go ši, e twe bomi kong. 17Tjšõkwo šër shäng bomi kong shäryëmi wšo ši eni: Pjãy ëng woydos ara kar kare. 18”Nopga Sbö miydë ðëm wšeniyo, pjãy îywa šok shjiktëng wšeni ga woyoshrëmi eshko ga tja îywa šok shjiktëng bomi bäm go bakoe. 19Pjãy so epga kjoyo kjwe ga pjãy woyde šok pjšú, ba pjeyoga wšeni. Gueniyo pjãy kjroror ba tjrëko dwayo kuzong ga pjãy so epga kjoyo ame. Pjãy îywa šok shjiktëng e kjîshko. 20Tjšõkwo šoror bomi kong ši woyoshrozîa. Tja tjšêno bomi kong ga “Parkagaga tjwšêk šöng pjir wšeniyo tjwšõ ara, ba sogo kjinmo ðëme” šoror eni. Eni ga tja shduna šok kuzong ga pjãy shdûya šok eni bakoe. Tjšõkwo šoror ba kong ši kjrara šok kjwe ga tjšõkwo šëmi ba kong ši kjre šok eni bakoe. 21Ðëbo uunkong ëre shärye šok bomi kong, pjãy bor nopga kjîshko, bor ichaga miyde šok ðëm kjîshko bakoe. 22”Tja kjwe shrono tjšêno ba kong ðëm ga ðëbo owa shäryara šok ši ber pjang ba go ðëme. Gueniyo epga iak beno shdungko tjän, bor tjšõkwo kura šok ši kjrara šok ðëm kjîshko. 23Ëye, tja îywa shjiktëng ga bor Data, e îywa shjiktëng bakoe. 24Ðëbo îydëba ðëm wšeniyo shäryoror ba kong ara. Eni ðëm kjwe ga ðëbo owa shäryara šok ši ber pjang ba go ðëme. Gueniyo ðëbo shäryoror ši îna šok wêšë ëmdë ga tja, bor Data, tjawa îywa šok shjiktëng. 25Ëre shäryë jûni, kjok ðgwekkšo baîya tak pjang ši ber jšõkoyo wšo. Tjšêno beno eni: “Tja goshko ðëye owa wšêna šok ðëm ëmdë ga tja îywa šok shjiktëng.” 26”Rokër Data Sbö kong ga ba Sëya, bomi poshdungga ši iche tjwe ber bomi tjok. Ga ichara shronoshko ga pjãy kjimte, tjšõkwo bek ši pîya bomi kong bakoe. Ga tjšê bomi kong bor kjîshko ara. 27Ga pjãy šöng bor tjok tek dämärshko dwayo kuzong ga pjãy tjšê bor kjîshko eni bakoe.

will be added

X\